Axar.az
یوخاری
19 دکابر 2018


فرروخ جرایدیدن حکایه: "سس‌سیز قورشون"

آنا صحیفه ادبیات
12 Punto 14 Punto 16 Punto 18 Punto

Kult.az گونئی‌لی یازیچی فرروخ جرایدینین "سس‌سیز قورشون" حکایه‌سینی تقدیم ائدیر؟

اۆشۆتمه جانیْنی بۆرۆمۆشدۆ، آخشام اۆستۆندن اوْنو سارسیْدان قیْزیشما گئجه یاتا بیلمه‌یه‌جه‌گینی اوْنا بیلدیرمیشدیر .

یوْرقانی ایکی اللی باشیْنا کیمی چکیب، آشاغی‌دان ایسه آیاقلاری ایله بالاجا آچیْق قالان یئری توُتدو.
هئچ بیر یئردن یوْرقانین آلتیْنا هاوا گلمیردی، یورقان قالخیْب ائندیکجه فیْسیلتی سسی اوختای‌‌ین یالنیز قالدیْغی اوْتاغی بۆرۆیۆردۆ. سوْیوق تَرین سیلمک اۆچۆن ساغ الینی یوْرقانین آلتیْندا یاواشجا سۆزدۆرۆب ائشیگه چیْخارتمادن، گئجه‌لر یاسدیْغی آلتیْنا قوْیدوغو مندیلی، یوْرقانین آلتیْنا چکدی، اۆزۆنۆ سیلیب مندیلی الینده بۆزۆب ساخلادی.
یوْرقانین آلتیندا هاوا بیتدیکجه یاواش-یاواش اوختای‌ین نفس چکمه‌یی ده آغیْرلاشیردی. یوْرقانی باشیْندان چکیب اوْتاغین ایْلیق هاواسیندا نفس چکمه‌یه باشلادی، اۆشۆتمه‌لرین آردی هله کسیلمه‌میشدی. اوْتوروب یوْرقانی اؤزۆنه دوْلامیشدی آما یئنه‌ده تیتره‌ییردی، دیشلری بیر-بیرینه دیدیکجه تیْق-تیْق سسی وئریردی.
یاریْم ساعته یاخیْن بوُ دورومدا کئچیندی، داها اۆشۆمۆردۆ، باغداشا قوُروب دیزلرینه دیرسکلنمیشدی، آلینی‌نی اللرینین ایچینه آلمیْشدی. کۆچه‌یه باخان پنجره‌دن دۆشن ایْشیغین آلتیْندا ساچیْ‌نین سئیرک اوْلدوغو بللی اوْلموردو.
دۆشۆنجه‌یه دالمیْشدی، گئجه‌نین سس‌سیزلیگینده ۱۲ ایل اؤنجه‌یه هابئله کئچیردیگی ایللرده چکدیگی آجیْلاری دۆشۆنۆردۆ.
۱۳۶۴-اینجی گۆنش ایلی ایدی. هله رادیودان یاییلان آغ، ساری، قیْرمیزی چالارلارین سسی بئینینده چالیْنیردی.
قان‌سیْزلیق لا هموفیلی کئف‌سیزلیگی اوختایی هر آی " قیْزیل آی قوُرقو "سوُ سالدیْریمینا دوْغرو چکردی.
ساواش اوُچاقلاریندان سالدیْریلان بمب‌لارین سسی ایله اوُچاغا قارشیْ آتیلان قوُرشونلارین سسی، باریْت قوْخوسو شهری بۆرۆیردی.
اوختای بوُنلارا باخمایاراق یادیْنا گلندن بَری هر آی یئنی قان بدنینه ووردورماق اۆچۆن قیْزیل آی قوُرقوسوُنا گئدردی.
نئچه ایل بئله‌جه سۆردۆ. آنجاق ۱۳۷۲-اینجی ایلدن نه قدر ساغلیغی اۆچۆن چالیْشسادا سوْنوج تام ترسینه اوْلوردو.
ائله بوُ قیْزیشمالار لا گئجه یاریسی اۆشۆتمه‌لر ده او چاغلاردان باشلامیْشدی. یاواش-یاواش نه‌دن‌سیزجه‌سینه دیش اتلریندن، بوُرنوندان قان آچیْلیردی. دکتره گئدیب دئنه‌مه‌لر باشلاندی؛ سوْنوج قوْرخونج بیر خسته‌لیگه توُتوشدوغونون بللی اوْلونماسی ایدی، اۆسته‌لیک نه‌دنی بللی دئییلدی.
آتالاریْن " سؤز یئرده قالماز " دئیه سؤزۆنۆن گرچک اوْلدوغونو ایندی یاخشی باشا دۆشۆردۆ ۱۸ یاشلیْ اوختای.
اوْنون خسته‌لیگی دیلدن-دیله گزیب قوْهوم-قوْنشولارین اوختای‌دان آرالاندیغینا نه‌دن اوْلوردو. داها باخیْشلار دا اوختایا اوْلومسوز بیر باخیْشا دؤنمۆشدۆ. هر یئرده چیرکین ایشلردن دوْلایی اوْنون بو خسته‌لیگه بوُلاشدیغینین سؤزۆ ایدی.
چکینه-چکینه یوْلداشی ائلنورون دکانینا کئچیب ساچلاری‌نین کسدیریلمه‌سینی ایسته‌میشدی، ائلنور " باغیْشلا دکانا گلنلر اوختای بورایا ساچ کسدیرمه‌گه گلیرسه داها بیزلر گلمه‌یه‌جه‌ییک " دئییب لر. ائله بوُ اۆزدن ساچلارینی کسدیرمک اۆچۆن شهرین باشقا یئرلرینه گئدردی.
یاشامین لاپ ساده ایشلری اوْختای اۆچۆن گئت-گئده چتین‌لشیردی.
ائوده عایله ایچینده بئله آرا-سیْرا اوْختایا آلچاق بیر انسان کیمی باخیْلیردی آتاسی بیر دؤنه آناسیْنا " گَده نه غلط دارتیب بئله خسته‌له‌نیب بیلمیرم، ائششک کؤپک اوْغلو " دئدیکده اوختای‌دا ایسته‌مه‌دن ائشیدمیشدی.
اوختای اؤزۆندن آرخایین اولاراق نه‌دن ' ایدز ' ویروسونا بولاشماسینی هله بیلمیردی.
ائو ایچره قاب-قاشیْقلارینی آییرمیشدیلار، آز سایی‌دا قالان یوْلداشلاری اوختای لا گؤرۆشمکدن چکینیردیلر، قوْهوم لار ایسه کیچیک اوُشاقلارین اؤپمه‌سینی بئله اوختایا چوْخ گؤرۆردۆلر.
ایدز دن چوْخ بوُ کیمی دوُروملار اوختایی سیْخیردی. بیر آن اؤزۆنه گلدی. کئچن گۆنلر گۆنده‌لیک درگی‌لرده یاییلان خبرلر گؤزۆ اؤنۆنده جانلاندی.
دولت ایدز خسته‌لرینین بۆتۆن درمان خرجلرینی قارشیْلایاجاقمیش.
بوُ ایشین آرخاسیْندا ایسه آجی بیر گرچک یاتمیْشدی.
۱۳۶۱-۶۴-اینجی ایللر آراسیْ فرانسه‌دن ایران، عراق، لیبی ایله نئچه اوْرتا دوْغو اؤلکه‌لرینه گتیریلن قانلارین هیو ویروسونا بولانماسی ائله اوْ ایللرده اورتایا چیْخیر. فرانسه‌نین ' مریو ' آدلیْ قوُرومو بوُ اوْلای‌دا سوچلو تانیْنیر. اؤلکه‌لرین نئچه‌سینده خسته‌لیگه بوُلاشانلارین قانلارینی تمیزله‌مه‌گه باشلانیْلیر بئله‌لیک‌له اوْرالاردا بوُ خسته‌لیگین اؤنۆ آلیْنیر. آما نه یازیْق کی وقتی ایله ایرانین ساغلیْق باخانلیْغی بوُ ایشه گؤز یوُماراق ایدز خسته‌لیگین یاییلماسینا نه‌دن اولورلار.
اوختای بوُنلاری دۆشۆنه‌رک اؤسگۆرمه‌گه باشلادیْ. خسته‌لیک گئتدیکجه بؤیۆمۆشدۆ. آرتیْق اؤسگۆرکلرینده قان گؤرۆنۆردۆ.

یوْرغون، فرخ جرایدی

تاریخ
2018.12.05 / 18:31
مولف
آیتاج آراز
شرح لر
دیگر خبرلر

گؤزلریمدن آخان شعیر...یعقوب نیکزاد

باشیوا دولانیم ناسا - حکایه

شنگولوم، شؤنگؤلوم، منگولوم...- اوشاق ناغیلی

چک "بابک"ی،"نبی"نی, داغدا دایانسینلار اَر کیمی!

يازا، ياز چرچيوه سينده، قوزئيه قيش دئيلير - شعر

دوست گزیرم اؤزومه، دوست گل، هارداسان - اوشاق ناغی‌لی

حبیب ساهرین وفات گونو....

یالان چولغالاییب بیزیم اؤلکه نی ...

هامی اره گئتمییمی ایستییر، من ایسه…

توخونما سؤزومه توخونما منیم..- شعیر

خبر خطّی
 
Axar.az'da reklam Bağla
Reklam
Bize yazin Bağla