Axar.az
یوخاری


اورييم آغريير - رقیه کبیری

آنا صحیفه کولت
12 Punto 14 Punto 16 Punto 18 Punto

رقیه کبیری

اورييم آغريير

(حکایه)

آااااخ...دئدیم ها دیشیم بتر آغریییر!. قولاق آسمادی کی، دمیر قاپینی اوزومه چیرپاندا، ائله بیل دیشیمین زوغوندان ایلدیریم چاخدی.

کاش ائویمیزده اولاردیم. آنام هئچ اولماسا دیشیمین دیبینه موخک توزو قویارردی. اوشاقلیقدا موخه‌یی دیشیمین دیبینه تؤکنده آغری ایلدیریم کیمی چاخاردی. آمما بیر آزدان کسیلردی. آتام «موخه‌یی بوش وئر» دئییردی. سیگارینین توستوسون سینه‌سینه دولدوروب، دیشیمین دیبینه اوفورردی. آنام؛ «موخک آغرینی کسدی » دئیردی، آتام ایسه« توستو کئییتدی.» دئیردی.

کاش‌کی ایندی بیر چیمدیک موخک توزو اولاردی. دئینه آخی بوردا موخک نه تاپیلاجاق. «سیگار توستوسو دیش آغریسینی قویار!» قارشی سلولدا‌کی قادین دئییردی. او قادیندان چکینمه‌سه‌یدیم، سیگاری‌نین توستوسونو، دیشیمین دیبینه اوفورون! دئییردیم. اؤپسه‌یدی ده اؤپموشدو دا، جانیم چیخمازدی کی، هئچ اولماسا بو دیش‌آغریسیندان اؤلمزدیم.

یوووو...خ اؤپمک‌دن قورخورام. اؤپمک‌دن یوخ کی... بلکه او دا آتیلا کیمی اؤپندن سونرا....

او باجارماز آتیلا کیمی اؤپسون. آیی دئییل کی، کیشی صیفت اولسا دا، قارا بوغدایی، جیلاز، قیسا بویلو بیر قادین‌دیر. گؤیرمیش دوداقلاری، قارایا چالیر. او قدر سیگارا چکیرکی،،سارالمیش دیش‌لری هئچ آغریمیر.

آتیلا ایلا دیش کیلینیکینه گئدنده، آیی کیمی دئییلدی. ادبلی ایدی. مندن قاباق قاپی‌دان گیرمیردی. آسانسوردا منی اؤپرکن «باشیم گیجه‌لیر!» دئدیم. ییخیلماییم دئیه، قولومدان توتوردو. «تئاتر اولدوزو اولاجام، سنین‌له ائولنه‌جه‌یم» دئدی. گولدوم. دئدیم «یئر اولدوزو؟ یوخسا گؤی؟» الیمی سیخدی. او دا گولدو.

آتیلانین اولدوزو سؤنوب. هم یئرده، هم گؤیده. دئدیلر منیم ده اولدوزوم بو گئجه سؤنه‌جک. دان الدوزویلا بیرلیکده سؤنه‌جک. دئدیلر آتیلانین آناسی گله‌جک. آنام گلمز. قویمازلار گلسین. آتیلانین آناسی دئییب منیم اولدوزومو اؤزو سؤندوره‌جک.گؤره‌سن بو آتوشقا چرچیوه‌سینده‌کی گؤیده، اولدوزلارین هانکیسی منیم اولدوزومدور؟ ایچری‌ده گئجه-گوندوز هئچ واخت بللی اولمور! نه یاخشی اؤلمزدن اوّل آداما بیر آتوشقا بویوجا گئجه وئریرلر.

ائویمیزین پنجره‌لری اوتاقلارین ائنی اؤلچوده‌دیر. اولدوزلار، ائله یاخین گؤرونوردو کی، دئییردیم الیمی اوزالتسام اولدوزلاری دره بیلیرم. الیمی یاتاغیمدان پنجره‌یه اوزاداردیم. قولوم قیسا‌ ایدی؛ یوخسا شوشه‌نین دالیسیندان بیر اوووج اولدوز در‌ردیم. ایندی نه قدر بویلانسام دا، الیم هله آتوشقایا چاتمیر. چاتسایدی، بارماقلیقلاردان آسلاناردیم. باشیمی هر طرفه دولاندیراردیم. بلکه اوزاقداکی اولدوزلاری گؤروم. گؤره‌سن هانکیمیز تئز سؤنه‌ج‌ه‌ییک؟ من، یوخسا اولدوزوم!؟ بلکه بیر-بیریمیزه باخا-باخا سؤندوک...!؟

سون آرزومو سوروشسالار «گؤزلریمی باغلامایین» دئیه‌جه‌یم. یووووخ! اولماسا باغلاسینلار، بلکه قورخدوم!

قارشی سلولداکی قادین سیگاری‌نین توستوسونو دیشیمین دیبینه اوفورمه‌دی. منی باغرینا باسدی «قورخما» دئدی. «نئچه ثانیه چکر!». قورخورام، او، قورخونو یادیما سالماسایدی، بلکه قورخمازدیم. آنجاق ایندی کی کیمی جانیم اسردی. بلکه بو تیتره‌مه، دیشیمین آغری‌سیندان‌دی! کاش اجازه وئرردیم قادین سیگاری‌نین توستوسونو دیشیمین دیبینه اوفورردی.

آتیلا دئدی: «قورخما! اینجیتمه‌رم. ایز ده بوراخمارام.» آسانسورداکی آتیلا دئییلدی. گوجلو ایدی، آیی کیمی ایدی. اوشاق‌ ایکن آنام منه سؤیله‌میشدی «آیی‌ قادینی سئویر، اوغورلاییب کاهاسینا آپارار،دابانینی یالایارلار.»

آتیلا دابانلاریمی یالامادی. یاتاقدا اوزو‌قویلو قالمیشدیم. دابانیملا بئلینه چیرپدیم. او آیی کیمی‌ایدی. یاتاغی‌نین یانیندا، میز اوسته تئاتر فستیوالینداکی آلدیغی نیشانی گؤردوم .قویروقلو بیر اولدوزوایدی.الیم قیسا دئییلدی. دیشیم‌ ده آغرییردی، سؤزومو ائشیتمه‌دی. آو آیی ایدی، آتیلا دئییلدی. قویروقلو اولدوز الیمده آغیرلیق ائدیردی. الیمدن آخدی. اونون باشینا دَینده باغیردیم «آغریییر لومپن!».

قاضی دوسیه‌نی واراقلادی «صنعت‌کارسان! شاعیرسن! هر نه‌سن، آنجاق لومپن سن.» دئدی.

هئچ ساققالینا یاراشمیردی لومپن سؤزونو باجارسین. اونا دئمه‌دیم، بلکه آتیلانی آیی کیمی اولاندا گؤرردین!

آتیلانین آناسی هئچ بیلمه دی اوغلو آیی کیمی‌دیر. آغلاییب، ساچلارین یولوب، باشینا چالاندا «سرو بویلو بالام» دئمیشدی.

گؤره‌سن آنام منه نه دئیه‌جک؟ باشینا دؤیه‌جک‌می؟ یوخ باشینا دویمز، همیشه باش‌آغریسی وار. کاش ساچلارین دا یولمایا. ائله دیزلرینه چالاجاق، یاناقلارینی دیده‌جک، بیلیرم. آناسی اؤلنده گؤرموشدوم.

آغا‌ ننه‌م اؤلنده، آتام سیگارینی دالبادال سؤنن سیگاری‌نین کؤزویله آلیشدیرمیشدی. آنام نه دیزلرینه چالمیشدی، نه ده یاناغینی دیدمیشدی. چادراسینی اوزوندن چکدیکده باخدیم، گؤزلری ده یاشارمامیشدی.

آتیلانین آناسی نه باشینا چالاجاق، نه ده اوزونو دیرناقلایاجاق، بیلیرم. بلکه‌ده بیر قدیر آغاجی اکدی حیطینه.

آااااخ....بو دیش آغریسی منی اؤلدوره‌جک. جانیم چیخیر، گؤزلریمدن یاش آخیر.

آتیلانین ائوینده اوزو قویلو دوشمه‌سه‌یدیم بلکه گؤزلرریمین یاشینی گؤروب، آیی‌لیغیندان ال چکردی، منی سئویردی، بیلیرم.

بلکه ایپی بوینوما سالان آدام گؤزلریمه باخاندا، گؤزلری ایسلاندی! گؤره‌سن او آدام کیمه اوخشاییر؟ آیی اولماز یقین، اینک کیمی‌دیر. گؤره‌سن سودا بوغولانلار کیمی اؤله‌جه‌یم!؟ بوغولاندا باغیرا بیلمه‌سم نه ائدیم؟ قوللاریم نئجه اولاجاق!؟ چیگین‌لریمدن آسلاق قالاجاق‌می! ؟ هاودا یارپاق کیمی اسه‌جه‌یم‌می!؟ کاشکی کندیری، بوینوما سالمازدان اوّل، اجازه وئرسین‌لر بیر بوغاز باغیریم.

بیلیرم، کندیر بوغازیمی سیخاندا، قورخسام دا، یاخشی‌کی، قیرتلاغیم توتولاجاق. یوخسا قوسارام آتیلانین آناسی‌نین، اؤنومده دورانلارین اوست-باشینا.

آتیلانین نیشان اولدوزو الیمدن اونون باشینا آخاندا،قان فیشقیراندا، قانلی باشیندان قورخموشدوم، یاتاغینا قوسموشدوم.

کاش گولـله اولایدی. اوره‌ییمه دَییب،آنیسیزین اؤلدورردی. اوره‌ییمه دَیمه‌سه نئجه؟ گولـله آغریسی دیش آغریسی دئییل کی، دؤزه بیلیم. او آغری‌یا دؤزه بیلمه‌رم.

گاز اوتاغینا آپارسالار یاخشی‌دیر. یوخو داواسی وئردیکدن سونرا،کازی اوتاغا دولدورسونلار،اوندا دیشیم­ده ایلدیریم کیمی چاخماز.

آمما، گاز اوتاغینا آپارسالار، آتام کیبریت‌دن قورخار. داها دالبادالا سیقار آلیشدیرا بیلمز. بلکه اوندا گؤزلریندن بیر-ایکی دامجی یاش سوزدو.

الکتریکین ایسه تیتره‌مه‌سی چوخدور. ائله اونسوز دا ساعات‌لاردیر تیر-تیر تیتره‌ییرم. اگر سونگری ایسلاتماسالار دری‌مین یانیق قوخوسو هر یئری گؤتورر. دری‌نین نئجه جیزیلدادیغینی بیر فیلم‌ده گؤرموشم. «یاشیل یول» ایدی آدی. اویونچوسو آیی‌دان دا هوندور‌ ایدی. آمما اوشاق اوره‌کلی ایدی، لومپن دئییلدی.

اگر الکتریکی بدنیمه جالاشدیرسالار، هر یئردن اوّل ساچلاریم یانار. بیر توک تئلی‌نین اود اوسته نئجه قیوریلدیغینی گؤرموشم. برقه باغلاسالار، بیلیرم آنام عؤمور بویو ائوده ایشیق یاندیرماز.

گؤره‌سن کندیری یوخاری چکه‌جکلر، یوخسا آیاغیمین آلتینی بوشاداجاقلار. نه یاخشی خیاواندا جرثقیل‌دن آسیلمیاجام. جرثقیل‌دن آسیلسایدیم، آتام داها خیاواندا آددیم آتمازدی. آنام ایسه بیر ال‌چیم چؤره‌ک آلماغا دا ائشییه چیخمازدی.

منه وئردیکلری گئجه باشا چاتیر. بیر آتوشقا بویو اولدوز، اولدوزلار بیربه‌بیر سؤنور.آنجاق دان اولدوزو، منیم سؤنمه‌ییمی تاماشا ائده‌جک.

آیاق سسی گلیر. کاشکی ایندی دمیر قاپی آچیلسین، « سون ایسته‌یین نه‌دیر؟» دئسین‌لر. «بیر چیمدیک موخک توزو وئرین» دئییرم.

آذر 1389

تاریخ
2016.12.20 / 15:28
مولف
Axar.az
شرح لر
دیگر خبرلر

هوللیوود آکتریساسی حجابا گؤره بو وضعیته دوشدو

صمد وورغون و علی قیلینجلی شاعر - نادیر فوتو

آنا دیلی - شاعرین اوز سسی ایله

تورکون دیلی - شهریار

قوربان اولوم دیلیمه - دیلیم کیمی دیل اولماز

او مشهور اوشاقلاری بئله ده گؤرون - ویدئو

میلیاردرین "کاسپی" مطبعه‌سینی ایجاره‌یه وئردیی - تاریخی سند

تاریخه دامغاسینی وورموش ۱۰ اثر - فوتو

۱۸ مشهورون بیر شعری – جاوید اوچون

کشکه کارلوو ساغ اولاردی و چیرکین... – مشهور فوتوگراف

خبر خطّی
 
Axar.az'da reklam Bağla
Reklam
Bize yazin Bağla