Axar.az
یوخاری


سونونجو ایستانسییا آیریلیق‌دیر، خانیم…

آنا صحیفه کولت
12 Punto 14 Punto 16 Punto 18 Punto

اومید نجاری ۱۹۸۹-جو آپرئلین ۱۵-ده تبریز شهرین‌ده دوغولوب. شعیرلری ایران و آذربایجانین بیر سیرا ادبی درگیلرین‌ده موتعمادی درج اولونور.

آذربایجان یازارلار بیرلیینین گونئی آذربایجان شعبه‌سینین گنجلر اوزره موشاویری، دونیا تورک گنج یازیچیلار بیرلیینین عضوودور. "قوشلار وادی‌سی" شعیرلر توپلوسو ۲۰۱۵-جو ایلده ایشیق اوزو گؤروب و باکی شهرین‌ده «گونئی آذربایجان آنتولوگییاسی» آدلی کیتابی یاخینلاردا نشر ائدیله‌جک.

آخار . آذ اومیدین شئیرلرینی تقدیم ائدیر:

***

قلمی الیم‌دن آلسالار بئله...

گئجه‌لرین قاراسییلا یازارام آدینی بو شهره!

گئجه‌لری الیم‌دن آلسالار بئله،

کول اولوب کؤزومله یازارام آدینی بو شهره!

***

اؤزونو کنارینا سالیب یاتماق

آتماق اؤزونو یوخولارین قوجاغینا

بو شهرین یورغانینی باشینا چکمک

یعنی...

کؤچمک، کئچمک‌دن یاخشی گلیر بو گئجه

نه یاراشیر قارانلیغا بو کؤلگه

کؤلگه‌یه بَی پالتاری گئیدیریر بو گئجه

یاخانی توت و یاخینلاش

یاخینلاش و ال اوزات گوزگوده‌کی دونیایا

گوزگوده‌کی سنین ساچلارینی دارا، بارماقلارینلا

گوزگوده‌کی سنین اللرینی، توت بیر آز

گوزگو، یعنی سس‌سیزلیک‌ده بیر آز اؤزونه دانیش

گوزگوده، نه وارسا دئ اؤزونه

اوزونه وور بوتون اشیالاری سینسین سنلیین

یوخونو یامسیلا

و گؤزلرینی یوم

یوم منیم کیمی

دونیانی یوم اوووجونا یعنی

یعنی نئجه سئویرسن اؤلوم

یعنی نئجه سئویرسن یاشا

گونش، اوتاغین لامپاسییلا یانیب-سؤنر

گئجه‌لر، اولدوزلاریما آدینی وئرمه یینجه پارلاماز

منیمکی‌سی بیر کؤلگه‌دیر گؤوده‌سیندن خبرسیز

منیمکی‌سی بیر پیغمبردیر!

کیتابیندا تانری‌سی، یالقیزلیغی داریخار

گوپه-گوندوز، دئپرئسسییا آدلی بیریسی

گوزگودن منه باخار

بیر اوغلان آسار، خیال پالتاریمی، پالتار میخیندان

و کلمه-کلمه یاتاغیما اوزانار

آچیب-باغلار تئلئفونونو

اونو سئودییمی نئجه سؤیلییمسه دئیه، سیخیلار

هر گونومدور قیامت

آغزیمدا، مانقال‌دیر دیلیم

گؤتور قلمی

باشی بلالیغیمی یاز کاغیذا، سطیرلر آغلاسین

ائله یاز کی، اوزوموز آغ اولسون

کلمه‌لریمی گؤتور باشینا

شعیر دامغاسی وور آلنیما

یا ساغ الینی چک باشیما

آغلیمی، سرچه‌لر اوچسون

ویزاسیز، گؤزلریندن کؤچوب

اوریینه کئچدییم گوندن

بیر گون اولمور کی، کوچه‌نیزدن کئچمه‌یه‌م

***

اؤنومدن کئچیرسن

هر شئی‌دن واز کئچدییم کیمی...

گؤزلریمدن کئچیرسن،

هر شئیه آجیقلی باخدیغیم کیمی...

نئجه توتسام دا دیلیمین اوجوندان سن دوشورسه‌ن یئره،

دوشورسه‌ن...

و مینیرسن باکی شهرینین مئتروسونا...

هر واگونداکی اوتوران قادین سنسه‌ن

اوز-اوزه دوران منیمله،

هر دفعه سن باخیب، اوز چئویریرسن،

هر دفعه سن بوشونا، اومیدلریمه شانس وئریرسن...

گل، نه اولار بو شهرین قایدالارینی پوزما، خانیم!

اورییمین اوستوندن کئچمک اولماز،

او تایا کئچمک اوچون کئچیددن کئچین ایچیمده‌کی سئوگییه.

ییخما اورییمده‌کی آرزو بینالارینی، خانیم، نه اولار...

گل بیر دفعه ده، منیم گؤزلریمدن باخ ساچلارینا،

گل بیر دفعه ده اللریمین یئرینه تنهالیغی یاشا...

هئچ اولماسا، بیر دفعه‌لیک کؤلگه‌م اولوب دوش یئرلره،

بو الیم‌ده‌کی کاغیذدان سیل گؤزلرینی.

سیل مندن باشقا، نه وارسا خیالیندان،

بو ایستانسییا، دئپرئسییادیر، خانیم.

آیاق اوسته میلدن آسلانان تکجه آدیم‌دیر...

جیبیمده‌کی آچارلار دا هئچ بیر قاپینین دئییل،

جیبیم‌ده‌کی پوللار دا هئچ بیر اؤلکه‌ده خرجلنه‌سی دئییل،

قایدالاری پوزما، خانیم...

قاییت و بیر ده باخ، نه اولار!

هاوا ایداره‌سی گون‌ده احوالیمی بولودلودور - دئییر...

گونده سنی گؤروره‌م گونش یئرینه،

سونونجو ایستانسییا آیریلیق‌دیر، خانیم.

آیریل! قایدالاری پوزمادان،

آیریل! هامی آتیب گئدن کیمی...

تاریخ
2016.12.25 / 14:35
مولف
Axar.az
شرح لر
دیگر خبرلر

سهندین «قارداش آندی» درج ائدیلدی

تاریخ ترمینلری لغتی نشر اولوندو

ایلهامه قولیئوایا ایل مراسیمی وئریلیر – ایکی یئرده

حیدر علیئوین واهابزاده ایله تاریخی - شکلی

هوللیوود آکتریساسی حجابا گؤره بو وضعیته دوشدو

صمد وورغون و علی قیلینجلی شاعر - نادیر فوتو

آنا دیلی - شاعرین اوز سسی ایله

تورکون دیلی - شهریار

قوربان اولوم دیلیمه - دیلیم کیمی دیل اولماز

او مشهور اوشاقلاری بئله ده گؤرون - ویدئو

خبر خطّی
 
Axar.az'da reklam Bağla
Reklam
Bize yazin Bağla