Axar.az
یوخاری
23 فئورال 2019


ساواش... - ایسماعیل خرمی‌نین حیکایه‌سی

آنا صحیفه ادبیات
12 Punto 14 Punto 16 Punto 18 Punto

کولت آذ ایسماعیل خرمی‌نین حیکایه‌سی‌نی اوخوجولارینا تقدیم ائدیر:

توپلاردان، راکتلردن و توفنگلردن سوزولوب چیخان مرمیلر، آغیز آچیب، دیری – دیری، آدامی اودماق ایسته ییردی. ایت کیمی اولایان، بو قدار دمیر پارچالاری، کیمسه‌نی گؤز قیرپماغا قویموردولار. یوخولارمیز، آییق‌لیق و آییق‌لیغیمیز یوخو ایچنده کئچیردی. بیردن آدرس‌سیز بیر راکت سنگرین قاپیسینی دؤیمه‌دن ایچه‌ری کئشدی. منیم قارشیمدا دؤرد – بئش تلیس تورپاق اوست – اوسته قویولموشدور.

باشیمی اونلارین آراسیندا گیزلتدیم. گؤزومو آچاندا "موباریز"ی گؤردوم. قانادیندان وورولموش قوش کیمی، یووارلانیب، تیتره‌یه – تیتره‌یه، یئره دوشدو. قان بوتون گؤده‌سینی بوروموشدو. اشهدان لااله الا الله دئیه‌رک، آغزینی بیر - ایکی کره آچیب یومدو. داها، سسی گلمه‌دی. باشینی دیزیم اوسته قویوب نئچه کره سسله‌دیم. آنجاق موباریز اوزون ساواش یولچولوغونون یورغونلوغوندان درین - درین یوخولارا گئتمیشدی. بیر نئچه ساعاتدان سونرا، جبهه بویو سس‌سیزلیک اولدو. سانکی مرمیلر قینینا گیریب دینجلمک ایسته‌ییردیلر.موباریزی سنگردن چیخاردیب، یئنی‌جه بوشالان تاختا بیر تابوتا قویدوق. مئییت نمازین قیلاندان سونرا، باشچی‌میز موباریزین قهرمان‌جاسینا شهید اولدوغوندان دانیشیردی. باشچی، بؤز بایراغیمیزی یاریمچیق آشاغا ائندیریب؛ دوشمنین قارشیدا ساری بایراغینی گؤسته‌ره‌رک؛ دئدی:

- او ساری بایراغین آلتیندا بیزه مرمی سیخان کافیرلر، دونیانین ان قورخونج و موردار دوشونجه‌سینی داشییرلار. اونلارین قانی سیزه، آنا سودو کیمی حلال‌دیر.

باشچی الیندن گلنی ائدیردی کی؛ بیزیم دؤیوشمه‌یه، اراده میزی داها آرتیرسین. سؤزوندن بئله باشا دوشمک اولوردو کی؛ دوشمنه غالب گلندن سونرا اونلارین بوتون وارلیقلاری، اوتورتوغو ائولردن توتدو قادینلارینا قدر بیزیم اولاجاق. و بو یولدا شهید اولانلارین هامی‌سینا او دونیادا، بؤیوک اؤدوللر وئریله‌جک. بو سؤزلره هامی‌میز اینانیردیق. و بو دانیشیغا، توکجن شوبهه‌میز یوخیدی. بیزی بو اینام دؤیوشدن - دؤشوشه لره آپاریردی.

بو هئییس – وئییس‌ده، قانجیق بیر توپ گولّه‌سی جهنم ایلدیریمی سایاق، قاباغیما دوشه‌رک گؤزومو یاندیریب یاخدی. داها هئچ نه دویمادیم. بو اولایدان بیلمه‌دیم نئچه واخت ساووشموشدو، یانیمدا یوکسه‌لن سسلر منی اؤزومه قایتاردی: " شهیدلر، اؤلمزلر الله اکبر." باخدیم گؤردوم بیر تابوتون ایچینده‌یم. تابوتوم چیین‌لرده داشینیلیردی. آنام، باجیم، و بوتون قوهوملار اوز گؤزلرینی یولورلار.

دفن مراسیمی بیتمیشدی. آنجاق، جماعاتین دئدیی کیمی، من اؤلمه میشدیم. چون کی بونلارین هامیسین اؤز گؤزومله گؤروب و قولاقلاریملا ائشیدیردیم. سانکی بیر قوش اولموشدوم. بیر گؤز قیرپیم‌یندا، ایسته‌دییم یئرلره اوچا بیلیردیم. بوندان بارلاناراق یئنی‌دن جبهه یه گئتمک ایسته‌دیم. ساری یاریمچیق ائندیریلمیش ساری بایراغین آلتیندا باشچی، قارشیداکی بؤز بایراغی الی‌له گؤسته‌ره‌رک دئییردی:

- او بؤز بایراغین آلتیندا بیزه مرمی سیخان کافیرلر، دونیانین ان قورخونج و موردار دوشونجه‌سینی داشییرلار. اونلارین قانی سیزه، آنا سودو کیمی حلال دیر.

تاریخ
2019.02.12 / 15:02
مولف
آیتاج آراز
شرح لر
دیگر خبرلر

یا من، یا سن، یا دا بیز ...- شعیر

....حکایه‌ - ایتین گؤزل‌لییندن، اینجه سسینین قولاق اینجیتمه‌مزلییندن

كاش اولايدی سیّدا پنهان سؤزوم افغان آرا - قزل

هر کسین جیبریلی کندی قلبی‌دیر، ویجدانی‌دیر - شعیر

شعیر - آرزولار يول-يولا، بايرام گونو صوپ ۹ دا

...شعر - شهریار داردا قالیب، داغدا داشا دالدالانیب

گوندوزلرین آلاتورانلیغی ایله، گئجه‌لرین قارانقولوغو...

حمید هریس‌چی‌دن: "شمس تبریزینین شعیری"

آختاریش - حکایه

دوداغیندان آخان نغمه‌لرله بزندیم... - گونئی‌لی شاعر

خبر خطّی
 
Axar.az'da reklam Bağla
Reklam
Bize yazin Bağla