Axar.az
یوخاری
23 اوکتیابر 2018


آی بدبختلر، سیزه کولباسا وئرمه‌یه‌جکلر...

آنا صحیفه کولت
12 Punto 14 Punto 16 Punto 18 Punto

«من ضیالی عائله‌سینده دوغولموشام. آتام دا، آنام دا معلم اولوب...»

«کریم دیللیست ضیالی‌دیر، ۴۰ ایلین ژورنالیستی‌دیر»

«زلیمخان یاقوب – دؤورون بؤیوک ضیالیسی...»

«شهریار سؤزقیلینج شاعردیر، ضیالی‌دیر»

«یازیچی رؤشن علیقلم ضیالی، آیدین...»

«سن اوخوموش آدامسان، سن بیلرسن...»

***

آدینین دالینا، یا باشینا «ضیالی»، «آیدین» اتیکئتی یاپیشدیران، هله یاپیشقانی قورومامیش اؤزون هوندوردن آگاه ائد‌ن، یا ولوه‌له‌دن، یا زلزله‌دن بیزیم ده قبول ائتدییمیز نئچه بئله »ضیالی»، «آیدین»، «اینتللکتوال» وار.

فیکیر وئرین، داها چوخ یازیچی و شاعرلردن سؤز دوشنده اونلاری ضیالی کیمی خاطیرلاییرلار، یا دا اونلار اؤزلرینی بئله تقدیم ائدیرلر.

اول قزئتلرین، سونرا تو-لرین، ایندی ده سایت و سوسیال شبکه‌لرین سیریدیغی بو «ضیالیلار» اصلینده کیم‌دیر؟

عمومیتله، بو آدی داشیماق اوچون هانسی »سندلر» طلب اولونور؟

***

بری باشدان دئییم کی، «ضیالی» سؤزوندن هئچ خوشوم گلمیر. اونا گؤره ده بو سؤزو «آیدین» و «بیلگین» سؤزلری ایله اوزلییرم.

اوولکی آیدینلارلا ایندیکی آیدینلار فرقلی.

اول جمعیتین ائلیت و اوخوموش طبقه‌سی «آیدینلار» آدلانیردی. تاریخین ائله بیر چاغییدی کی، اوخوماق و عالی بیلگیلره صاحبله‌نمک ایندیکی قدر راحت دئییلدی. هم مادی مسئله‌لر، هم ده طبقه فرقی ایمکان وئرمیردی کی، هامی اوخوسون. اونا گؤره ده اوخوموش آداملارا «آیدینلار» دئییردیلر.

سونرا جوغرافی کشفلر اولدو، صنایع اینقیلابی باش وئردی و علمی-تخنولوژی ترققی سایه‌سینده هم اینسان، هم ده دونیا حاقدا یئنی اینفورماسییا یاراندی، چوخ حقیقتلر آیدینلاندی.

آیدین اولماق اوچون معلم، پروفسسور اولماغا احتیاج یوخدور.

بیلگین بیله‌ن دئییل، بیلدیینی یایان‌دیر. اما نئجه؟

اوندا بوتون مکتب معلملری آیدین و بیلگیندیرمی؟

آیدینلیق پئشه دئییل. معلمین وظیفه‌سی ایبتیدایی مسئله‌لری اؤیرتمک‌دیر. آیدین ایسه تکجه تدریس ماتریاللارینداکی معلوماتلارلا کیفایتلنمیر، عینی زاماندا بشری حقیقتلره صاحب اولان و اونلاری یایان اینتللکتوال، پراکتیکی نومونه اولان موبارک‌دیر.

او دا معلملیک ائدیر، اما ماتئریال فرقلی‌دیر.

آیدین فایدالی ایستحصالچی‌دیر: اؤیرندیی حقیقتلری هظم ائد‌ن و ایشیقلی دوشونجه ائمال ائد‌ن.

آیدین یاشادیغی دؤورون سیماسی، تاسیر ائدیجی گوجو و هئچ بیر مادی-ایدئولوژی آسیلیلیغی اولمایان ایشیق‌دیر.

او، فرقلی دونیاگؤروشونده اولانلارلا عینی مسافه‌ده دایانیر، حؤرمت و یوکسک ائمپاتییا حیسسینه مالیک‌دیر. دوشونجه موخالیفلرینی تنقید و تحقیر ائتمیر، حقیقتلری فردلره گؤره موختلیف یوللارلا ایضاح ائد‌ن، پراکتیکی گؤستره‌ن کس‌دیر.

چاغین ویجدانی اولمالی، ایدراکی زنجیرلری قیرمالی و اینسانلار آراسینداکی دیوارلاری یوخ ائتمه‌لی.

خبردار و خبرچی اولمالی.

آیدین تکجه هومانیتار معنادا دئییل، عینی زاماندا علمی-تئخنولوژی و سیاسی موستوی‌ده ده اینتللکتوال ایدخال و ایستحصاللا مشغولدور.

او، حقیقتین یانیندادیر، یالانلاری ایفشا ائدیر و دؤورون شعورودور. چؤل‌ده اینسانلار خیرتدک‌لنه‌نده بیلگینین آرخاسیندا گیزله‌نمه‌مه‌لی، اینتللکتین و دوشونجه‌نین اوستونه چیخیب قلبه‌لییه ایشیق توتمالی، اونلارا یول گؤسترمه‌لی‌دیر.

آیدین فردی مادی-معنوی احتیاجلارینی و آرزولارینی جمعیتین وضعیتینه گؤره آیارلامالی و یؤنتمه‌لی‌دیر. او، فرد اولاراق جمعیت‌دیر. تک دئییل. اؤزونو بوتون معنالاردا و بوتون موستویلرده جمعیتی گؤرمک ایستدیی کیمی آپارمالی‌دیر.

آیدین بیر دؤولت‌دیر!

دموکراتییا ایستییرسه، دموکرات اولمالی‌دیر.

اخلاق و ادب مسئله‌لریندن توالئته قدر آرزولادیغی، گؤرمک ایستدیی کیمی داورانمالی‌دیر.

***

یاخشی، بس بیزیم شاعرلر نه ایشله مشغولدور؟

قافییه‌لی شکیلده آردا-آردا دوزسن، یوزو بیر آیدین دئییل.

یاخشی، جیلد-جیلد رومانلی، وظیفه‌لی، عونوانلی یازارلار نه ائدیرلر؟

قارانلیقلارا آیدینلیقمی گتیریرلر؟

اؤیردیرلرمی؟

موطلق اخلاقدان و بشری دیرلردن یئددی کؤینک اوزاق الی قلملیلر ضیالی‌دیر، یوخسا زیانلی؟

هله بیر ائو داواسی دا ائدیرلر، فورصت تاپینجا شیکایتلنیرلر ده.

دونیادان بیر عصر گئریده، حقیقتلردن میلیون آددیم آرخادا.

سن یاخشی قافییه تاپیرسان دئیه، آیدین اولا بیلمزسن.

سن وئرگولسوز اوزون بیر جمله قورا بیلیرسن دئیه، بیلگین دئییلسن.

نه اؤزونوزو، نه ده جاماعاتی آلدادین.

بو اؤلکه‌ده حقیقی دیرینی آلمامیش نئچه اصل آیدین، نئچه بیلگین اولوب، البته، ایندی ده وار.

اونلار نه شاعر، نه یازیچی دئییللر. داها چوخ دقیق علملرله مشغولدورلار.

شعیر-ادبیات ایللوزییا یارادیر.

یوخ، سؤیمه‌یه تلسمه یین، البته، اینسان شعیر ده یازا بیلر، دویغوسال دا اولار، رومانتیک ده. اما سئنتیمئنتال ائموسییا آیدینلیق دئییل، عکسینه، ایللوزییادیر. اینتللکتوال ائموسییا... او ایسه سیزین باجارمادیغینیز شی‌دیر...

خاطره یازین، سئوگیلینیزین گئتمه یینه اوزولون، قافییه‌له‌نین، قوشما-قوشما هجالاشین، اما اؤزونوزه «آیدین» دئمه یین.

اونسوز دا سیزین اؤز طبقه‌نیز وار. فوندا غملی موسیقی قویوب آلایی شؤوقله، تیترک نوتلاردا و خیریلتیلی سسله او شعیرلری سسله‌ندیره‌نلر، سونرا به-بهله بو ایللوزییایا قاپیلیب آغلایان جیجیشلر...

***

قارداشیم، باجیم، یوردوم اینسانی، ال چکین بو ایللوزییادان.

بدبخت آداملار، اویدورولموش کدره آغلاماقدان، سیزلاماقدان، یالانچی حسرت‌دن ال چکین.

یوز گرام عاراق، بیر آزجا پئندیر،

داریخماق، ایضطیراب، تاواندا کندیر...

***

شاعرلر سیزه نه چؤرک، نه ده آراسینا قویماغا بیر دیلیم کولباسا وئره‌جک.

ایشیق علمده‌دیر، باشقا جور هئچ کس،

بیر دیلیم کولباسا دیشله‌یه بیلمز!

تاریخ
2018.01.11 / 22:00
مولف
Axar.az
شرح لر
دیگر خبرلر

هادی باهادوری ایستادیون‌دا مشهور شعری اوخودو – ویدئو

خیابانینین تحقیرآمیز وضعیتده اولان مزاری – ویدئو

مشروطه اینقیلابینین گؤرکم‌لی رهبری-ستار خان

باکی‌دا تورک اولدوزلارینین ایشتیراکی ایله قالا گئجه‌سی

میلان-قدیم اینسان مسکنی-ایتالییادا دئییل تبریزده

ایبراهیم علیزاده آخار. آذ-دا ژورنالیستلری آلداتدی – ویدئو

سن، قارانلیق گئجه‌مین شمعی---میلاد عزیزی

ایمپرییا ایداره ائد‌ن آذربایجان‌لی آریستوتل - تاریخ

بو گون آذربایجانین دؤولت موستقیل‌لیگی گونودور.

آرگنتینادا تدبیر: «ساری گلین» سسلندیریلدی - فوتو

خبر خطّی
 
Axar.az'da reklam Bağla
Reklam
Bize yazin Bağla