Axar.az
یوخاری
17 دکابر 2017


«ائوده‌ن سیچان چیخاران» - سیمور بایجانین حکایه‌سی

آنا صحیفه ادبیات
12 Punto 14 Punto 16 Punto 18 Punto

کولت. آذ سیمور بایجانین «ائوده‌ن سیچان چیخاران» حکایه‌سینی تقدیم ائدیریک.

(اوشاقلار اوچون)

ائوه ساعت ۲۲:۰۰-دان تئز گئتمک منه دوشمور. هر دفعه ۲۲:۰۰-دان تئز ائوه گئدن‌ده خوشاگلمز منزریله راستلاشیرام، نسه آخماق بیر حادثه باش وئریر. اووقاتیم کورلانیر. قانیم قارالیر. اونا گؤره ده ائوه تئز گئتمک‌دن‌سه بولواردا پیادا گزیب تمیز هاوا اودماق، دوستلارلا چایخانادا اوتوروب چای ایچه-ایچه ادبیات‌دان تاریخ‌دن صحبت ائتمک، بیلدیکلری‌می پایلاشماق، بیلمدیکلری‌می اؤیره‌نمک منیم اوچون داها خوش‌دور.

اوچ گون ایدی یاخشی یاتا بیلممیشدیم. یوخوسوزلوق‌دان اذیت چکیردیم. یورغونلوق منی ساعت ۲۲:۰۰-دان تئز ائوه گئتمه‌یه مجبور ائتدی. بیر قیسمات چؤرک یئییب، بیر ایستکان چای ایچیب یاتاغیما گیریب دویونجا یاتماق، یورغون‌لوغومو بده‌نیم‌دن چیخارماق ایستییردیم. لاکین ائوه تئز گئتمیین بو دفعه ده جزاسینی چکدیم. عنعنه پوزولمادی. آنام آستادان دؤیدویوم قاپینی آچان کیمی سلام-کلام‌سیز، حالی‌می سوروشمادان بیرنفه‌سه، هیه‌جانلا دئدی:

- ائوه کری‌سا گیریب. تول پردنی، خالچانی، تئلئویزورون قیراغینی یئییب. ائوی یامان گونه قویوب.

آنام وضعیتین نه قدر دراماتیک اولدوغونو ثبوت ائتمک اوچون علاوه ائتدی:

- آتانین شکلینی ده یئییب. کری‌سا ائوی داغی‌دیر. چیخارا بیلمیرم. نه یاخشی گلدین. پالتارینی دییش، کری‌سانی ائوده‌ن چیخارت.

یورغون، یوخوسوز بیر حال‌دا ائوده‌ن سیچووول قووماغا هئچ هوسیم یوخ ایدی. اوسته‌لیک ده من سیچووول‌دان برک قورخورام. ایلک دفعه سیچووولو باکییا گلن‌ده گؤرموشه‌م. آچیغی سیچووولو گؤرممیش‌دن اول حاقین‌دا ائشیتمیشدیم. ایگیدین آدینی ائشیت، اوزونو گؤرمه. ایلک دفعه باکییا گلن‌ده لئنین پروسپئکتین‌ده دیواردا بئله بیر یازی اوخودوم- "آنار کری‌سادی". بؤیودویوم رایون‌دا سیچوووللار یاشامیردی. سیچوووللار یالنیز بؤیوک شهرلرده، بیر ده دمیریول ایستان‌سییالاری یئرلشه‌ن قصبه‌لرده یاشاییردیلار. اونلار سرنیشین و یوک قاتارلارینا مینیب بوتون اؤلکه‌نی گزیردیلر. بؤیودویوم رایون‌دا دمیریول ایستان‌سییاسی اولمادیغینا گؤره سیچوووللار گلیب بیز طرفه چیخا بیلممیش‌دیلر. من سیچوووللار حاقین‌دا چوخ صحبتلر ائشیتمیشدیم. بیلیردیم کی، سیچوووللار ایستدیکلری یئره دیرماشا بیلیرلر. هارا ایسته‌سه‌لر گیریرلر. هر شئیی گمیریب برباد گونه قویورلار. سرعتله تؤره‌ییب آرتیرلار. ایلک دفعه سیچووولو او واختلار لئنین پروسپئکتی آدلانان ایندیکی آزادلیق پروسپئکتین‌ده اوشاق خستخاناسینین قارشی‌سین‌دا گؤردوم.

برک قورخدوم. قورخ‌سام دا یئریم‌ده دونوب بو یئکه سیچانا باخیردیم. حیاتیم‌دا بو بوی‌دا، بو یئکه‌لیک‌ده، بئله اوزون قویروق‌لو سیچان گؤرممیشدیم. بو رایون‌دا گؤردویوم سیچانلاردان ان آزی اون دفعه بؤیوک سیچان ایدی. سونرالار قارشیما تئز-تئز سیچوووللار چیخماغا باشلادی. سووئت دؤورون‌ده تیکیلمیش ات کومبیناتلاری، چؤرک زاوودلاری، ماغازالار، اون دییرمانلاری سؤکولدوکجه بو اوبیئکتلرده اؤزلرینه مسکه‌ن قورموش سیچوووللار شهره یاییل‌دیلار. هر طرفی سیچووول بورودو. هر آددیم‌دا آدامین قارشی‌سینا سیچووول چیخیردی. سیچوووللار آداملارلا تخمیناً بیر یئرده یاشاییردیلار. یادیم‌دادی ۲۸ آپرئل مئتروستان‌سییاسین‌دا سیچوووللار رئلسلرین آراسین‌دا گزیشیردیلر. قاتار گؤزله‌یه‌ن آداملار سیچوووللارا توم آتیردیلار. ایستان‌سییایا یاخینلاشان قاتارین ایشیقلاری رئلسلرین اوستونه دوشه‌ن‌ده سیچوووللار داغیلیشیردیلار. قاتار ایستان‌سییادان اوزاقلاشدیق‌دا سیچوووللار دلمه-دئشیکلردن چیخیب یئنی‌دن رئلسلرین آراسین‌دا گزیشیردیلر.

آنام دایانمادان دانیشیر، سیچووولو ائوده‌ن چیخارماق اوچون ائله هئی منی تلس‌دیریردی. منی غضبله‌ن‌دیرمک‌دن اؤترو سیچووولون رهمت‌لیک آتامین شکلینی یئمه‌سینی تئز-تئز تکرارلاییردی. سیچووول ائوده خیشیلتی سالدیق‌دا آنام دئییردی:

- ائشیدیرسن؟ یئییر نیی‌سه. ائوی یامان گونه قویوب.

- هاردادی؟

- بایاق خالچانین آرخاسینا گیرمیش‌دی.

بورملنیب ائوین بیر کونجونه قویولموش قیمت‌لی خالچانین آرخاسینا باخدیم. بو خالچانی آنام هله من دونیایا گلممیش‌دن اول آلمیش‌دی. قیرمیزی رنگ‌لی بو خالچانی آنام چوخ ایستییردی. سیچووول قیمت‌لی خالچانین آرخاسین‌دان چیخیب چارپایینین آلتینا گیردی. اونو یاخشی گؤره بیلمدیم. اوزون بیر آغاج تاپیب سیچووولو چارپایینین آلتین‌دا اورا-بورا قوودوم. سیچووول چارپایینین آلتین‌دان چیخیب قاچاراق بو دفعه آنامین ایرانین پایتاختی تئهران شهرین‌دن ساتماق اوچون گتیردیی یومشاق اویون‌جاقلارین آراسین‌دا گیزله‌ن‌دی. آنام برک قیشقیردی. اونسوز دا سیچووول یومشاق دووشان، آیی، شیر اویون‌جاقلارین‌دان بیر نئچه‌سینین قارنینی دئشمیش، بیر نئچه‌سینین قولاقلارینی یئمیش‌دی. ایندی ایسه قزبلنمیش سیچووول اویون‌جاقلارا داها چوخ زرر وورا بیلردی. قولاقلاری یئییلمیش اویون‌جاقلاری هئچ کیم آلمایاجاق‌دی و عائله‌میز خرجه دوشه‌جک‌دی. نه قدر اللش‌سه‌م ده سیچووولو اویون‌جاقلارین آراسین‌دان چیخارا بیلمدیم. ائویمیز چوخ باسیریق ایدی. آنام تئهران‌دان بیر هفته اول گلمیش‌دی. ائوین هر طرفی اویون‌جاقلارلا دولو ایدی. سیچووول آسان‌لیقلا گیزلنه بیلیردی. من برک اسبیلشدیم. آنامین دئیینمیینه فیکیر وئرمه‌یه‌رک پئنجیی‌می چینیمه آتیب سیقارئت چکمک اوچون هئیأته دوشدوم. بینانین قارشی‌سین‌دا سکامیادا اوتوروب سیقارئت چکیردیم. بیزیمله بیر بینادا یاشایان یئنی‌یئتمه‌لردن بیری ده بلوک‌دان چیخیب هئیأته دوش‌دو. یاخینلاشیب سلام وئردی. یانیم‌دا ایلش‌دی. اوردان-بوردان دانیش‌دی. اونون دانیشدیقلارینا رئاک‌سییا وئرمیردیم. بئینیم‌ده "سیچووولو ائوده‌ن نئجه چیخارماق اولار" سوالینا جاواب تاپماق ایستییردیم. یئنی‌یئتمه اونون دانیشدیقلارینا او قدر ده اهمیت وئرمدیی‌می هیسس ائتدی. یالنیز هردن نزاکت نامینه "هه، حیات‌دا بئله شئیلر اولور" دئیه‌رک گویا اونا دقتله قولاق آسدیغی‌می نوماییش ائتدیریردیم. یئنی‌یئتمه دانیشدیغی اهوالاتی یاری‌دا کسیب سوال وئردی:

- معلم، نسه ائله بیل قانین قارادی، نه اولوب؟

دردی‌می کیمله‌سه بؤلوشمه‌لی ایدیم. دئدیم کی، ائوه سیچووول گیریب. ائوی داغی‌دیر. چیخارا بیلمیرم.

یئنی‌یئتمه دئدی:

- آشاغی محله‌ده بیر آرواد یاشاییر. ایکی شیروانا ائوده‌ن کری‌سا چیخاریر.

یئنی‌یئتمیله بیر یئرده آشاغی محله‌یه ائوده‌ن سیچووول چیخاران قادینگیلین ائوینه گئتدیک. یئنی‌یئتمه یولبویو قادین حاقین‌دا خئی‌لی معلومات وئردی. قادینی تانیدیم، اما اونون بئله بیر ایستعدادا، ائوده‌ن سیچووول چیخارماق ایستعدادینا صاحب اولدوغونو بیلمیردیم. اوللر او قادین بیزیم بینادا یاشاییردی. اؤزون‌دن بالاجا یاراشیق‌لی بیر اوغلانا اره گئتمیش‌دی. بیرینجی ارین‌دن دوغدوغو اوشاقلار ایکینجی ارین‌دن دوغولموش اوشاقلارا قاریشمیش‌دی. اونلارین ائوین‌ده چوخ‌لو اوشاق واردی. بو اوشاقلاری یئدیرتمک، گئیین‌دیرمک چوخ چتین ایدی. آنام بیزیم کؤهنه پالتارلاریمیزی بو قادینا وئریردی. من ده هردن کئفیم کؤک اولان‌دا اوشاقلارا ساققیزدان، پئچئنیئ‌دن، کونفئت‌دن آلیردیم. بیرینجی ارین‌دن دوغدوغو چوخ‌لو اوشاقلا اؤزون‌دن بالاجا حدسیز درجه‌ده یاراشیق‌لی بیر اوغلانا اره گئتمه‌سی معجزه ساییلا بیلردی. قادینین ایکینجی اری سؤزون حقیقی معناسین‌دا چوخ یاراشیق‌لی اوغلان ایدی. بو اوغلان ایستسی‌دی شهرین گؤزل قیزلارین‌دان بیری ایله عائله قورا بیلردی. بئله بیر یاراشیق‌لی اوغلانین کیفیر، چوخوشاق‌لی بیر قادینلا ائوله‌نمه‌سی هامینی دوشوندوروردو. اگر قادینین پولو اولسای‌دی بیز اوغلانین اؤزون‌دن یاش‌دا بؤیوک قادینلا بونا گؤره عائله قوردوغونو دوشونردیک. لاکین قادین چوخ کاسیب ایدی. ان ماراق‌لی‌سی اودور کی، بو یاراشیق‌لی اوغلان کیفیر، کاسیب، چوخوشاق‌لی قادینی مؤهکه‌م سئویردی. اونلار بیزیم بینادا تخمیناً ایکی ایل یاشادیلار. سونرا ائولرینی ساتیب آشاغی محله دئدییمیز یئرده ائو آلاراق اورا کؤچ‌دولر. اونلارین یاشادیغی ائوین هئیأت قاپی‌سینی دؤیدوک. قاپینی قادین اؤزو آچدی. وضعیتی ایضاح ائتدیم. قادین منی تانی‌دی. دئدی کی، معلم، من کری‌سانین بیرینی ائوده‌ن ایکی شیروانا چیخاریرام. اما سنین خترینه قیمت‌ده آشاغی دوشره‌م. بیر شیروانا کری‌سانی سنین خترینه ائوده‌ن چیخارارام. رازیلاشدیق. قادین ائوه قاییت‌دی. ایکی دقیقه‌دن سونرا گئیینمیش، حاضر بیر حال‌دا کوچه‌یه چیخ‌دی. بیز اوچوموز گلدیک بیزه. آنام قادینی گؤره‌ن‌ده هئچ نه باشا دوشمه‌دی. من اونا قیساجا قادینین نه ایش گؤرجیینی باشا سالدیم. آناملا قادین سالاملاشیب بیر-بیرلرینه چوخ‌لو سواللار وئردیلر. بوتون قادینلار کیمی اونلار دا عینی واختا بیر نئچه مؤوضودا صحبت ائتمیی باجاریردیلار. قیسا واخت‌دا هر ایکی‌سی بیر-بیرلرینه چوخ‌لو معلومات اؤتوردولر. کیم اره گئدیب، کیم بوشانیب، کیم اوشاق دوغوب. کیم اوشاق دوغماغا هازیرلاشیر... آنام سیچووول‌دان خئی‌لی شیکایت ائتدی. حتی بیر-ایکی دفعه سیچووولا اورک‌دن قارغیش ائتمیی ده اونوتمادی. اوشاق‌لیق‌دا بو قارغیشلاری چوخ ائشیتمیشدیم. قادین پئنجیینی سویونوب ایستولون باشینا آتدی. او ارینین کؤهنه پئنجیینی گئیینمیش‌دی. سیچووولو ائوده‌ن چیخارماغا حاضر بیر وضعیته گلدیک‌دن سونرا اوزومه باخیب یاواشجادان دئدی:

- قونشو، مومکون‌سه، پولو اولجه‌دن وئرردین. بیر-ایکی دفعه ائوده‌ن کری‌سا چیخارمیشام، آداملار پولومو وئرمه‌ییب. اونا گؤره پولو اولجه‌دن آلیرام. سنین خترینه پول‌سوز چیخارارام، پروستو سونرا باشیم آغریییر. ائوده‌ن پول‌سوز کری‌سا چیخاران‌دا بیر هفته باشیم آغری‌دان پارتلاییر.

جیبیم‌دن بیر شیروان چیخاریب قادینا اوزاتدیم. آنام بو آلوئره ماراقلا باخیردی. قادین بیر شیروانی قوینونا سوخوب علینی ائوین کونجونه ییغیلمیش اویون‌جاقلارین آراسینا سوخ‌دو. سیچووول اویون‌جاقلارین آراسین‌دان چیخیب چارپایینین آلتینا گیردی. قادین آشاغی اییله‌رک باشینی چارپایینین آلتینا سوخ‌دو. اوردا دوداغینین آلتین‌دا نسه دئدی. اونون سسینی ائشیت‌سه‌م ده نه دئدیینی اصلا باشا دوشمدیم. دئیه‌سه‌ن قادین نسه قریبه بیر دیل‌ده سؤزلر دئییردی. او بئلینی دیکلدیب آیاغا قالخ‌دی. وس‌سالام دئدی. من اونا سوال وئردیم:

- آخی کری‌سا هله اوردادی. چیخمادی.

قادین دئدی:

- ناراحات اولما. ایندی بو دقیقه چیخاجاق. قاپینی آچیق قویون. چکیلین کنارا.

بیز چارپایی‌دان بیر آز کنارا چکیلدیک. آز سونرا یومشاق آیاق سسی ائشیدیل‌دی. سیچووول چارپایینین آلتین‌دان چیخیب بیر نئچه دفعه برک‌دن اؤسکوردو. او، چوخ برک اؤسکوروردو. او، ائله آغیر اؤسکوروردو کی، بده‌نی اسیم-اسیم اسیردی. اؤسکوریی گوجلندیکجه بوغولماغا باشلاییردی. منه ائله گلیردی کی، اونون سینه‌سی گرگین‌لیک‌دن بو دقیقه پارتلایاجاق. بوتون سینه‌سی توتولموش‌دو. گؤرونور سیچووول برک سویوقلامیش‌دی. سیچووول ژیلئتینین جیبین‌دن ازیک دسمال چیخاریب آغزینا توت‌دو. دسمالین اوزرین‌ده قان لکه‌لری واردی. کؤهنه قان لکه‌لرینین اوستونه تزه قان لکه‌لری ده علاوه اولون‌دو. سیچووولون گؤزلرینین آلتی قارالمیش‌دی. بیغلاری ایسه چوخ سارالمیش‌دی. او، دئیه‌سه‌ن چوخ سیقارئت چکیردی. ساغ قولتوغونون آلتین‌دا قوولوق توتموش‌دو. ائینیینین شوشه‌سین‌دن بیری سینمیش‌دی. سیچووول چوخ‌لو اؤسکوردو. اؤسکوریینی هئچ جور ساخلایا بیلمیردی. او، خیریلداییر، بوغولوردو. اؤسکوره‌ن‌ده آغزین‌دان گلن قانی دسماللا سیلیردی. هامیمیز ساکیتجه دایانیب اونا باخیردیق. قان‌لی دسمالی یومرولاییب قولتوغونون آلتین‌داکی قوولوق‌دان چیخارتدیغی قزئت پارچاسینا بوک‌دو. علینین ایچی ایله آلنین‌داکی تر دامجیلارینی سیل‌دی.

- نیه بوکورسونوز؟

- اونا گؤره کی، هئچ کیم گؤرمه‌سین.

سیچووول بو سؤزلری سؤیله‌ییب یورغون آددیملارلا قاپییا طرف اوز توت‌دو. قاپی‌دان چیخاراق کوریدوردا گؤزدن ایتدی...

تاریخ
2017.07.23 / 20:16
مولف
Axar.az
شرح لر
دیگر خبرلر

اومیدسیزلییمین آغیرلیغین‌دان آنلاییرام - شعر

لمان - یاشی بللی دئییل، بلکه اون اوچ...- شعر

کئچیردیک گئجه‌لرین ایچیندن - شعر

فارس شعیرینین قلیبلرینی داغیدان آذربایجان‌لی

من ایللردیر سندن اوزاقلاردایام...شعر

روسییا ایستانبول زیروه‌سینه بوقدانووو گؤندریر

گونیلی یازیچیدان – حکایه

تبریز آلوولانیب، وطن یانیردی - شعر

مشروطه پارکیندا سئوگیلیم له من...شعر

حکایه - آجی تیریک قوخوسو

خبر خطّی
 
  
  
  
  
Axar.az'da reklam Bağla
Reklam
Bize yazin Bağla