Axar.az
یوخاری
24 اوکتیابر 2018


یونگول اؤپوش، اورکک تومار... – ائلخان زالین سئوگی شعرلری

آنا صحیفه ادبیات
12 Punto 14 Punto 16 Punto 18 Punto

آخار. آذ تانینمیش شاعر-ترجمه‌چی ائلخان زالین سئوگی شعرلریندن بیر نئچه‌سینی تقدیم ائدیر:

***

هر سنی دوشوننده دویورام سونسوزلوغو،
هر سنه توخوناندا ابدیت گؤرونور.
یاکاموز سایریشدیران سئوگی اوکیانینین،
ساحلینده قوملارا یازیرام من آدینی.

هر دفعه یاتاغیندان قالخیرام گونش سایاق،
هر گون دوغولمایان عشق اؤلزیین ایشیقدیر.
سن عشقین سماسیندا گزمه بیر آیری معنا،
هئچ بیر شئی گرک دئییل عشقه عشقدن ساوایی.

سئویلمک ایستیی آج یاگواردی

هاوا یومشاق اولور یاغیشدان سونرا،
صحبت قورتارسا دا، قورتارمیر جیغیر.
یاناشی ایز قویان آیاقلاریمیز،
یوغورور تزه‌جه یاز پالچیغینی.

مارال بوینوزودور یئره تاخیلمیش،
انجیر آغاجینین باهار قوخوسو.
سون واختلار باغلاردان دیدرگین دوشوب،
لوتو بیچاغییلا، باندیت قورخوسو.

ییغیر قازانجینی کؤنول بانکینا،
گیزلی گزمه‌میزین اؤپوش قوماری.
بیر سونئت چالدیریر شومانسایاغی،
تورانلی باغلارین آخشام توماری.

هاوا یوپیوموشاق، هیجانی برک،
سئویلمک ایستیی آج یاقواردی.
سنین اورکک-اورکک توخونمالارین،
آخشام سوکوتونو جایناقلا یاردی.

بو سئودا قورتارماز، بو گزمه بیتمز،
نه اولار، قوی گئتسین سونونجو مارشروت.
ایسلاق یارپاقلارین آرالاریندان،
بیزه ال ائلییر دوستوموز بولود.

***

شوشه‌ده کؤلگه وار، قلبیم‌ده سس وار،
بو اوتاق، بو یاتاق خیالدی یوخسا؟
اوستومه یئریگیر سوسقون دیوارلار،
هر شئی یئرینده‌دیر، سن ایسه یوخسان.

کدریم آسیلیب آیاقلاریندان،
کدریم ناله‌لی آنادیلیمدیر.
لیانلی - سؤیودلو عشق پارکلاریندا،
اؤلن خاطره‌لر دیلیم-دیلیم‌دی.

او اؤلن آنلاردا سن یاشاییرسان،
بیر ده یاز، بیر ده من، بیر ده ایکیمیز.
اولدوز گئجه‌لری نور داشیییرسا،
بیز آسان چکیریک هجران یوکونو.

حسرت گونلرینین گؤزلری یاشیل،
حیاتین سونودور حسرتین سونو.
هر سنی آنانندا، خوش موژده قوشو،
دردین دیوارینی دیمدیکله یونور.

آخشام درین، اومای اوزاق

پنجره آردیندا آخشام،
سرین سولاردا سرینلیک،
اورکک بولود ایلخیلاری دیدیک-دیدیک.
سیرالانیب گؤی اوزونه آجیلاردان بیر آلای.
آی، آی،
جان سویودان آی
ساپ ساللاییر قارانلیغا،
بیر آنلیغا مورگو وورارکه‌ن شهر.
کهر کیشنرتی‌سی قولاقلاردا
و اوزاقلاردا بوزقیر کابوسو کاروان.
یوللار گئدیر، دایانیر آن،
گیزلی سما قاپیلاری آچیلیرلار تایباتای،
دیلیم‌ده دعا وار، دعام‌دا اومای.
نئجه محرم‌دیر بو آخشام،
شفقت آی سوکوتونا ایلیشیک.
اویقو قاچیشین‌دا بوزا، دویغو یئریشین‌ده پیشیک.
هزین بیر مؤذن اووقاتی سوکاکلاردا،
و اوزاقلاردا بوزقیر کابوسو کاروان.
منیم آخشام دعالاریم گیریر گیزلی قاپیلاردان.
ائشیت منی ائشیت اومای!
آی، آی،
جان سویودان آی
گیزلی قاپیلار اوستون‌ده فانار.
اولدوز یانار آجی‌سین‌دا دولارین،
اولدوز یانار سککیزقیراق.
آخشام درین، اومای اوزاق.

مارت هسرتی

دیللندیر، دیللندیر سوسموش فلیتانی،
بلکه سؤیودلرین ساچی دارانا
بو سونسوز گئجه‌نین نملی هایتاسی،
دؤنوب دویغولارین درد چیدارینا.

قورتاردی قوشلارین نغمه ساعتی،
پیشیکلر یاتیشیر مارت حسرتینده.
دمیر باشماغینی ییرتان اساتیر،
ایندی نغمه قوشور سحره تین‌ده.

رنگ-رنگ توستولنیر یول ایشیقلاری،
یاشماق‌لی گئجه‌لر اوتان‌جاق اولوب.
ائله بیل قاراچی آلاچیقلاری،
یوخولو صحرادا سهو سالیب یولو.

گئتدی سون آوتوبوس، نیمیش تسللی،
بو، نه یولچولوقدو، مسافیری یوخ.
بیز سازیش باغلادیق دؤولت مثل‌لی،
بس نیه یانیم‌دا بیر سفیرین یوخ.

اوچماغا هوسلی اوزونتولر وار،
گل آچ، کؤنلومده‌کی قارا قایتانی.
هردنبیر نغمه‌سیز قالسام، نه اولار،
دیللنیر، دیللندیر سوسموش فلیتانی.

چیسکین‌لی موزیک

قارا مانتو، آغ اورباشقا،
بو شهرین ناغیللاری
بامباشقادیر، بامباشقا.

داش و بتون مئشه‌سینده،
یاری مخفی بیر کاباره،
شرقی دئییر زکی مورن.

اوستوموزه دامجی-دامجی
آخیر موزیک،
نفته بولاشمیش شهرده،
ان دویغولو آنیلارین
نوتلارینی یازان بیزیک.

کوکتل‌لی صحبتلره ایستی قاتیر
بیر آز قهوه، بیر آز برندی،
دویغولارین دانس چاغیندا
آرالیغا توران ائندی.

تیترک بیر آن،
اوتانجاقلیق سینیریندا
دایانمادان
یانا قویدو قولچاسینی،
بیر آز آچدی قیلچاسینی.

یونگول اؤپوش، اورکک تومار،
چیلپاقلاندی خومار-خومار،
دوداقلار اوستونده بویا،
یاواش-یاواش دؤندو سویا.

کؤنوللری لوغمالانماق،
بوندان شیرین اولورمو یا؟
ایستییرم واخت اوزانسین،
ایستییرم گلمه‌سین سون،
بو قاپینی آچما قارسون،
آچما قارسون.

تاریخ
2017.06.29 / 12:17
مولف
Axar.az
شرح لر
دیگر خبرلر

قولاقلاریندان توستو یوخ، اود چیخدی - حکایه

روزبه سعادتی:شاراب یاساق ایدی، گیزلی ایچردیک

سنین حسرتیندن، سنین بیر دنم!

سن بیر آن یادداشیمدا یادیرغانمادین- -مسعود آذرین

«آللاه سنی باغیشلاماسین گوللو!» - حکایه

قارانلیق بوش چارپایینی ساعت دوققوزو گؤستریر...

عؤمور میوه سینین کالی وار هله-علیرضا میانالی

بعضاً گئتمک ایسته ییرسن …/ افراسیاب نوراللهی

اونودوب تورانی ایگید اَرَنلر، آلیشیب ایرانا "فاذری" دوْغور! - ساسانیان

بئله بیر دیلین اولماسینی اوغرولارا بورجلویوق - ایبراهیم رشیدی

خبر خطّی
 
Axar.az'da reklam Bağla
Reklam
Bize yazin Bağla