Axar.az
یوخاری
16 دکابر 2017


یاسلی ساوالان/عباس بارز -شعر

آنا صحیفه ادبیات
12 Punto 14 Punto 16 Punto 18 Punto

آذربایجان شاعری عباس اسلامی ۱۹۲۱-جی ایلده اهرین شیمالین‌دا آی پیرز‌ن کندین‌ده دوغولوب. پداقوژی (معلملیک) فعالیتله مشغول اولوب.
«رنگ‌لی گونلر» («گلهای رنگین»)، « ائل دایاغینا سلام»، «یاس‌لی ساوالان» آدلی شعرلری چاپ اولونوب. «آی آشیقلار، یاسا گلین»، «چوبان قارداش»، «ساری داش»، «شیور پوماسی»، «بایاتیلار»،»ساری و سوسن داستانی» آدلی شعرلری ایسه درج ائدیلمه‌ییب. او، ۲۰۱۱-جی ایلین نویابریندا وفات ائدیب.

یاسلی ساوالان

هر زامانکی باخیرام باشینا قار وار گؤرورم

اوغلو اؤلموش آنا تک گؤزلرین آغلار گؤرورم

هر طرفدن چکیلیب سینه‌وه داغلار گؤرورم

آی آلان اوستونو غم چیسگینی، هر یانی دومان

آی یاغان باشینا غملر اودو، یاسلی ساوالان

×××

گؤرموشوک یازدا کؤچک‌لرده چیچکلر آچیلار

هر طرفدن چیمنین سینه‌سینه گول ساچیلار

ماهنیلار قوشماغا باشلار یئنه‌ده قوشماچیلار

یاز گلیب گئتدی یئنه گولمه‌دین اوچ آیدا بیر آن

آی یاغان باشینا غملر اودو، یاسلی ساوالان

×××

قرنیلر کئچدی سنین گولمه‌دی بیر لحظه اوزون

قانلی یاش تؤکدو سارالمیش اوزونه یاشلی گؤزون

غصّه‌دن دؤندو قارانلیق گئجه اولدو گونوزون

نه سوران حالینی اولدو نه وئرن جیسمیوه جان

آی یاغان باشینا غملر اودو، یاسلی ساوالان

×××

آند وئررم سنی او قانه بلنمیش داشیوا

گئجه-گوندوز او گؤزوندن تؤکولن قان باشیوا

اوره‌گین دردینی بیلدیر او سهند قارداشیوا

سنی وارلیق، سنی تانری، سنی بو آه و فغان

آی یاغان باشینا غملر اودو، یاسلی ساوالان

×××

سالارام یادیما بیر لحظه او کئچمیشلریوی

تؤکولن سنگ جفائیله او دور دیشلریوی

ایزلرم بیر بیر او حئیرت یارادان ایشلریوی

هامیدان من سنین احوالینا آرتیق نیگران

آی یاغان باشینا غملر اودو، یاسلی ساوالان

×××

ساکیت اول، آغلاما قوی بیرجه چکیلسین بو دومان

گون چیخیب ظولمتی بیر یوللوقا قووسون بورادان

نبی گلسین، بوز آت اولسون یئنه داغلار آتیلان

هجرین بلکه ییغیلسین گؤزو یولدان، آناجان

آی یاغان باشینا غملر اودو، یاسلی ساوالان

×××

سؤندوره بیلمه‌دی گؤز یاشین اوره‌کدن اودووی

چاغیریم قوی کؤمک ائتسین سنه اؤز اؤولادیوی

افتخاریله بوگون ذیکر ائده‌ءرم پاک آدیوی

مرد اوغوللار بئجریب خلقه وئرن شؤهرت و شأن

آی یاغان باشینا غملر اودو، یاسلی ساوالان

×××

بابکین گئتدیسه بوش قالمادی آمما قوجاغین

دولودور مین ائله اوغلانلاریلا هر بوجاغین

نه قده‌ر یئل اسه طوفان قوپا سؤنمز اوجاغین

ای بلالر سپری، خالقا یامان گونده آمان

آی یاغان باشینا غملر اودو، یاسلی ساوالان

×××

چنلی بئلده دلی‌لر قوی یئنه قورسون بوساطی

قوچ کوراوغلو یئنه جولانه گتیرسین قیر آتی

هئچ زامان اصلین ایتیرمز او کی دوزگوندو ذاتی

آند اولا آدیوا، آی گؤزلری آغلار یاشی قان

آی یاغان باشینا غملر اودو، یاسلی ساوالان

×××

سن دؤیوشلرده بیر آسلان کیمی دوردون آیاغا

اوخ آتیلدیقجا بیزه سینه‌نی وئردین قاباغا

غم یئمکدن داها جانیم یئتیشبدیر دوداغا

نه یامان گونلره گؤر قالدی بو احساسلی بالان

آی یاغان باشینا غملر اودو، یاسلی ساوالان

×××

بابالاردان بیزه قالمیش بو مثل هاممی بیلیر

سو گلن آرخا دئییبلر یئنه بیرگون سو گلر

فلکین داش اورگین آه اوخو آخیردا دلر

“بارز” اوغلوندا یئتر سئودیگی یاره او زامان

آی یاغان باشینا غملر اودو، یاسلی ساوالا

تاریخ
2017.06.01 / 12:50
مولف
Axar.az
شرح لر
دیگر خبرلر

اومیدسیزلییمین آغیرلیغین‌دان آنلاییرام - شعر

لمان - یاشی بللی دئییل، بلکه اون اوچ...- شعر

کئچیردیک گئجه‌لرین ایچیندن - شعر

فارس شعیرینین قلیبلرینی داغیدان آذربایجان‌لی

من ایللردیر سندن اوزاقلاردایام...شعر

روسییا ایستانبول زیروه‌سینه بوقدانووو گؤندریر

گونیلی یازیچیدان – حکایه

تبریز آلوولانیب، وطن یانیردی - شعر

مشروطه پارکیندا سئوگیلیم له من...شعر

حکایه - آجی تیریک قوخوسو

خبر خطّی
 
  
  
  
  
Axar.az'da reklam Bağla
Reklam
Bize yazin Bağla