Axar.az
یوخاری
23 اوکتیابر 2018


جلیل مممدقولوزاده - حکایه

آنا صحیفه ادبیات
12 Punto 14 Punto 16 Punto 18 Punto

کولت. آذ جلیل مممدقولوزاده نین "دللک" حکایه‌سینی تقدیم ائدیر:

صادیق کیشینین اون یاشیندا اوغلو مممدولینین گؤزلری آغریییردی. بیر گون اوشاق آناسینا دئدی: -آخی، کربلایی قاسیمین اوغلو احمدین ده گؤزلری آغریییردی. دونه‌ن احمدنه‌ن آرخین کناریندا اوینویوردوق. احمد بورون قانادان اوتنان بورنونو قاناتدی. ائله بورنوندان بیر آز قان آخان کیمی، احمدین گؤزلری یاخشی اولدو. -بالا، گئت سن ده بورنونو قانات! – آناسی مممدولی یه دئدی. مممدولی گئتدی، اوتلارین ایچیندن هامان تیکانلی اوتو تاپدی، سول الی ایله اوتو سوخدو بورنونون دئشیکلرینه، ساغ الی ایله یومروغونو دویوب ووردو سول الینین آلتیندان و مممدولی نین بورنوندان قان باشلادی آخماغا. یاریم ساعت قدرینجه قان آخدی. مممدولی بارماقلاری ایله بورنونون دئشیکلرینی توتدو کی، بلکه قان کسیله، اما قان کسیلمک بیلمه‌دی. آخیری آناسینی چاغیردی. آناسی دخی قانین کسیلمیینه بیر چاره تاپمادی. بو هئینده صادیق کیشی الینده ات سبتی بازاردان ائوه ات گتیردی. اؤورت اوزونو توتدو صادیق کیشییه: -آ کیشی، گل گؤر، مممدولی نین بورنونون قانینا نه چاره ائلییریک – کسیلمیر؛ گل بلکه سن بیر چاره تاپاسان. صادیق کیشی اوغلونون یانینا یئتیشیب، ساغ للینین بارماقلاری ایله یاپیشدی مممدولی نین بورنونون اوجوندان و قویمادی قان آخسین. اما قان بورنونون ایچینده شیشیب، گئنه یول تاپیب باشلادی آخماغا. -آ کیشی، قاچ بازارا – اؤورتی باشلادی اوجا سسله صادیق کیشییه دئمه‌یه. – قاچ تئز اوستا حسینین یانینا. اونون حکیملیک‌ده سرریشته‌سی چوخدو. تئز قاچ اوستا حسینه دئ. یوخسا اوشاغی قان آپارار، ائوین ییخیلار. تئز دورما قاچ و تئز خبر گتیر. صادیق کیشی اللرینین قانینی آرخدا یویوب، اوز قویدو حیتطدن چیخماغا. صادیق کیشی او واخت اوستا حسینین دوکانینا یئتیشدی کی، اوستا بیر موشترینین باشینی قیرخیب قورتاریب، قاناتدیغی یئرلره پامبیق دوزوردو. صادیق کیشی دوکانین قاباغیندا دوروب سلام وئردی. اوستا حسین کیشینی گؤرجک اونو موشتری حساب ائتدی و قولتوق جیبیندن آینانی چیخاردیب توتدو صادیق کیشینین قاباغینا. صادیق کیشی آینانی آلیب و گؤزلرینی یوموب بیر صالاوات ذکر ائتدی و آینانی اول ساغ چینینین، سونرا سول چینینین قاباغینا آپاریب توتدو اوزونون موقالیبینده و گؤزلرینی آچیب سول الی ایله باشلادی قیرمیزی ساققالینی تومارلاماغا و بیر دفعه ده صالاوات چئویریب، آینانی قایتاردی اوستا حسینه و دئدی: -آی اوستا حسین، بیزیم مممدولی نین بورنو قانیییب. نه علاج ائدیریک قان کسیلمک بیلمیر. آرواد منی یالوارا-یالوارا سنین یانینا گؤندریب، بلکه سن بیر چاره تاپاسان. اوستا حسین صادیق کیشی‌دن آینانی آلیب اول اونا تکلیف ائتدی کی، گیرسین دوکانا و اوتورسون سکینین اوستونده. صادیق کیشی دوکانا گیریب اوتوراندان سونرا، اوستا حسین اونون یاویغینا یئریییب ساغ الینی اوزاتدی و صادیق کیشینین بؤرکونو گؤتوروب قووزادی یوخاری. صادیق کیشی آلتدان-یوخاری باخیردی اوستا حسینین اوزونه. اوستا باشینی بولایا-بولایا دئدی: -آخ، آخ، وای، وای! یازیغیم گلیر گونونه، آی صادیق کیشی!!! بیلمیرم سنین آخیرین نه گونه قالاجاق! آی کیشی، یا آدینی ارمنی قوی، خالق بیلسین کی، سن موسلمان دئییلسن، یوخسا اگر موسلمان اولماق ایستییرسن، قارداش، بو موسلمانچیلیق دئییل کی، سن ائلییرسن. کیشی، اوتانمیرسان باشووون توکونو بو قدر اوزادیب قیرخدیرمیسان؟ هله خجالت چکمه‌ییب دئییرسن کی، مممدولی نین بورنونون قانی کسیلمیر؟ او اللهین غضبی‌دیر کی، سنی توتوب. یوخسا هاردا گؤرسنن شی‌دیر کی، بورونون قانی کسیلمه‌یه؟ سنین تک موسلمانلار بوندان دا آرتیق بلایا گیریفتار اولاجاقلار! بو سؤزلری دئیه-دئیه اوستا حسین بالاجا میس قابا سویوق سو تؤکوب، صادیق کیشینین باشینی هر ایکی اللری ایله اوووردو کی، توکلری یومشالسین. صادیق کیشی دینمز-سؤیلمز اوتوروب باشینی ایمیشدی آشاغی. اوستا حسین اللرینی اتکلرینه سیلیب گؤتوردو اولگوجو و باشلادی داشین اوسته چکیب ایتیله‌مه‌یه و سونرا بیر نئچه دفعه ده قاییشا چکیب، صادیق کیشینین باشینی قیرخماغا مشغول اولدو و صادیق کیشییه بئله موعظه ائله دی: -صادیق عمی! موسلمانچیلیغین شرطلری چوخ آغیردیر. آز بیر آدام بو شرطلرین هامیسینی عمله گتیره بیلر. مثلاً، باشی توکلو ساخلاماق هئچ بیلیرسن کی، نئجه بؤیوک گوناهلارین بیری‌دیر؟ اولا بودور کی، باشینی واختیندان-واختینا قیرخدیرمییانین ائوینده هئچ خئییر-برکت اولماز. ایکینجی بودور کی، اینسانا نؤوبنؤو بدبختلیکلر اوز وئرر. من نیه دئییرسن آند ایچیم کی، اوغلووون قانینین کسیلمه مه یی محض تنبئه‌دیر کی، خداون‌دیالم بو گوناهلارین قاباغیندا سنه گؤندریب. مندن سنه وصیت: بیر ده بئله غلطلری ائله مه؛ یازیقسان، فاغیرسان. یوخسا بیر اؤزگه جور بدبختلیک اوز وئرر، دخی سونرا پشیمانلیق بیر یئره چاتماز. اوستا حسین، صادیق کیشینین باشینی قیرخیب قورتاردی. صادیق کیشی بؤرکونو قویدو باشینا، ایکی قپیک چیخاریب اوزاتدی اوستا حسینه و دئدی: -اوستا، الله آتانا رحمت ائله سین. و اوستا حسین پولو آلیب جاواب وئردی: -الله سنین ده آتانا رحمت ائله سین. صادیق کیشی اوز قویدو ائوینه گئتمه‌یه. حیطه گیریب صادیق کیشی گؤردو کی، اوغلونون قانی چوخدان کسیلیب. مممدولی بیر اوزون آغاجدان آت قاییریب مینمیشدی، حیطی او طرفه چاپیردی، بو طرفه چاپیردی و هردن بیر آت کیمی کیشنییردی.

تاریخ
2018.01.10 / 19:26
مولف
الشاد یاقوبلو
شرح لر
دیگر خبرلر

روزبه سعادتی:شاراب یاساق ایدی، گیزلی ایچردیک

سنین حسرتیندن، سنین بیر دنم!

سن بیر آن یادداشیمدا یادیرغانمادین- -مسعود آذرین

«آللاه سنی باغیشلاماسین گوللو!» - حکایه

قارانلیق بوش چارپایینی ساعت دوققوزو گؤستریر...

عؤمور میوه سینین کالی وار هله-علیرضا میانالی

بعضاً گئتمک ایسته ییرسن …/ افراسیاب نوراللهی

اونودوب تورانی ایگید اَرَنلر، آلیشیب ایرانا "فاذری" دوْغور! - ساسانیان

بئله بیر دیلین اولماسینی اوغرولارا بورجلویوق - ایبراهیم رشیدی

«روس حکیملری» مسلمان حکیملر‌دن آرتیق تحصیل گؤرموشدولر- حکایه

خبر خطّی
 
Axar.az'da reklam Bağla
Reklam
Bize yazin Bağla