Axar.az
یوخاری
19 دکابر 2018


بیر فلاکت آنانین جان شیره سیندن سودون اَمدی - عاصیم

آنا صحیفه ادبیات
12 Punto 14 Punto 16 Punto 18 Punto

Kult.az گونئی‌لی شاعر عاصم اردبیلینین "جهننمده بیتن گول" آدلی شعرینی تقدیم ائدیر:

فلکین قانلی الیندن بیر آتیلمیش یئره اَندی
بیر فلاکت آنانین جان شیره سیندن سودون اَمدی
بوللو نیسگیل شَله سین چیینینه آلدی
تای توشوندان دالی قالدی
ساری گول میثلی سارالدی
گونو تک باغری قارالدی
خان چوبانسیز سئله تاپشیرسین اؤزون
یوردوموزا بیر سارا گلدی
بیر وفاسیز یار الیندن سانا گلمز یارا گلدی
بیر یازیق قیز جان اَلیندن جانا گلمز جانا گلدی
گئچه جکده اَلَموت دامنه سیندن بورایا درمانا گلدی
بیر آدامسیز سوری آدلی الی باغلی دیلی باغلی

سوری کیمدیر؟!
سورو بیر گولدی جهننمده بیتیبدیر
سورو بیر دامجیدی گؤزدن آخاراق اوزده ایتیبدیر
سورو یول یولچوسودور اَیری ده یوخ دوزده ایتیبدیر
سورو بیر مرثیه دیر اوخشایاراق سؤزده ایتیبدیر
او کؤنول لرده کی ایتمیش دی ازلدن
اودو گؤزدن ده ایتیبدیر
سوری بیر گؤزلری باغلی اؤزو داغلی سؤزو داغلی
اولوب هاردان هارا باغلی؟!

بوشلاییب دوغما دیارین اوموب البتته یاریندان
ال اوزوب هر نه واریندان
قورخماییب شهریمیزین قیشدا آمانسیز بورانیندان نه قاریندان
گزیر آواره تاپا یاندریجی دردینه چاره تاپا بیلمیر
چوخ سئویر عشقی باشیندان آتا آمما آتا بیلمیر
اووا باخ اووچی دالینجا قاچیر آمما چاتا بیلمیر
ایش دؤنوب لیلی دوشوب چؤللره مجنون سوراغیندا
شیرین الده تئشه داغ پارچالاییر فرهاد اوتورموش اوتاغیندا
تشنه لب قو نئجه گؤر جان وئری دریا قیراغیندا
گؤزده حسرت یئرینی خوشلاییب ایبهام دوداغیندا
وارلیغین سون اثری آز قالیر ایتسین یاناغیندا
سانکی بیر کؤزدو بورونموش کوله وارلیق اوجاغیندا
کؤزه ریر پیلته کیمین یاغ توکه نیب دیر چیراغیندا
بوی آتیر رنج چاغیندا
قوجالیر گنج چاغیندا
بیر آدامسیز سوری آدلی الی باغلی دیلی باغلی!

سوری جان!اومما فلکدن،
فلکین یوخدی وفاسی
نه قدر یوخدی وفاسی او قدر چوخدی جفاسی
کؤهنه رققاصه کیمین هر کسه بیر جوردی اَداسی
او آیاغدان دوشه نی ایستیر آیاغدان سالان اولسون
او تالانمیشلاری ایستیر گونو گوندن تالان اولسون
او آتیلمیشلاری ایستیر هامیدان چوخ آتان اولسون
او ساتیلمیشلاری ایستیر قول ائدرکن ساتان اولسون

نئیله مک قورقو بوجوردور
فلکین نظمی ازلدن اولوب اضداد ایله باغلی
قاراسیز آغلار اولانماز
دره سیز داغلار اولانماز
اؤلوسوز ساغلار اولانماز
گرک هر بیر گؤزله بیر دانا چیرکینده یارانسین
بیری اَنسین یئره گؤیدن بیری عرشه اوجالانسین
بیری چالسین ال آیاق غم دنیزینده
بیری ساحیلده سئوینجی ایله دایانسین
بیری ذیللت پالازین باشه چکیب یاتسادا آنجاق بیرینین بختی اویانسین
بیری قویلانسادا نعمتلره یئرسیز
بیری ده قانه بویانسین
آی آدامسیز سوری آدلی!
ساچلاریندان دارا باغلی!

نئیله مک ایش بئله گلمیش
چؤر گلنده گوله گلمیش
فلکین اَیری کمانینده اولان اوخ
آتیلاندا دوزه دَیمیش
دیلسیزین باغرینی دلمیش
ایری قالمیش دوز اَییلمیش
اونو خوشلار بو فلک ائل ساراسین سئللر آپارسین
بولبول حسرت چکه رک گول ثمرین یئللر آپارسین
قِیسی چوللرده قویوب لیلینی محمللر آپارسین
خسرووی شیرین ایلن ال اله وئرسین فرهادین قامتین اَیسین
باخاراق چرخ زمان نشئه یه گلسین کئفه دولسون
سوری لار سولسادا سولسون
بیری باش یولسادا یولسون

سیقسا بیر اولدوز اگر اولماسا اولدوزلار ایچینده،
بو سما ظولمته باتماز
داش آتان کول باشی قویموش،
داشینی اؤزگه یه آتماز
سن یئتیشسَن هدفه،
اوندا فلک مقصده چاتماز
داها افسانه یاراتماز
سوری آی باشی بلالی،زامانین قانلی غزالی!

سوری بیر قوشدی خزان آیری سالیبدیر یوواسیندان
ال اوزوبدور آتاسیندان
جوجه دیر حیف اولا سود گؤرمه ییب اصلا آناسیندان
او زلیخا کیمی یوسف اییین آلمیر لیباسیندان
بونا قانع دی تنفس ائله ییر یار هاواسیندان
درد وئرن درده سالیب آمما خبر یوخ داواسیندان
آغلاییب سیتقایاراق بهره آپارمیر دوعاسیندان
او بیر آئینه دیر رسسام چکیب اوستونه زینگار
اوندا یوخ قدرت گفتار،
اؤزو چیرکین،دیلی بیمار
گنج وقتینده دل آزار
گؤره سن کیمدی خطاکار؟!
گؤره سن کیمدی خطاکار؟!

تاریخ
2018.11.30 / 09:20
مولف
آیتاج آراز
شرح لر
دیگر خبرلر

گؤزلریمدن آخان شعیر...یعقوب نیکزاد

باشیوا دولانیم ناسا - حکایه

شنگولوم، شؤنگؤلوم، منگولوم...- اوشاق ناغیلی

چک "بابک"ی،"نبی"نی, داغدا دایانسینلار اَر کیمی!

يازا، ياز چرچيوه سينده، قوزئيه قيش دئيلير - شعر

دوست گزیرم اؤزومه، دوست گل، هارداسان - اوشاق ناغی‌لی

حبیب ساهرین وفات گونو....

یالان چولغالاییب بیزیم اؤلکه نی ...

هامی اره گئتمییمی ایستییر، من ایسه…

توخونما سؤزومه توخونما منیم..- شعیر

خبر خطّی
 
Axar.az'da reklam Bağla
Reklam
Bize yazin Bağla