Axar.az
یوخاری
20 اوکتیابر 2018


کیمسه اونا گولمیی اؤیرتمیشدی... - گنج یازیچی

آنا صحیفه ادبیات
12 Punto 14 Punto 16 Punto 18 Punto

کولت. آذ گنج یازی‌چی چیناره عؤمرایین یازی‌سینی تقدیم ائدیر:

هر شئی‌ده گولمه‌یه بهانه آختاران من بو دفعه ساده‌جه دونوب قالمیشدیم. بیر آنلیق ائله بیل ایچیم‌دن گلن سویوق کولک اوزومه ووروب اوشودوردو منی. ائله بیل ایچیمده‌کی قیش اوتاغینین قاپیسی آچیق قالمیشدی، یا دا نه بیلیم ایچیمده هانسیسا سؤز بوز کیمی دوشوب قالمیشدی دوندوروردو منی.

من بئله‌یم ای، الله حاقی. تئز تأثیره دوشوره‌م. بیری بیر سؤز دئسین همین آن اینانیرام. نئینیم ای آداملارا اینانماق ائله خوشوما گلیر کی...واللاه چوخ گؤزل اینانیرام. بئله قشنگ، شیرین، جیققلی. آدام او اینانماغین یاناقلاریندان دارتیب اؤپمی ایستییر.

اؤزوم اؤز اینانماغیمی ائله سئویرم کی. او اولماسا من یاشایا بیلمرم. هر دفعه‌سینده اینانماغی سئچیرم سورا دا هر دفعه‌سینده‌کی کیمی بئله یانیلیرام.
یادیمدادی ننم بیر دفعه دئمیشدی کی، «قیزیم بوتون اینسانلاری سئومک لازیمدی. باخ الله هر بیریمیزی سئوه‌رک یارادیب. اللهین سئوه‌رک یاراتدیغی بیر وارلیق هئچ واخت پیس اولا بیلمز. موطلق اونون ایچین‌ده بیر یاخشی‌لیق واردی. قیزیم اینسانلارا اینانماسان یاشاماق اولماز» . آرواد بو سؤزلری ائله بیل دیرل ایله بئینیمی اویوب یازمیشدی اورا. بو قدر شئی یاشادیم، بو قدر زیبیللیکلردن کئچدیم اما او سؤزلر سیلینمک بیلمیر کی، بیلمیر. سیلینمه‌سی جهنم ای هئچ اوستونه توز دا قونمور. ائله بیل بئینیمین "فورمات دویمه‌سی"دی. هر دفعه‌سینده پیس نسه بیر شئی باش وئره‌نده، آخشامی باشیمی یاستیغا قویوب اؤزومه سؤز وئریرم کی؛ صاباح‌دان دییشه‌جه‌م. صاباح اویانان کیمی ننه‌مین جمله‌لریندن باشقا هئچ نه تاپا بیلمیرم او باشیمدا. او آرواد سؤزون دئمک قایداسین بیلیردی ده. بو گونه کیمی منه نه دئییب جومله به جومله بئینیمده‌دی.

بو گون داها بیر اوغورسوزلوق، داها بیر اینامسیزلیق... هئچ نه‌یه رئاکسییا وئره بیلمیرم. دوستلار دا یانیمدادیر بو دفعه. دانیشیرلار، منی گولدورمه‌یه چالیشیرلار. من ایسه اونون هر سؤزون جدییه آلیرام. گوله بیلمه‌مک ائله پیسدی کی...

بیر دفعه کیرایه قالیردیق. آنام، باجیم، من. ایکی مرتبه‌لی، تاختا بینا ایدی. او بینانی همیشه ننه‌مین بیر قندقابیسی واردی اونا اوخشادیردیم. بیلمیرم نیه. ائله بیل او قندقابینین سیماسی واردی او بینادا. بینا تاختادان اولدوغو اوچون منه ائله گلیردی کی، چوخ یونگولدو. مثلاً: ائله بیلیردیم کی، بابام بو بینانین اوستونه محکم قیشقیرسا بینا داغیلا بیلر. چوخ شوکور قیش گلممیش چیخدیق اوردان.

نیسه، ایکی اوتاقلی ائوده کیرایه قالیردیق. اوتاغین بیرینده آنام، باجیم، من، دیگرینده ایسه ائو ییه‌سی قیزییلا قالیردی. چوخ قریبه قادین ایدی. اونو دا نسه بوجکه (سوسک) اوخشادیردیم. من‌ده اوشاقلیقدان خاصیتدی ندن‌سه نییسه نیه‌سه موطلق اوخشادیرام. یاشلی، آریق، اما جلد قاری ایدی. آریقلیقدان و یاشلیلیقدان دا بئلی بوکولموشدو بیر آز. بینا تاختا بینا اولدوغونا گؤره ائوده چوخلو تاراکانلار اولوردو. بیر گون آناما کیمسه بوجک درمانی وئرمیشدی. آغ رنگ‌ده توز ایدی. آنام اونو بیز قالان اوتاغا سپدی،قاپینی دا باغلادی.گئتدیک ننمگیله. صاباحی‌سی گون گلدیک ائوه. دوشونوردوک یقین هامیسی اؤلوب. بیردن آناما دئدیم: - باخ تاراکانلارا. آغ توزا بولاشمیش حالدا سیرالانیب دیوارین دیبی ایله گئدیردیلر. آنام باخدی-باخدی دئدی : - بونلارا باخ ای ائله بیل سئمنتی بوشالدیب قاییدیرلار. هئچ وئجلرینه ده دئییل.

ندنسه بیاض ننه‌نی (بیزیم ائو صاحبه‌سین) همین تاراکانلارا اوخشادیردیم. ائله بیلیردیم اونا زهرلی درمان دا وئرسن اؤلمز هئچ واخت.

بوردا توالت‌ده اونیتازین اوستونده تاختا رفلر وار ایدی. بیاض ننه او رفلرین اوستونه بورانی (قاباق- کدو تنبل) قویموشدو. یادیمدا ایدی اوست-اوسته اوچ رف ایدی.

هره‌سینده ده بیر بورانی. ایندی دوشونوره‌م کی، اونو توالته نیه قویوبموش کی...

بیر گون باجیم توالته گیرنده قاپینی برک اؤرتموشدو.ائله اوتورماغییلا قیشقیرماغی بیر اولدو.«بئلیمده‌دی !»، «ماما، قویما !»، «بیری ده باشیما توللاندی!»، «ماماا!» دئییب قیشقیریردی. قاپینی آچا بیلمه‌ییب سیندیردیق. داها دوغروسو قاپی اؤزو ائله سینماغا هوسلیدی. آنام بیر آز برک دارتان کیمی قوپدو. گؤردوک باجیم اوتوروب، بورانیلار دا یئرده‌دی هامسی. یازیق قیز اوتوران کیمی بورانیلار بیر-بیر بوینونون دالینا، بئلینه دوشوبموش. طبیعی کی، بیاض ننه باجیمدان چوخ بورانییا حییف‌سیله‌نیردی..

او حادثه‌دن سونرا بیز او ائوده‌ن چیخدیق. باجیم ایسه تام باشقا جور اولموشدو. منیم ایندیکی حالیم کیمی. اونو گولدورمک اوچون نه دئییردیک، نه ائدیردیکسه ائلجه سویوق-سویوق اوزوموزه باخیردی. آدام اؤزو پرت اولوردو. اما گولموردو. دانیشاندا دا ککلییردی بیر آز. اما هئچ گولموردو...
نئجه اؤزونه گله بیلدی بیلمیرم. سونرا آنامگیل قازاخیستانا قایتدیلار. بیرده باجیمی ۳ ایلده‌ن سونرا گؤردوم. کیمسه اونا یئنیدن گولمیی اؤیرتمیشدی...

تاریخ
2017.12.27 / 11:52
مولف
آیتاج آراز
شرح لر
دیگر خبرلر

بعضاً گئتمک ایسته ییرسن …/ افراسیاب نوراللهی

اونودوب تورانی ایگید اَرَنلر، آلیشیب ایرانا "فاذری" دوْغور! - ساسانیان

بئله بیر دیلین اولماسینی اوغرولارا بورجلویوق - ایبراهیم رشیدی

«روس حکیملری» مسلمان حکیملر‌دن آرتیق تحصیل گؤرموشدولر- حکایه

گولوش‌لری حسرت قویورام دوداق‌لاریما - عبادی

ایشله‌ینلرین چوْخو قادیْن ایدی - فرخ جرایدی

پارچالارینی بیر-بیرینه تاخاندا، اونون اوره یی توتولاردی - پورناصح

داریخدیم، گؤزلرینی یوموب گولومسه‌مه‌سینه - شعر

ایللر دیر یاشام ایشیغینی گوزله‌ییریک...

یاغیشی باغرینا باسان گونلرین - یوسف جوادی

خبر خطّی
 
Axar.az'da reklam Bağla
Reklam
Bize yazin Bağla