Axar.az
یوخاری
20 یانوار 2018


اؤلوم سحردن باشلاییر... - ساری جنت ـ حکایه

آنا صحیفه کولت
12 Punto 14 Punto 16 Punto 18 Punto

کولت. آذ اومود نجاری نین «ساری جنت» حکایه‌سینی تقدیم ائدیر:

قوناقلیقدان قاییدیردیم، گئجه ایدی، باشقا گونلردن فرقلی اولاراق اؤزومو یاخشی حیس ائدیردیم. مترونون «نفتچی لر» ایستانسییاسین‌دان چیخان‌دا اؤز-اؤزومه فیکیرلشدیم کی، نه زامان بیر ماشین آلیب، بو لعنته گلمیش باساباسدان قورتولاجام...

تله‌م-تلسیک ده اؤزومو دانلادیم، ساغلام اولدوغوم اوچون، آیاقلاریمین اوستونده گزه بیلدییم اوچون اللها شوکور ائتمه یی و ناشوکور اولماماغی خاطیرلادیم.

پئنجه ییمین دؤش جیبیندن سیقارت چیخاردیم، یاندیرماق ایستییردیم کی، آغساققال بیر کیشیله قارشیلاشدیم. کاسیب گئییملی، نیمداش گؤرکه‌ملی کیشینین باشیندا توخوما پاپاق واردی.

- قارداش اوغلو، لیمون ساتیرام، درمانسیز لیمون، بئش دنه‌سی بیر مانات.

- دوغرودان درمانسیزدی، عمی؟

- البته، قارداش اوغلو!

گولومسه دیم.

- بئش دنه‌سینی وئر یئییم، تضییقیم دوشسون، گئجه‌نی راحت یاتیم، - دئدیم.

تئز کؤهنه و قیریش پئنجه یینین جیبیندن بیر سئللوفان توربا چیخاردی، ایچینه بئش لیمون قویوب منه وئردی. یول بویو کیشینین «درمانسیز لیمون» تبلیغاتینی دوشوندوم. اینسان عؤمرونون قیسالماسی، طیببه معلوم اولمایان، موعالیجه‌سی هله ده تاپیلمایان بیر چوخ خسته‌لیکلرین دایانمادان آرتماسی، اینسانلارین طبیعی محصوللارا موختلیف کیمیوی قاتیشیقلار قاتیب ایستحصال ائتمه‌سی باره‌ده کیفایت قدر معلوماتی اولان بیری کیمی طبیعی کی، بو تبلیغاتا اینانمامیشدیم. بوتون یئدیکلریمیزین ایچینده «درمان» وار، بونو بیلمه‌ین وارمی گؤره‌سن؟!

ائوه چاتان کیمی اینیمی سویونمادان لیمونلاری ایچینده بیر قاب ایچمه‌لی سودان ساوایی هئچ نه اولمایان سویودوجویا قویدوم. پالتارلاریمی دییشیب اوزاندیم و تلفونوم‌دا نرد اویناماغا باشلادیم، او قدر یورغون ایدیم کی، یوخویا نه زامان گئتدییمی بئله حیس ائتمدیم.

بیر نئچه گون سونرا، گئجه ساعت اون بیر اولاردی، دوستوم گیلدن چیخیب ائوه گلیردیم، هاوا چوخ سویوق، هم ده کولکلی ایدی، اوشویوردوم. آددیملاریمی ایری-ایری آتیردیم. مترونون چیخیشیندا قولاغیما همین آغساققالین سسی گلدی: «لیمون... لیمون... درمانسیز لیمون... بئش دنه‌سی بیر مانات!»

آغساققال داش پیللکه‌نین اوستونده چؤملیب اوتورموشدو، اللرینی پئنجه یینین جیبینه سالمیشدی، گؤرونور، اوشویوردو. قارشیسینداکی بالاجا کیسه‌ده لیمونلاری سارالیردی... قوجا دوز اوزومه باخیردی.

تئز اونو قاباقلاییب دئدیم:

- سلام، عمی، یورولمایاسان!

- سلام، قارداش اوغلو، نئجه‌سن؟ درمانسیز لیمون وئریم سنه؟

- وئر، عمی، وئر. اما درمانسیز اولسون، ها! آپاریم یئییم، تضییقیم دوشسون، یاتیم، - دئدیم و گولومه سدیم.

آغساققال چئویک حرکتله کیسه‌دن بئش دنه لیمون گؤتوروب توربایا قویدو، منه اوزاتدی.

ائوه چاتیب قاپینی آچاندا ساعت تخمیناً اون ایکی ایدی، مترونون بو ساعتلاردا باغلاندیغینی، آغ ساققالین دا لیمونلارینی ییغیشدیریب ائوینه گئتدیینی دوشوندوم. ندنسه، منه ائله گلدی کی، اونون ائوی هارداسا بو یاخینلیقدادی. یقین ائوینه چاتمیش اولار...

ائوه گیردیم، سویودوجونو آچیب آلدیغیم لیمونلاری دوزدوم او بیری لیمونلارین یانینا…

پالتاریمی دییشدیم، اینترنت‌ده لیمونون فایدالی خصوصیتلری باره‌ده معلومات آختارماغا باشلادیم، بو حاقدا چوخلو یازی وار ایدی. قیدالانما اوزره موتخصیص لرین فیکرینه گؤره، لیمون یولوخوجو خسته‌لیکلره، زهرله‌نمه‌یه و آغیز قوخوسونون آرادان قالدیریلماسینا قارشی افکتیو سیتروس مئیوه‌سی‌دیر. لیموندان درینین پارلاق اولماسی، ائله جه ده بدنده‌کی سیزاناق و لکه‌لرین تمیزله‌نمه‌سی اوچون ده ایستیفاده ائدیلدیین اؤیرندیم. سن دئمه، لیمون چوخ یوکسک تضییقه قارشی موباریزه آپارماق و قان تضییقینی قایدایا سالماقدان باشقا هم ده گوجلو آنتی-دپرئسانت ایمیش، ایسترسه و عصب پوزونتولارینا قارشی موثبت تأثیر گؤستریرمیش...

هر گون لیمون آلیردیم، سویودوجو لیمون باغی کیمی، گون به گون دولوردو لیمونلا...

بازار گونو، آخشام اوستو، تزه آلدیغیم قزئتی ورقله‌یه-ورقله‌یه مترونون پیللکه‌نلرینی قالخیردیم. لیمون ساتان امینین همیشه دایاندیغی یئره چاتاندا باشیمی قالدیردیم. گؤردوم، لیمونلار کیسه‌ده یئرده‌دیر، اما آغ ساققال یوخدور.

قزئتی بوکوب، لیمونلارین کناریندا، داش پیللکه‌نین اوستونده اوتوروب گؤزله‌مه‌یه باشلادیم.

۱۰ دقیقه ایدی کی، گؤزلییردیم، اما آغساققالدان خبر یوخ ایدی. یاواش-یاواش نیگارانچیلیق حیسسی کئچیریردیم، آغساققالین گلیب چیخماماسی منی ناراحات ائتمه‌یه باشلاییردی. «درمانسیز» لیمونلارا باخا-باخا دوشوندوم، نه یاخشی بورادا اوتورموشام، لیمونلارینی اوغورلایا بیلردیلر. عمییه آز دا اولسا، فایدام توخوندوغونو حیس ائتمک ایچیمی راحاتلاشدیریردی.

بیردن آرخادان عمی نین سسینی ائشیتدیم: «قارداش اوغلو، لیمون وئریم؟»

دؤنوب گئرییه باخدیم، منی تانیدی.

- سلام، عمی!

- سلام، قارداش اوغلو، نئجه‌سن؟

- یاخشییام، چوخ ساغ اولون!

- یئنه لیمون وئریم، تضییقین دوشسون، یاخشی یاتاسان؟

- بلی، عمی!

لیمونلاری توربایا ییغا-ییغا «گلین... درمانسیز لیمونا گلین... بئش دنه‌سی بیر مانات!» دئییردی.

- عمی، بونلار حقیقتن درمانسیزدی؟

- درمانسیز اولماسایدی، سن گونده آلاردین، بونلاری؟

اوزونه باخدیم، گولومسه دیم:

- دوغرو دئییرسن، عمی، اینانیرام!

آغساققالین گؤزلری دولدو، کؤورک سسله دیلله‌ندی:

- کاش کی، تکجه لیمونلار درمانسیز اولایدی!

عمی مندن اینجیمیشدی دئیه‌سن، کؤنلونو آلماق اوچون ناتوان‌دان بیر بیت سؤیلدیم:

- یا طبیب، آدینی ترک ائیله، طبابت ائتمه،

یا منیم دردیمی تاپ، گؤر نیه طوغیان ائتدیم؟

عمی نین گؤزلریندن یاش گیللنیب یاناقلارینا سوزولدو…

سؤیله دییمه کور-پشمان اولدوم، کاش کی، بو گون بورادا دورماسایدیم، بیرباشا ائوه گئتسه ایدیم. عمللی-باشلی پرت اولموشدوم.

- نه اولدو، عمی؟ اینجیدین مندن؟

- یوخ... نیه اینجییم؟..

عمی نین کؤنلونو آلماق و بو خوشاگلمز وضعیتی دییشمک اوچون تئز دیللندیم:

- هه… عمی، یادیما ایندی دوشدو، قونشویا دا لیمون آلاجاقدیم، ایکی ماناتلیق دا لیمون وئر.

- دوغرو دئییرسن؟

- هه، ایکی ماناتلیق دا وئر!

پئنجه یینین جیبیندن باشقا بیر توربا چیخاریب، اون دنه لیمون ساییب قویدو ایچینه و دئدی:

- بو درمانسیز لیمونلاری گؤرورسن؟ بونلار منیم دردیمین درمانی‌دیر! تک یاشاییرام، ام اس (داغینیق سکلئروز) خسته لییم وار، بو لیمونلاری ساتیب، هر گئجه آپتئک‌دن ایکی دنه حب آلیرام.

لیمونلاری الیمه وئره‌ن‌ده علاوه ائتدی:

- قارداش اوغلو، درماندیر هر کسه بو درمانسیز لیمونلار!

آغزیمی عمی نین قولاغینا یاخینلاشدیریب یاواش سسله سوروشدوم:

- عمی، سیقارئتین وارمی؟

- وار...

- بیر گیله وئر او زامان...

- باش اوسته، اما حکیملر دئییر، هر سیقارئت عؤمروموزو ۲۰ دقیقه آزالدیر.

- او زامان ایکی گیله وئر...

عمی ایله ساغوللاشدیم، سیقارئتلردن بیرینی گؤتوروب داماغیما قویدوم و یاندیردیم.

آددیملاریما، داها دوغروسو، آیاقلاریما باخا-باخا یئرییردیم. هم ده دیلیمده زومزومه ائلییردیم «…طبابت ائتمه، یا منیم دردیمی تاپ، گؤر نیه طوغیان ائتدیم؟» ناحاق یئره امینی اینجیتدیم... هاردان یادیما دوشدو بو بیت آخی؟ آغساققالین محرمینی، سیررینی اؤیرنمیشدیم، اوره یینین حساس سیمینه توخونموشدوم…

ائوه چاتار-چاتماز تئز سویودوجونون یانینا گئتدیم، قاپیسینی آچاندا، لیمونلارین خوش عطری ائوه دولدو. جنت قوخوسو وئریردی… دریندن نفس آلدیم کی، بو بیهوش ائدیجی عطیر جییه رلریمه دولسون!

بو زامان بیر نئچه لیمون سویودوجودان دیغیرلانیب یئره دوشدو.

داها یئر قالمامیشدی سویودوجودا. اییلیب یئردن لیمونلاری گؤتوردوم و یئنی‌دن دوزمه‌یه باشلادیم، سو گرافینینی ده چیخاردیم، تزه آلدیغیم لیمونلاری دا اونون یئرینه قویدوم.

یاتاغیما اوزاندیم. چوخدان‌دیر بیتیره بیلمه دییم «اؤلوم سحردن باشلاییر» کیتابینی یاستیغیمین آلتیندان گؤتوروب قاتلادیغیم صحیفه‌دن اوخوماغا باشلادیم. لیمونلاری آلاندان بری هر گئجه یاخشی یاتیردیم!

اما ندنسه، او گئجه سحره دک یوخوم گلمه‌دی.

تاریخ
2018.01.12 / 18:07
مولف
Axar.az
شرح لر
دیگر خبرلر

تسللی تاپدیغیم شرابا گؤره....شعر

نوه‌سی ایستالینی بئله بیابیر ائدیر - فوتو

«بو شهرده»نین ایللر اؤنجه چکیلمیش - فوتوسو

سادلؤوه‌دن فای‌دالانماق اوچون... - "حاکمیتین ۴۸ قانونو"

چینیمه بیر یارپاق قونور آستاجا...شعر

سئوگیلی اوچون زامان - جاویدان

۲۰ مینلیک قوشون خوجالینی آزاد ائدیب - مممدزاده

دوستلارا حدسیز اینانما، دوشمن لردن... - روبرت قرین

آشیق ووقارین زولفییه ایله ائفیره گئتمه‌یه‌ن سون دوئتی - ویدئو

اونو شاعر یازمیر، الله یازدیریر...شعر

خبر خطّی
 
  
  
  
  
Axar.az'da reklam Bağla
Reklam
Bize yazin Bağla