Axar.az
یوخاری
11 دکابر 2017


قاب یوماق خوشبختلیگی

آنا صحیفه ادبیات
12 Punto 14 Punto 16 Punto 18 Punto

دوش آلاندا بوغازیم همیشه قورویور. سراغاگون یئنه دوشدان سونرا ووجودومدان سوزولن دامجیلاری سیله-سیله آغلیما گلدی کی، خوشبخت‌لیک – ایندی حمام‌دان چیخیب چای سوزمک، یانیندا خورما، دیواندا یئریمی راحتلاییب سئریال ایزله‌مکدیر.

کیچیک سئوینجلری خوشبختلییه نئجه چئویرمیین فورمولونو تاپماغا چالیشیرام.

مثلاً، خوشبخت‌لیک اودور کی، دایاناجاق‌دا یاریم ساعت آوتوبوس گؤزلییرسن، نقلیات سیستمینی سؤیورسن، اونا نیفرینلر، قارغیشلار یاغدیریرسان و آز سونرا گؤزلدیین آوتوبوس اوزاقدان گؤروننده هر شئیی اونودورسان.

خوشبختلیک اودور کی، گؤزلنیلمز قوناغین گلیب، یئمک بیشیردیین واخت اؤلکه‌ده گاز کسیلیر و بیر نئچه ساعت سونرا یئنی‌دن وئریلیر، سنین اوچماغا قانادین اولمور سئویندییندن.

خوشبختلیک اودور کی، آلدیغین آیاق قابینین فوتوسونو فسبووک‌دا یئرلشدیریرسن، پایلاشیما گلن لایکلارین سئوینجینی یاشاییرسان.
و یا مرجی شورباسی ایله کارتوف قیزارتماسی یئییرسن، عوضینده اکزوتیک یئمک پایلاشیرسان، قیبطه ایفاده ائد‌ن شرحلری اوخویوب حظ آلیرسان.

خوشبخت‌لیک... آی الله، ندیر بو خوشبخت‌لیک. آها، مثلاً، قاب یوماق. قاب یویاندا استرس آتیرام مثلاً... یونگوللشیرم. خوشبخت اولورام. قاب سونگرینه مایع تؤکورسن، اونو کؤپوکلندیریب بولاشیق نیمچه‌یه سورتورسن، قوروموش یاغ، یئمک قالیقلاری تمیزلندیکجه قلبیم خوش تلاتم یاشاییر. قابلارداکی شامپونو ایلیق سو ایله یاخالایاندا کاتارسیس پروسسی یاشاییرام. قاب یویاندا بینیمین یارادیجی حیصه‌سی ایشلک اولور، گوجلنیر، فیکریم چوخ درین قاتلارا ایشلییر. نه واختسا اوخوموشدوم کی، رومان سوژئتلری آقاتا کریستینین آغلینا قاب یویاندا گلیرمیش. هرچند، "شرق اکسپرسین‌ده قتل" رومانینی یازماق ایستعدادیم یوخدور. اما قاب یوماقلا باغلی حکایه یازماق ایستییردیم. سوژت بئله ایدی کی، قادین قاب یوماغا خصوصی ریتوال کیمی باخیر. اونون تصوورونده قاشیقلار فاللوسلا، گوللو آغ نیمچه‌لر قادین بدنی ایله آسوسیاسییا اولونور. چنگل و بیچاقلار ایسه سادومازوخیزمله. و قادین حیاتینین بوتون معناسینی بوندا تاپیر. نسه بو احوالاتی یازماقدان واز کئچدیم. یئنیدن نئجه خوشبخت اولماق حاقدا دوشونجه‌لره دالدیم.

خوشبختلیک اودور کی، ایشه گلنده ماساندا ساحل ایبراهیمووانین یازدیغی کاغیذ پارچاسینی گؤرورسن.

خوشبختلیک اودور کی، ایمایلی آچیرسان، قادینلارین سئویملیسی و دوشمنی سیمور بایجاندان مکتوب آلیرسان: "سنی تمناسیز سئویرم".

خوشبختلیک اودور کی، سامیره اشرف زنگ ووروب دئییر کی، مربا بیشیریردیم، بیر نئچه بانکا سنه آییرمیشام. البته، مسئله مرباده دئییل.

خوشبخت‌لیک اودور کی، سحر یئمه‌یه هوسین اولمور، ایشه آج گلیرسن، قاپی آچیلیر و قان تورال الینده تزه، ایستی خاچاپوری داخیل اولور، بیرینی ده سنه تکلیف ائدیر.

داها هانسی کیچیک، اهمیتسیز، بانال شئیلری خوشبخت‌لییه چئویره بیلجییمی دوشونوره‌م، ان آبسورد شیلرله اؤزومو متیواسییا ائتمه‌یه چالیشیرام.

ائله بو زامان عالییه لاواش پارچاسینا کارتوف پوره‌سی چکه-چکه دئدی کی، آخیردا هامیمیز یوخا چیخاجاغیق، اؤلجییک: "اؤلوم! نئجه ده یاخشی دوشونولوب".

خوشبختلیک اویدورمالاریم چیلیک-چیلیک اولدو. اکزیستنسیال تنهالیغا و غصه‌یه بوروندوم. اؤزومو ویلیام فریدکینین تریلرلرینه عدالت اوغروندا نتیجه‌سیز مباریزه آپاران پلیسلر کیمی حس ائلدیم...

کولیس. آز

تاریخ
2017.06.01 / 16:38
مولف
Axar.az
شرح لر
دیگر خبرلر

یالاندان بیر یئنی تاریخ قوردولار- حبیب ساسانیان/ شعر

اووچونون اوولاغینا کؤرپه شیکار گلمیش ایدی-نظامی گنجوی / شعر

هر گوله سی اولدوز اولوب پارلایاجاقدیر...شعر

سازدان ساری داریخاجام...شعر

من آخی سئویردیم گؤزله مه لیدیم - شعر

هر کیمین پندیری واردیرسا گرک شورلا یئسین!

ایره‌نمه اؤزوندن، ایلان بالاسی - رامیز رؤوشن/ شعر

شلاله سیگارئتی ائله چکیردی کی...

«آزاد اولماغینا هئی یانارام، وطن» - شعر

اورمو گؤلو باتاندان کیم آغلادی، کیم گولدو... - کریم گول اندام

خبر خطّی
 
  
  
  
  
Axar.az'da reklam Bağla
Reklam
Bize yazin Bağla