Axar.az
یوخاری
19 نویابر 2017


گؤرسن، اوغلومون اوشاغی گؤی قورشاغینا نه دئیه‌جک؟ - ائلیار

آنا صحیفه ادبیات
12 Punto 14 Punto 16 Punto 18 Punto

کولت. آذ ائلیار پولادین «گؤی قورشاغی» حکایه‌سینی تقدیم ائدیر:

گونون اورتا چاغیدیر. یاز یاغیشی شیدیرغی یاغیر. تله‌سه‌رک ائوه گلیرم. اوست-باشیم تامام ایسلانیب. ایچری گیردیکده، ائله گیره‌جکده اوست پالتاریمی سویونورام. عائله‌م ائوده‌دیر. من ایچری گیرر-گیرمز اوغلوم قاچیر قاباغیما:
-سلام، آتا، آخشام سؤز وئرمیسن بو گون منله توپ اوینایاجاقسان.

من ده جاواب وئریرم:

-اوغلوم، باییردا یاغیش یاغیر، ایندی اولماز. نئینک، یاغیش کسسین گئدیب حیطده سنینله توپ اوینارام.

زامان اؤتور و یاغیش کسیر. اوغلوم دا مندن ال چکمیر. نهایت، بیر یئرده حیطه چیخیریق. هاوا چوخ اور‌یه یاتیملیدیر. یاز یاغیشیندان سونرا هر یئر تمیز و گؤیچک گؤرونور. اورکلره سئوینج پای‌لانیر. کوچه‌دن اوشاقلارین و یئنی‌یئتمه‌لرین های-کویو گلیر. اونلار دا یازین ایلیق هاواسیندان زؤوق آلیرلار. ائله بو آن اوغلوم هیجانلا، بارماغی ایله گؤی اوزونو منه گؤستره‌رک سئوینجله قیشقیریر:

-آتا، آتا، باخ! «رنگین کمانا» باخ، نئجه ده گؤزلدیر!

من ده گؤی قورشاغینا باخدیقدا اوز توتوب اوغلوما دئییرم:

-هه، چوخ قشنگ‌دیر، اما او «رنگین کمان» دئییل، «گؤی قورشاغی»دیر، اوغلوم.

اوغلومون چهره‌سینده اولان تعجبلی حسی دویدوم. او زامان اوغلوم سؤزه گلیر:

-آتا، او، «رنگین کمان»دیر. ائله آنام دا، کوچه‌ده‌کی اوشاقلار دا و حتی باخچامیزداکی معلمه ده اونا «رنگین کمان» دئییر. سن منه یالان دئمزدین، بو گون منی نیه آلدادیرسان؟

منی فیکیر گؤتورور. بو صحبتلر منی بیر آز سارسیدیردی. اوغلوم دا بو حسی دویاراق منه دئدی:

-آتا، نه اولدو، نیه کئفسیز اولدون؟

بو دفعه اوغلوما یالان دانیشدیم:

-اوغلوم، بیر آز باشیم آغریییر. سن بو دفعه گئت کوچه‌ده یولداشلارینلا اوینا. سؤز وئریرم، بیر آزدان گلیب من ده سنله اوینارام.
اوغلوم کؤنولسوز مندن آیریلیب کوچه‌یه گئدیر .

من ده حیطین پیلله‌سینده اوتوروب خیالا دالیرام. ائله او زامانی دوشونوره‌م کی، اوغلوم یاشیندا اولاردیم. گونلرین بیر گونو آنام حیطده دولاشیر و سیل-سوپورله مشغول ایدی. من ده اؤز-اؤزومه نیی‌سه حیطده آختاریردیم. بیردن گؤزوم گؤیده‌کی گؤزل بیر منظره‌یه دوشدو. سئوینه‌رک آنامدان سوروشدوم:

-آنا، او ندیر؟ گؤر نه قدر گؤزلدیر!

آنام گولومسه‌یه‌رک دئدی:

-هه، اوغلوم، او فاطما خالانین حاناسیدیر.

نئچه گون اوستوندن کئچدی. بیر گون آخشاموستو آناملا قونشو حیطینه گئتدیک. ائله آستانادان ایچری گیردیکده حیطده بیر منظره گؤردوم. من گؤیده اولان فاطما خالانین حاناسینی یئرده گؤروردوم. ائله بو آن سئوینه‌رک هیجانلا قیشقیردیم:

-آنا! آنا، باخ، فاتما خالانین حاناسی. نه قدر ده قشنگ‌دیر!

ائله بو آن حانانین یاخینلیغینا چاتمیشدیم. الی‌می حانایا سورتنده گؤزوم یئره باسدیریلمیش آغاجلارا دوشدو. منجه، حنانی آغاجلارا باغلامیش‌دیلار. یئنه آناما دئدیم :

-آنا، باخ، آغاجلارا باغلاییبلار کی، گؤیه اوچماسین، هه؟

قونشو قادین ائوده‌ن حیطه چیخیب آناملا ساغوللاشاندان سونرا من یئنه آنام‌دان سوروشدوم:

-آنا، فاتما خالا بودور؟ نه یاخشی، ائله بیزیمله قونشویموشکی؟

آنام اوجادان گوله‌رک دئدی:

-یوخ، اوغلوم، بو، اسمر خالادیر. بو حانا دا گؤیه اوچماز. اسمر خالا اونو آغاجا باغلاییب کی، اوزرینده گؤیچک ناخیشلار سالا بیلسین. او کی قالدی گؤیدکینه، او دا گؤی قورشاغیدیر . ائله-بئله جاماعات آراسیندا اونا فاتما خالانین حاناسی دا دئییلیر.

من دای دینمدیم. اسمر خالا گلدی اوتوردو و ایشله‌مه‌یه باشلادی. من اونون بارماقلاری و اللرینین حرکتینی ایزلییردیم. او، هر حرکتله بیر بویا ناخیشا آرتیریردی. گؤز اوخشایان ناخیشلار هر آن اؤتدوکجه بیر رنگه دوشور و گؤزللشیردی. اسمر خالا ایشله‌یه- ایشله‌یه حزین ماهنیلار زومزومه ائدیردی. اونون ماهنیلاری ندن‌سه من‌ده بیر نیسگیل و حسرت اویادیردی. ائله ناخیشلاردا اولان اینجه‌لیک و مانینین ملاهتیله منه سئوینج دولو کدر ده باغیشلاییردی.

ایندی یئنه ده او ماهنیلار و ناخیشلار گؤزوم اؤنون‌ده جان‌لانیر و قولاغیمدا عکس-صدا یارادیر. و من دوشونوره‌م کی:
-گؤره‌سن، اوغلومون اوشاغی گؤی قورشاغینی اوندان سوروشاندا هانسی آدلا آدلاندیراجاق؟

تاریخ
2017.11.02 / 17:34
مولف
آیتاج آراز
شرح لر
دیگر خبرلر

کؤلگه‌می قوجاقلایاجاغام... - تبریزلی شاعر

آتامی – آنامی یورسون مین کدر - شعر

آند اولسون گونشه، اودا چیراغا، اوجاغا...

آغریلاریم و قادینیم... - شعر

دویغوسو باکیره بیر قیز…- شعیر

آغالار بیلمه‌دی بیردیر بو تورپاق - ایبراهیم رشیدی

تبریزلی بالاجا یازچیدان حکایه: "دایناسور" - فوتو

صوبحدن قالخیب نماز قیلار قوجالار - شعیر

یئنی سئوگیلر دوغولور آیریلیغین آرخاسیندا - شعیر

منیم اورییم تبریزین آوتوبوسلارینا بنزر - شعیر

خبر خطّی
 
  
  
  
  
Axar.az'da reklam Bağla
Reklam
Bize yazin Bağla