Axar.az
یوخاری
16 دکابر 2017


ایران‌ نیه سوسور؟

آنا صحیفه یازارلار
12 Punto 14 Punto 16 Punto 18 Punto

آمریکا حربی هاوا قوه‌لرینین سورییادا شعیرات هاوا بازاسینا ائندیردیی راکت ضربه‌سی بیر چوخ عرب اؤلکه‌لری و آوروپا بیرلییی عضولری طرفیندن دستکلنسه ده، ایران و روسییا طرفیندن شدتله پیسلنیب.

آمریکانین هجوموندان بیر نئچه ساعت سونرا ایران بو حادثه‌یه اؤز اعتراضینی بیلدیرسه ده، هله ایندییه قدر جدی بیر آددیم آتماغا سعی گؤسترمه‌ییب. بو مسئله‌دن بئله آیدین اولور کی، ایران رسمیلری هللیک احتیاط‌لی داورانماغی اوستون توتور. بیر جوخ سیاسی شرحچیلرین فیکرینجه، ایران و روسییا، آمریکانین آتاجاغی نؤوبتی آددیمین هانسی فورمادا اولاجاغینی تخمین ائده بیلمدیی اوچون نئجه رئاکسیون وئرجکلرینی ده دقیقلشدیره بیلمیرلر. اصلینده، بیر طرف‌دن بو هجوملاری آمریکانین بشار اسدی جزالاندیرماسی مستویسینده نظره آلساق، بئله اولان حالدا هجوملار بونونلا دا دایاندیریلا بیلر. دیگر طرفدن ایسه بو آددیمی اسد حاکمیتینه سون قویماق پروسسینین باشلانغیجی کیمی ده دیرلندیرمک ممکوندور. بئله اولان حالدا ایسه آمریکا حربی قوه‌لری سورییادا داها فعال ایشتیراک ائد‌جک و روسییا طرفینی هر هانسی بیر یوللا راضی سالماغا چالیشاجاقدیر. هر ایکی حالدا اسدین متفیقلری و هامیسی اولان طرفلر بونا اویغون مؤقع توتمالی اولاجاقلار.

حادثه‌لر ایکینجی اتاپدا جدیلشمه‌یه دوغرو گئدرسه، ایران، اسدی قوروماق، یا دا یاری یولدا بوراخماق بارده قرار قبول ائد‌جک. اما هله حادثه‌لرین یترینجه جدیلشمدیینی دوشونن رسمی تهران اسدی دستکلمیی داوام ائتدیرمیی دوشونور. لاکین بو حادثه‌دن سونرا تهران ترامپین گؤرونمه‌یه‌ن دیگر اوزونو گؤردویوندن اؤز مدافعه سیستمینی گوجلندیرمه‌یه چالیشاجاق.

حادثه‌لرین بو مستویده اینکیشافی بیر طرفدن ایرانا جدی خبردارلیق ساییلسا دا، ایرانین مؤقعینی گوجلندیرمه‌یه زمین یاراتماسی باخیمیندان بو مرحله‌یه قدر اونون ماراقلارینا اویغوندور. بئله کی، حادثه‌لرین گئدیشاتیندان راضی اولمایان روسییا ایرانلا متفیقلیین سارسیلماسینا ایزن وئرمه‌یجک و حتی ایرانین مدافعه سیستمینی گوجلندیرمک طلبلرینه ده مثبت باخاجاق.

آمریکانین هجومدان اول روسییا رسمیلرینی معلوماتلاندیرماسی او دئمکدیر کی، روس حربچیلرینین و حربی تجهیزاتلارین بو هجوم زامانی خسارت گؤرمه‌مه‌سی ایستنیلیب. سورییا ایسه آآمریکانین هجوملاریندان اؤزونو قوروماق اوچون لازیمی حربی تکنیکایا مالیک دئییل. هجوم زامانی روسییانین سورییادا اولان مدافعه سیستمی ده ایشه دوشمییب.

هوجوملارین داوام ائتدیریلمه‌سی بوندان سونرا سورییا–آمریکا محاربه‌سیندن آمریکا-روسییا محاربه‌سینه آجیق شکیلده کئجید دئمکدیر. آمریکا بونون نتیجه‌لرینین آغیر اولاجاغینی دوشونرک داها جدی هجوملاردان ایمتینا ائده بیلر. لاکین بیر طرفدن دیپلوماتیک فاللیغین آرتماسی، دیگر طرفدن اسد موخالیفلرینین داها گوجلندیریلمه‌سی گؤزلنیلندیر. بورادا ایسه اساس مقصد روسییانی سورییا باتاقلیغیندا ساخلاماق و پروبلمین حلینین اوزادیلماسینا خیدمت ائد‌جک.

نؤوبتی مرحله‌ده روسییانین سورییانی آمریکا هجوملاریندان قوروماق مقصدی ایله مدافعه سیستملری ایله تامین ائدجیی، ایران و حزب واللهین ایسه سورییادا روسییا ایله بیرلیکده داها جدی آددیملار آتاجاغی گؤزلنیلیر. بو ایسه او دئمکدیر کی، آمریکا ایران و روسییانی متفیق اولاراق سورییا باتاقلیغیندا اوزون مدتلی مشغول ائتمک فیکرینده‌دیر.

سون گونلرده آمریکا و روسییا آراسیندا پرده آرخاسی دانیشیقلارین باشلانماسینا دایر بیر سیرا سؤز-صحبت واردی. بو پرده آرخاسی دانیشیقلارین اساس مؤوضولاریندان بیری ده روسییا-ایران مناسیبتلری اولوب. روسییا و آمریکا راضیلیغا گلجیی تقدیرده ایرانین منافعینین نظره آلینمایاجاغی احتیمال اولونوردو. آمریکانین سون هجومو روسییا اوچون ایران کیمی متفیقی داها اعتبارلی حالا گتیرمیش اولدو. هر ایکی اؤلکه‌نین سورییادا منافعیی اوست-اوسته دوشدویوندن بو اتفاقین یاخین زامانلاردا داغیلاجاغی احتیمال اولونمور.

بوتون حاللاردا سورییادا باش وئرنلر گئتدیکجه رگیوندا گرگینلیین آرتماسینا، ایران و عرب دونیاسی، همچینین تورکییه آراسیندا ایختیلافلارین گئتدیکجه درینلشمه‌سینه، مینلرله ایران حربچیسینین سورییادا هلاک اولماسینا سبب اولوب.

ایرانین اسد حاکمیتینی نیین باهاسینا اولورسا-اولسون، قوروماسی اونون رگیوندا تجرید اولونماسینا، هم ده بؤیوک هجمده مادی وسایتلرین خرجله‌نمه‌سینه ضرورت یارادیب.

لاکین قید ائتمک لازیمدیر کی، بوتون بونلارا باخمایاراق، ایران سورییا مسئله‌سینده و حتی دیگر مسئله‌لرده آمئریکا ایله بیرباشا قارشی-قارشییا گلمکدن چکینیر. جولان تپه‌لرینده ایران انقیلاب کشیکجیلری کورپوسونون گنرالی ایسرایل حربیچیلری طرفیندن قتله یتیریلن زامان ایران هئچ بیر جدی رئاکسییا وئرمدی.

ایران رسمیلرینین آمریکا ایله قارشی-قارشییا گله بیله‌جک هانسیسا آددیم آتماغا جسارت ائتمیجیی گؤز اؤنونده‌دیر. دیگر طرفدن ترامپ اوباما کیمی صبیرلی و منطیقه اویغون سیاست یئریدن بیر لیدئر دئییل. گؤرونن اودور کی، حادثه‌لرین بو طرزده گئدیشی ایراندا 2 آی سونرا کئچیریلجک پرزیدنت سئچکیلرینه ایندیدن اؤز تأثیرینی گؤسترمه‌یه باشلاییب و محافیظه کارلار اللرینده اولان ان گوجلو نامیزدلری سئچکیلره قاتیلماغا تشویق ائدیب. بو ایسه ترامپین قارشیسینا داها محافیظه کار لیدر چیخارتماق سیاستیندن باشقا بیر شی دئمک دئییلدیر.

تاریخ
2017.04.11 / 18:18
مولف
علیرضا زمانی
شرح لر
دیگر خبرلر

یوسیف پیغمبر کیمی آدامام...

هئچ اینانا بیلمیردیم کی، او دا اؤلجک

«عیسی نین سون شامی» – ایبراهیم رشیدی

تورکلرین منلیک حیسینی یوخ ائد‌ن سیاست

دونیا بئله ایداره اولونور – قیزیل پلان

«پالتار»، «پالاز»، «پالان» سؤزلری نئجه یاراندی

محمد فضولییه قیسقاندیغیم قادین...

حبسخانادان بیر بؤلوم - ساسانیان

ساری گلین: بیر ماهنینین سیرری… - آراشدیرما

بیزیم عائله‌نی او روس یازیچیسی محو ائتدی

خبر خطّی
 
  
  
  
  
Axar.az'da reklam Bağla
Reklam
Bize yazin Bağla