Axar.az
یوخاری
19 سئنتیابر 2018


«آنا دیلیمیزی اؤیرنسک، بونون ایرانا فایداسی اولار»

آنا صحیفه رپورتاژ
12 Punto 14 Punto 16 Punto 18 Punto

یئنی تحصیل سیستمینین باشلاماسی ایله علاقدار اولاراق آنا دیلی ایله باغلی اولان موصاحیبه‌لرین داوامی اولاجاق:

گونئی‌لی یازار فرروخ جرایدینین ایراندا آنادیللی تحصیله قویولموش قاداغا و باشقا مسئله‌لرله باغلی آخار. آذ-ا وئردیی مصاحیبه‌نی تقدیم ائدیریک:

- درس ایلی باشلاییر. آنا دیلینده تحصیلین اولماماسینا گؤره باش توتان اعتراض آکسییالاری، کامپانییالار نتیجه وئره‌جک؟

- هله کی، بو ایل مکتبلرده آنا دیلینده تحصیلین اولوب-اولماماسی ایله باغلی خبر یوخدور. بو، باش توتان اعتراضلارین نتیجه‌سیز قالدیغی آنلامینا گلمیر. ایندی ایران مکتبلرینده «آزاد درس» دئیه بیر بؤلوم وار. آنا دیللرینی سئون معلملر بو بؤلومده شاگیردلردن آنا دیلینده یازماغی ایستییرلر. سؤزسوز کی، بو بالاجا صحیفه‌یه آلدانمایاجاق، ایستکلریمیزدن ال چکمیجییک.

دونیانین هر بیر یئرینده اینسانلارین اؤز دیللرینده یازیب-اوخوما حاقلاری وار. سؤزسوز، دیلیمیزی قورومالی، اینکیشافینا تؤهفه وئرمک اوچون آنا دیلیمیزی اوخویوب-اؤیرنملیییک.

- میللتلرین فارس دیلی ایله یاناشی، آنا دیلینده ده تحصیل آلماسی ضروری دئییل؟

- منجه، فارس دیلی ایله یاناشی آنا دیلیمیزی اؤیره‌نمک فارس دیلینی داها یاخشی باشا دوشمه‌یه یاردیمچی اولار. بیز قانونلار چرچیوه‌سینده آنا دیلیمیزین مکتبلرده تدریس ائدیلمه‌سینی ایستییریک.

- آنا دیللی مکتبلرین اولماسی ایله باغلی هر هانسی تدبیرلر کئچیریلمدیی تقدیرده، شاگیردلرین اؤز دیللرینین خیردالیغینی بیلمه‌سی اوچون هانسی تدبیرلر گؤرولمه‌لیدیر؟

- میللت وکیللرینه، دؤولت آداملارینا چاتدیردیغیمیز ایستکلردن ال چکمه‌ییب، ایسرار ائتملیییک. دیلیمیزین قانونلارینی دوغولدوغوموز آندان بیلیریک. مثلاً، هئچ بیر آذربایجان تورکو «گول» سؤزونه «لر» عوضینه «لار» جمع شکیلچیسینی قوشماز. «گوللر» دئیر، بونون سببینی بیلمه‌سی اوچون ایسه آنا دیلی حاقیندا تعلیم کئچمه‌لیدیر. بو ایمکان ایسه هله کی، مکتبلرده یوخدور. عائله یاشامین تمل داشی اولدوغو کیمی، تعلیم ده تحصیلین تمل داشی ساییلیر. منجه، آزی آتا-آنالار درسلیکلری آلیب اوخوماق، هابئله، معاصر چاغین یاراتدیغی ویرتوال دونیادان یارارلانیب، گله‌جک نسیل اوچون دیلیمیزی یاشاتمالیدیرلار.

- ایران‌دا شاگیردلره آنا دیلینده تحصیلین وئریلمه‌مه‌سینه سبب کیمی، اونلارین ائولرینده آنا دیلینده دانیشدیقلاری، فارس دیلینی ایسه یالنیز مکتبده اؤیره‌نه بیلجکلری گؤستریلیر. بو آیری-سئچکیلیین کؤکونده هانسی سببلر یاتیر؟

- اوزون ایللردیر ایران‌دا «بیر دین، بیر دیل، بیر میللت» سیاستی یورودولور. گؤرولن تدبیرلر فارس دیلیندن باشقا، دیگر دیللری آرادان قالدیرماق مقصدی داشیییر. یوز ایلدن آرتیقدیر بو حرکات باشلاییب. تأسف کی، اؤلکه‌نین بو سیاستی بیر چوخ بؤلگه‌ده مثبت نتیجه وئریب.

- Axar.az سایتی ایران‌دا تورک دیلینین اؤیرنیلمه‌سینه نه درجه‌ده یاردیم ائده بیلیر؟

- Axar.az سایتینین دونیا گونده‌مینی، حادثه‌لرینی، خصوصیله آذربایجانلا باغلی خبرلری آنا دیلیمیزده درج ائلمه‌سی دیلیمیزین اینکیشافیندا اؤنملی ایز بوراخیب. اما Axar.az، هابئله، اونونلا یاناشی دیگر سایتلار دیلیمیزده تاپماجا، ناغیل، آتالار سؤزلرینی آنیماسییا کیمی اوخوجولارا تقدیم ائدرلرسه، مدنیتیمیزی قورویار، اوشاقلاری داها چوخ دیلیمیزه، ادبیاتیمیزا ساری چکه بیلرلر. سؤزسوز، بو، آغیر پروسئس‌دیر. بو یولدا هر کس ال-اله وئریب، یاردیم ائتمه‌لیدیر.

تاریخ
2018.09.12 / 17:15
مولف
آیتاج آراز
شرح لر
دیگر خبرلر

ایران‌دا بونا گؤره حاقیمیزی قورویا بیلمیریک - ۲ سبب

ایران‌دا مکتبلره گئدیب، بونلاری چکمک لازیمدیر»

آمریکانین ایرانی تجرید سیاستی: رگیونو نه گؤزلییر؟

خبر خطّی
 
Axar.az'da reklam Bağla
Reklam
Bize yazin Bağla