Axar.az
یوخاری
23 یانوار 2018


قارغا - حکایه

آنا صحیفه ادبیات
12 Punto 14 Punto 16 Punto 18 Punto

کولت. آذ گونی‌لی یازار فیروز رفاهینین "قارغا" حکایه‌سینی تقدیم ائدیر:

هاوا توتولور، آچیلیر. ائشیتدییمه گؤره هفته‌نین سونونا کیمی بئله اولاجاق. یازین بو چاغین‌دا بئله هاوا اینسانا خوش احوال-روحییه باغیشلاییر. یاخشی‌سی بودور کی، صاباح دا بیزیم استراحت گونوموزدور. ایچیمدن فرحله‌نمک گلیر. بیردن بیر سس ائشیتدیم. ضعیف ده اولسا ، قولاقلاریم اونون ایستیقامت‌ده اولدوغونو و اؤلچوسونو آییرد ائده بیل‌دی. پنجردن سس گلیر. بیر ائیوانا باخیرام ، بیر اطرافا. بیر شئی گؤره بیلمیرم. ایوان بوشدور و اورادا هئچ نه گؤزه گؤرونمور. فیکریم سس‌دن یایینماق ایسته‌یه‌نده بیردن بیر کؤلگه سرعتله پنجردن یان کئچیر. بو ایسه منی پنجره‌یه ساری گئتمه‌یه هوسلندیردی. بئش-آلتی مئتر آرالیق‌دا اولان آلچاق دمیر حاسارین اوستونده بیر قارغا اوتورموشدو. اوزو منه ساری ایدی. باغچادا قارغا و قجه‌له‌نین اولماسی و هردن سس کوی سالمالاری منی سئویندیریردی. فیکیرلشدیم بلکه سوسوزدور. بلکه‌ده نرده نین اوستونده اوتوروب منه هؤیوت-هؤیوت باخماسی دا اونداندیر. اونون باخیشی منی بیر آز جین آتینا میندیره‌ن کیمی اولدو. آخی نیه بئله باخیر؟ ائله بیل من اونا بورجلویام. باخیشی هردن مندن قاچیب یانا دؤنوردو. باشیما دوشدو کی، او بیر شئی مندن گیزلتمک ایستییر. پنجردن بویلانیب دیوارا ساری قارقانین باخدیغی یئره باخدیم. گؤردوم قارقانین هؤیوت-هؤیوت باخماسی چاره‌سیزلیکدندیر. دیوارین دیبینده بیر جئویز گؤزومه ساتاشدی. آرتیق هر شئی منه آیدین اولدو. سسین منشایی ، قارقانین نرده اوستونه اوتورماسی و بئله هؤیوت-هؤیوت باخماسی.

ایچیمدن جئویز یئمک فیکری کئچدی. باخدیم جئویز لاپ تزه آغاجدان دریلیب سویولانا اوخشاییردی. قارقایا گؤزوم ساتاشاندا حس ائتدیم کی، او حیرصلی-حیرصلی منه باخیر. من ده اؤزومو الده‌ن قویمادیم. گؤزلریمی دیکدیم قارغانین گؤزلرینین لاپ دیبینه. او باخدی ، من باخدیم،او باخدی ، من باخدیم. نئچه دقیقه ائله بیر- بیریمیزه باخدیق. قارقا دایانمادان منه باخیردی. من ده اوزده‌ن گئدن آداما اوخشامیردیم. گؤز دیکمیشدیم اونون گؤزلرینه. او، هردن یانا باخیب جئویزی سئیر ائدیردی. من ایسه جئویزه باخمادان ، داماغیمدا دادینی حس ائدیردیم. بیلیردیم کی، یئریمدن ترپه‌نسه‌م قارقا قاچاجاق. من ایسه هله‌لیک اونون قاچماغینی ایسته‌میردیم. دوغروسو اونو قورخوتماق نیتین‌ده دئییلدیم. ایستییردیم کی، او جئویزدن ال چکسین. قورخودان یوخ ،اؤز خوشو ایله کؤنولدن. بونا گؤره ده اونا باخیردیم. ایچیمدن بیر حس منه دئییردی کی، قارغادا منیم فیکری‌می اوخویوب. او دا ایستییر من جئویزدن ال چکیم. آخی حیطین باخچاسینده یئکه بیر جئویز آغاجی وار. حسیمیز بیر-بیرینه توققوشوب بیزی بیر یاریشا دوغرو آپاریردی. من اونا باخیرام، او دا منه باخیر. بیلیرم بو بیر یاریشدیر. اؤز-اؤزومه دئییرم سن باخ من باخیم گؤرک کیم اوزده‌ن گئدر.

ایوانا آچیلان قاپینی آچیرام. قارقا اوچمور هئچ ، هله بیر قاریلداییر. جئویزی الیم‌ده حس ائد‌نده گؤردوم قارغا اوچوب اوزاقلاشدی. قلمه آغاجیندا اوتوراندا باخیشیندا بیر آجیق ایله کدری گؤردوم. جئویزی سیندیرماق اوچون اطراف‌دا بیر فایدالی شئی گؤرمدیم. اووجومدا جئویزی سیخدیم. بیر «چارت» سسی چیخیدی. قارقا اوچوب یئنی‌دن نرده نین اوستونده لاپ منیمله اوز به اوزومده اوتوردو. الیم‌ده جئویز ایکییه بؤلونموشدو. یئنه او منه باخدی، من اونا باخدیم. گؤره‌سن من اونون یئرینده اولسایدیم آغلیمدان نه کئچردی. یقین منیم ده الیم‌دن بیر ایش گلمزه‌دی. اونون یئریندن اؤزومو حس ائدیب دوشوندوم اؤز-اؤزومه دئدیم:»او، منیم حاقیم ایدی. اونو الده ائتمک اوچون اوچوب آغاجین یئلده اسن بوداغینا اوتورموشدوم. زحمتله، دقتله بیر یئتیشمیش جئویز تاپیب، زققوم دادینا باخمایاراق اونو قابیقدان آییرمیشدیم . سونرا اونو دیمدییمده دامین اوستونه آپارمیشدیم کی، آجلیغیما سون قویوم . بیلمیرم نئجه اولدو کی، بیردن دیمدییمدن یووارلانیب آشاغییا ساری اوچدو. هله بیلمیرم بو یئکه کیشی هاردان تاپیلدی و منیم جئویزیمه گؤز دیکدی. داها چوخ اونا گؤره آجیغیم توتوردو کی، اونون حیطین‌ده جئویز آغاجی اولا-اولا منیم مالیما گؤز دیکیبدیر.«

ایستدیم ایچینی آریتداییم. بیردن قاریلدادی. اونا ساری باش قالدیردیم. گؤزونون دیبینده بیر آجیق آلوولانیردی. من اونا باخیرام ، او دا منه باخیر. اف-افین زنگی چالیندی. قارغایا باخدیم. جئویزی اونا ساری آتدیم و ایچری گیردیم. بیر نئچه آندان سونرا یئنه پنجره‌یه ساری قاییتدیم. قارغا ایکینجی یارینین ایچینی چیخارتدی و دیمدیله‌دی. سونرا دؤنوب منه باخدی. گؤزلرینین دیبینده بیر اودوش، سئوینج کولیی اسیردی…

تاریخ
2017.12.29 / 14:43
مولف
الشاد یاقوبلو
شرح لر
دیگر خبرلر

منیم آدیم هر قادینین سینه‌سینه یازیلماز - باکیروغلو

میر جلالین حکایه‌لر توپلوسو نشر ائدیلدی - تورکییه‌ده

نئجه شعیر یازیم، تار چالیم بوگون؟

آنارین "یاخشی پادشاهین ناغیلی" کیتابی تورکییه‌ده چاپ اولوندو

یا من هاوالییام، یا هاوا خسته - شعر

دونیانین ان تأثیرلی قیسا حکایه‌سی

حضرتی سولیمان منزیلین قاپیچیسی اولسا…- هنری

اوچدو قارانقوشوم گئتدی گلمزه!

بس شیطان یازیب؟ - حکایه

قونشوموز داتیکونون اؤلدویو گون...- حکایه

خبر خطّی
 
  
  
  
  
Axar.az'da reklam Bağla
Reklam
Bize yazin Bağla