تبریزین «تراختور» فوتبول کلوبونون ایجراچی دیرکتورو مصطفی آجورلو کلوبون دوشدویو آغیر وضعیته گؤره «سایپا»نین آذربایجانلی باش مشقچیسی علی دایی و تبریزین «گسترش فولاد» کلوبونون صاحبی محمدرضا زنوزیدن یاردیم ایسته‌ییب.

آخار. آذ خبر وئریر کی، مصطفی آجورلو «تراختور» کلوبونون اویون‌چولارینی، خصوصیله ده محمدرضا اخباری و سید آغایینی کماندادا ساخلاماغا چالیشدیغینی بیلدیریب:

«بیز «تراختور»اون زحمتکئش اویونچولارینی کماندادا ساخلاماق ایستییریک، لاکین بونون اوچون معین پروبلملر وار. اومید ائدیره‌م کی، قارشی‌داکی پروبلملر فوتبول ایجتیمایتینین یاردیمی ایله حل اولوناجاق. هامی بیلیر کی، «تراختور» کلوبو آغیر وضعیت‌ده‌دیر،طرفدارلاری دا بو وضعیتدن نیگاراندیر. اونا گؤره ده آذربایجانین غیرتلی اوغلو، قارداشیم علی دایی و «گستش فولاد» کلوبونون صاحبی م. زنوزیدن «تراختور»آ یاردیم ائتمه‌لرینی خواهیش ائدیره‌م».

تبریز کلوبونون رسمی‌سی سؤزلرینین داوامین‌دا بونلاری دئییب:

«م. اخباری بیر نئچه ایل «تراختور»دا اویناییب، ایندی ایسه عسگرلیک خیدمتینی باشا ووروب. آرتیق سابیق کومانداسی «سایپا»یا قاییتمالیدیر. شوبهه‌سیز کی، بو «سایپا» کلوبونون طبیعی حاقی‌دیر، کلوب اؤز سرمایه‌سینی قورومالی‌دیر. لاکین من آذربایجانا خصوصی باغلی‌لیغی اولان علی دایی‌دن خاهیش ائدیره‌م کی، «تراختور» کلوبونون دوشدویو آغیر وضعیتی و یئنی اویون‌چو ترانسفئری قاداغاسی ایله اوزلشدیینی نظره آلاراق، م.اخبارینین تبریزده قالماسینا ایجازه وئرسین».

م. آجورلو «تراختور»اون دیگر اویونچوسو س.آغایی باره‌سیدنده ده دانیشیب:

«گسترش فولاد» کلوبونون صاحبی قارداشیم م. زنوزیدن ده خواهیش ائدیره‌م کی، س. آغایی مؤوضوسوندا بیزی آنلاسین و «تراختور»دا عسگرلیک خیدمتینی باشا وورموش اویونچونون یئنی مؤوسومده کوماندامیزدا قالماسینا شرایط یاراتسین».

«سایپا»نین باش مشقچیسی علی دایی بوندان اؤنجه م. اخبارییه احتیاجی اولدوغونو، اونون «تراختور»دا قالماسینا راضی اولمادیغینی قید ائدیب.

قید ائدک کی، آذربایجانلیلارین سئویملی کمانداسی «تراختور» فیفا-نین قرارینا اساساً یئنی اویونچو جلب ائتمک حقوقونا مالیک دئییل. بونا گؤره ده اویونچولارینی ایتیرمک کلوبا بؤیوک ضرر وورور.