Axar.az
یوخاری
21 اوکتیابر 2017


بیزیم اوشاقلیغیمیز او گون دفن اولون‌دو

آنا صحیفه یازارلار
12 Punto 14 Punto 16 Punto 18 Punto

بو ایل منیم حیاتیم‌دا چوخ شئیلر دییشه‌جک‌دی. مکتبه گئدجکدیم، ان اساسی ایسه تک دئییل، باجیم کیمی سئودییم داییم قیزییلا بیرلیکده عینی صینیفده اوخویاجاقدیم. بونو دا بیلیردیم کی، هله آپرئل آیی‌دیر. سنتیابرا ایسه اوزون بیر واخت وار. بو مدت عرضینده داییم اوشاقلاری ایله بیرگه اولاجام. هر حالدا آلتی یاشیندا بیر اوشاق اوچون اؤز دوستلاری ایله بیرگه اولماقدان سئویندیریجی حال اولمازدی.

من داها بیر باشقا سبب‌دن دولایی دا سئوینیردیم. بیزیم یئنی ائویمیز بابامگیلین ائوینین یانیندا ایدی. او، سؤز وئریب کی، بیزی اؤزو مکتبه آپاراجاق. دئملی، من همچینین، بابا قایغی‌سینی دا گؤرجکدیم. آخی اونو چوخ گئج-گئج گؤروردوم. بو فیکیرلریم منی خیاللار عالمینه ائله آپارمیشدی کی، گؤزومو آچاندا منزیل باشینا چاتدیغیمیزی گؤردوم. بابام کؤچ ماشینینین قاباغینا چیخمیش‌دی و حیط داروازالاری تایباتای آچیق ایدی. من ماشیندان ائله سرعتله توللانیب، بابامین قوجاغینا قاچدیم کی، آنام منه «یاواش اول» دئمه‌یه واخت تاپمادی.

من عائله‌میزین محمود باباسی ایله ائلین محمود علسگر اوغلوسونون آراسینداکی بؤیوک فرقلری گؤروردوم. عائله‌نین دیرلیسیی اولان محمود بابا سرت و جدی کاراکتره مالیک ایدی. اونون اؤزونون تربییه اصولو واردی. ائلین محمود علسگر اوغلوسو ایسه صمیمی، مهریبان، صحبتجیل و ساده ایدی. بابام- شیروان آشیق مکتبینین آپاریجی سیمالاریندان بیری، بیر نئچه داستانین مؤلفی… فخر ائدیردیم اونونلا. اینجه جیزگیلرله جیزیلمیش سیماسی، ووقارلی داورانیشی منی هله لاپ اوشاقلیق‌دان والئه ائتمیش‌دی. اونون ائل صنعتکاری اولماسی ایسه بیر باشقا اووسونلامیشدی منی. بابامی داییم اوشاقلارینا همیشه قیسقانیردیم.

داییم اؤولادلاری سئوینج و علسگر ده باباملا عینی ائوی پایلاشیردیلار. بابا اوجاغین‌دا، بابا قوجاغین‌دا بؤیویوردولر. اونلاری باباما قیسقان‌سام دا، بیر-بیریمیزه مختلیف حسلر بسلسک ده (قیسقانجلیق، سئوگی، حسد، بعضا کین) داییم اوشاقلاری ایله چوخ گؤزل اوچلوک ایدیک. تئز-تئز عادی بیر شئیین اوستون‌ده دالاشساق دا، زارافاتینانا بیر-بیریمیزه سؤز آتیب باریشاردیق. کؤچوموزون گلدیینین ایلک گوندن ائودکیلرین باش قاریشیقلیغیندان ایستیفاده ائد‌رک یئنی اویونلارین پلانینی جیزدیق. بیز اوچوموز نه ایله مشغول اولاق؟ هر یئری، هر کؤشه‌نی سوزدوکدن سونرا نه ائدجییمیزی تاپدیق. ائوین یوخاری حیصه‌سین‌ده، حیطه گیریش اوچون ایستیفاده ائدیلن داروازا طرفدن قونشو حیطله آراکسمه رولونو اوینایان حاساردا تیکینتی‌دن قالما داش چیخینتیلار واردی. اونلار عادت اوزره سونرادان کسیلمه‌لی ایدیلر. آنجاق تالئ بیزیم اوزوموزه گولموشدو و او چیخینتیلار بیزیم لاییحه‌میزین بونؤوره‌سینی تشکیل ائتدی. بیز بو چیخینتیلار واسطه‌سیله دیوارا دیرماشاجاق و حاساروستو اویونلار اوینایاجاقدیق. نه ائدک، آخی یئر بیزه کیفایت ائتمیر؟ بیزیم هر گون داوام ائد‌ن مشقلریمیز اویونوموزو آدیلشدیریر، چتین مقاملارینی آرادان قالدیریردی. بعضا، حاسارین اوزرینده بارداش قوروب ائوجیک-ائوجیک اوینایاردیق. توت آغاجینین یارپاقلارینی ییغیب پالچیق دولماسی ائدیردیک. چپره یا بابامیز یاتان‌دا، یا دا ائوده اولمایان‌دا چیخیردیق.

اونون هر گون ائوه گلیشینی خاطیرلاییرام. داروازانی آچماق اوغروندا یاریشیردیق. بابانی کیم بیرینجی اؤپجک؟ نینکی اؤپمک، اوزونده‌کی نورو گؤروب اؤپوشوموزون نورونا ضرر ووراجاغیندان قورخوردوق. او ماشیندان دوشوردو و اهماللیجا نؤوبه ایله اوچوموزون باشیمیزا سیغال چکیردی. دونیانین ان گؤزل سیغالی ایدی بو. الینین قابارمیش جیزگیلری ساچیمیزی اوخشایاندا قلبیمیز فرح حسی ایله دولوردو... «هانسیمیزی داها چوخ ایستییر» دئیه مباحصه‌لر ائدیردیک.

بابا ائوده‌دیرسه، ساکیت اولماق لازیمدیر. اویونلاریمیزدا دا بونو نظره آلمالییدیق. اونون یورغون، چؤکموش گؤزلرینی گؤرندن سونرا یوخودان اویاندیرماغا هئچ اورییمیز گلمزدی. هر گون تئزدن اویانیر، آخشاماجان حیطده اویناییر، گونورتالار یئمک سوفره‌سینه گلیر، آخشام اوستو بابادان پول چیرپیشدیریر، اونونلا اؤزوموزه کیچیک ظیافت تشکیل ائدیردیک.

بابانین دجل بالالاری ایدیک. آخشام اوستولر کوچه‌نین اورتاسیندا ال دامیندان چیرپیشدیردیغیمیز شیشلر ایله پامیدور کابابی چکیردیک. ظیافت سوفره‌سینده بابامیزین مالییه دستیی ایله دوندورما، سرین سو، خوروزشکیللی شیرین کانفت، قارغیدالی چوبوقلاری اولوردو. بو هر گون بئله داوام ائدیردی. هر گون عینی سناریدن یورولموردوق، چونکی بابامیز بیزه اوشاقلیغیمیزی یاشادیردی.

...گونلردن بیر گون بیز بورووستو مشقلریمیزی باشا ووروب ائوه قاییدیردیق. بو دؤنوش زامانی بیز ایشلریمیزله دوز گئتمه‌ین بیر حال ایله اوز- اوزه قالدیق. بابامیز ماشینینی حیطه داخیل ائدرکن بیزیم اوچون پیللکه‌ن فونکسییاسینی یئرینه یئتیرن داش چیخینتیلار ماشینینی جیزمیشدی. حتی جیزماق سؤزو یونگول قالیردی. کیشی ائله حرسلنمیشدی کی، ائله اوراداجا او چیخینتیلاری کسمه‌یه اوز قویدو. نیه ده حیرسلنمه‌سین کی؟ اذیتینین بهره‌سی بیزیم داش چیخینتیلاریمیز طرفیندن ازیلمیشدی. بیز بو حادثه‌یه او قدر مایوس اولموشدوق کی، سانکی جانیمیزدان جان گئدیردی. «بلکه، بابایا یالواراق کی، اونلاری کسمه‌سین؟»- دئیه چوخ فیکیرلشدیک‌سه ده، بونا هئچ جور جورت ائده بیلمدیک. بونونلا اونو داها دا عصبلشدیرجییمیزی آنلاییردیق. اما اونون اوزونده گؤردویوموز او پریشان ایفاده بیزی ایستییمیزدن داشیندیردی. اونون اوزونده‌کی مایوس ایفادنی بیر داها گؤرمدیم.

ایون آیی یئنی گیرمیشدی. بیز هامیلیقلا باباگیلدیدیک. بابام ایسه ننه‌م و خالاملا کنده گئتمیشدی. اورادا بیر نئچه ایشی وار ایمیش. ننه‌مین آناسی دا بیزیملیدی. سکوت چؤکموشدو. بیز اوچوموز سس‌سیز بیر کونجده اوتورموشدوق. ائودکیلر تلویزورا باخسا دا، بیز اوتوردوغوموز یئرده نه ایسه باره‌ده مذاکیره آپاریردیق.

گؤزلنیلمدن سکوت پوزولدو. قیشقیریق سسلری ائوی باشینا آلدی. هر کس اؤزونو ایتیرمیشدی. ائودکیلر نه ائدجیینی بیلمدیی اوچون ائوین گاه یوخاری، گاه دا آشاغی باشینا دؤوره ووروردولار. بیز هئچ بیر شئی باشا دوشموردوک. آخی بیردن-بیره نه اولدو؟! داییم قاپیدان ایچری یئنی گیرمیشدی. سس-کوی اونو دا چوخ قورخوتموشدو، بیزیم کیمی نه باش وئردییندن خبرسیز ایدی. او دا ائودکیلرین حالینی گؤروب «نولوب؟» دئیه قیشقیردی. آخی بیردن- بیره ائوده نیه بئله سس-کوی قالخدی؟! داییم بیر داها، یوکسک تونلا یئنیدن قیشقیردی: «نه اولوب؟!» ننه‌مین آناسی آغلایا- آغلایا داییمین یاخاسیندان یاپیشدی. و بیرقرارا، دایانمادان دئمه‌یه باشلادی:

- ییخیلدی، ییخیلدی! بالامین ائوی ییخیلدی! ییخیلدی...

داییم قورخدو:

- نولوب آخی، آی آرواد؟!

بؤیوک فلاکت باش وئریبمیش... بابامیزین قفیل اؤلوم خبرینی بیز ده داییملا بیر اؤیرندیک. دئییله‌جک هئچ بیر سؤزوموز قالمامیشدی. بوتون جسلریمیز سوکوت ایچریسینده یاناغیمیزدان آخان یاشلا ایفاده اولونوردو. دردیمیز بؤیوک، یاشیمیز ایسه بو دردی داشیماق اوچون حدیندن آرتیق آز ایدی. نه ائدجییمیز، کیمه باخاجاغیمیزی، کیمدن سواللاریمیزا جاواب ایستیجییمیزی بیلمیردیک. کیمینسه ائشیتدییمیزی اینکار ائدجیینی گؤزلییردیک. کیمسه زنگ ووراجاق، یا ایچری داخیل اولاجاق کی، «یالاندیر»!

ائودکیلری گئجه ایله کنده گئتدیلر. کنده چوخ گوجلو یاغیش یاغیرمیش. بیزی آپارمادیلار بابامیزلا سون گؤروشه. آنجاق یئنه ده اینانمیردیق. گؤزلییردیک کی، ائوه گؤزل خبرله قاییداجاقلار. بو فیکیرله گئجه‌نی نئجه یوخویا گئتدیی‌می خاطیرلامیرام. گئجه بویو گؤردویوم یالنیز بیر یوخو یادیمدا ایدی: بابام چارپاییدا اوزانیب. باشیندا یون پاپاق، اینینده قالین کؤینک و آدیداس شالوار وار. شالوارین اتیینی جورابین ایچینه سالمیشدی (اونو هئچ واخت بئله گؤرممیشدیم). باشینا هامی ییغیشیب. و یالنیز من اوندان اوزاقدایام. هئچ نه دئمدن اونا باخیرام. سئوینجلییهم، چونکی اونون ساغ اولدوغونو گؤروردوم. یاواش-یاواش اونا یاخینلاشدیم:

- بابا، نه اولوب سنه؟ دئدیلر کی، اؤلموسن...

- یووخ (گولور)، بیر آز الیم یانیب، - ساغ الینی گؤستره‌رک دئدی. او، بو علی ایله هر آخشام ائوه گلدیی زامان باشیما سیغال چکیردی.

او، هئچ واخت منیمله دیالوگدا اولمامیشدی. یاریم قالان ایشینی تماملاماق اوچون یوخوما گلمیشدی سانکی.

سحر آچیلاندا گؤردوکلریمین بیر یوخو اولدوغونو آنلادیم. آنلادیغیم داها بیر شئی واردی: هئچ نه اوولکی کیمی اولمایاجاق! ایشیق ساچان چیراغیمیزی، هر آنیمیزدا کورییمیزی سؤیکدییمیز دایاغیمیزی، باشیمیزا سیغال چکن بابامیزی ایتیرمیشدیک.

کنده یاغان یاغیش بابام اوچون یاغیردی. بولودلارین گؤز یاشی ایدی او یاغیش. بولودلار دا محمود بابانین ائلده‌ن گئدجیی اوچون آغلاییردی.

داها سونرا اونون یاس مراسیمینه بیز ده قاتیلدیق. حیاتیمیزدا قاتیلدیغیمیز بیرینجی و ان آغیر یاس مراسی‌می… ۶ یاشلی اوشاقلاری اللها عاصی چیخارداجاق قدر پیس تأثیر ائتمیشدی بو حادثه بیزه. جانینی تاپشیردیغی یئره باخیردیم. «اونو بورادا جریان ووردو»، «الینین آرخاسی ایله الکتریکی یوخلاییرمیش، توکو اوووجونا آلاندا جریانی بوراخیبلار» بیز بو سؤزلری دفعه‌لرله ائشیتدیک.

اللهی سئومیردیک آرتیق. چونکی او بیزدن بابامیزی آلمیشدی. «بابا آخی بیزه بیر سؤز وئرمیشدی!» سؤزونون اوزرینده دورماغا ایسه حیات اونا ایزن وئرمه‌دی.

بابامین یاسیندا بوتون کند آغلاییردی. تانیمادیغیم یوزلرله اینسان وار ایدی بلکه. اونلارین گؤزون‌دن آخان یاشلا بیزیم گؤز یاشیمیزین عینی اولمادیغینی گؤره بیلیردیم. بیز بابامیزی ایتیردییمیز اوچون آغلایارکن، اونلار ائل صنعتکارینین ۵۶ یاشیندا گؤزلنیلمدن، قفیل اونلاری ترک ائتمه‌سینه گؤره آغلاییردیلار.

من بابامین کیم اولدوغونو دفنینده آنلادیم. بابامی سئون نئچه-نئچه اینسانین نئجه یارالی-یارالی اوندان بحث ائدرکن تانیدیم.

بو ایللر عرضینده هر زامان ائشیتدییم بو اولدو: «محمود بؤیوک صنعتکار، گؤزل اینسان، وفالی دوست، غیرتلی اوغول ایدی، یئری بهیشت اولسون!»

...منیم خاطیرمده قالان، اوشاقلیغیمین بیر پارچاسی اولان بو حادثه‌دن بو گون آرتیق ۱۵ ایل اؤتور. ۱۵ ایلدیر کی، او حادثه منیم گؤزومون اؤنونده تئز-تئز جانلانیر. شیروان اهلینین، اونون دوستلارینین، الینین قاباری، آلنینین تری ایله قوردوغو اوجاغینا توپلاشماسیندان، اونون سون منزیله یولا سالینماسیندان بیزلر اوچون قرینه‌لره برابر اوزون بیر واخت اؤتوب. آنجاق واخت‌سیز دونیادان کؤچن آشیق محمود علسگروغلونون سسی، شیرین آوازی بو گون ده یادداشلاردادیر.

تاریخ
2017.06.03 / 10:37
مولف
آیتاج قدیراوا
شرح لر
دیگر خبرلر

تورکلرین منلیک حیسینی یوخ ائد‌ن سیاست

دونیا بئله ایداره اولونور – قیزیل پلان

«پالتار»، «پالاز»، «پالان» سؤزلری نئجه یاراندی

محمد فضولییه قیسقاندیغیم قادین...

حبسخانادان بیر بؤلوم - ساسانیان

ساری گلین: بیر ماهنینین سیرری… - آراشدیرما

بیزیم عائله‌نی او روس یازیچیسی محو ائتدی

ارینی گیزلیجه معالیجه ائد‌ن قادینلار

«کافیر تورکلر» ایفاده‌سی هارادان یارانیب؟

هفته‌نین بیرینجی گونو نیه یاس توتمازلار؟

خبر خطّی
 
Axar.az'da reklam Bağla
Reklam
Bize yazin Bağla