Axar.az
یوخاری
17 اییون 2019


دومانلی تبریز ۶۴-اونجو بؤلوم

آنا صحیفه ادبیات
12 Punto 14 Punto 16 Punto 18 Punto

کؤچورن: فرخ جرایدی

ایچری‌دن تار، کامانچا، قاوال و باشقا موسیقی آلت لری چیْخارانلاردا وار ایدی. بیردن-بیره قاپیْدا بیر قیامت قوْپدو. بیری‌نین آرخاسی‌ندان یئشیگ-ی ( صندوق. اسکی و اوُنودولموش تۆرکجه سؤزلردن بیری ) ووُروب یئره سالدیلار. یئشیگی سیْندیریب ایچینده‌کی کوْنیاک ( بیر چئشید ایچگی) شیشه‌لرینی جیب لرینه سوْخماغا باشلادیْلار.

ایچری‌دن اۆزۆ آغ اؤرتۆکلۆ بیر قادینلا بیر کیشی ووُروشا-ووُروشا باییرا چیْخدی. بوُ ووُروشما نین نه اۆسته گئتدیگی بللی دگیلدی. قادین اؤرتۆلۆ ده اوْلسا کیشی نین ووُردوغو یوُموروقلارین جوابیْن وئریردی. آخیْردا قادین کیشی‌نین اَل چکمه دیگین گؤرۆب اۆزۆنده‌کی اؤرتۆگۆ و باشیْنداکی چارشابی آتدیْ. کیشی‌نی اوْ کی وار دؤیدۆ و اؤزۆندن اَل چکمه‌گه مجبور ائتدی.

قادینین بئلینده بؤیۆک بیر تیرمه شال وار ایدی. قادین ایچری‌ده بوُ تیرمه‌نی بئلینه سارییب چیْخدیقدا بوُ کیشی اوْنون الیندن آلماق ایسته‌ییرمیش. قادین اۆزۆ چیل، بوُرنو یئکه، بوْینو قیْسیق، اؤزۆده کؤک و یوُمورجا بیر قادین ایدی. بوُنون غریبه صفت لریندن بیری ده بیر اَلی نین خیْنالی اوْ بیر اَلینین ایسه خیْناسیز اوْلماسی ایدی.

قیمتلی شئی‌لر داشیْنیب قوُرتاردی. آرتیْق ایچری‌دن دیرسیز شئی‌لر چیْخیردی. بیزیم قارشیْمیزدا بیر نفر گنج دوُرموشدو، تالانا قاریْشمیردی. اوْ داییما تالانچی لاری آلقیٍش لاییب دئییردی:

《 داغیْدین بوُ حیاسیزین یوُواسینی》

من بوُنون کیم اوْلدوغون سوْروشدوم . " کلّه پز اوْغلو " دور دئدیلر.

اوْنو یانیما چاغیْردیم. بوُ آلقیْش لارین نده‌نین سوْروشدوم. اوْ منه بئله جاواب وئردی:

《 ساغلیق اوْلسا گؤرۆشه‌ریک و ایشین نده‌نینی سیزه دئیه‌رم. هله‌لیک بوُ حارام زادانین قارداشی آغا میرزا علی‌نین ده ائوین داغیْتدیرماق لازم دیر. 》دئییب گئتدی.

هله تالان دوام ائدیردی. دشمن بیردن-بیره اۆستۆمۆزه یۆگۆردۆ. بیز الیمیزده قالمیْش سوْن بوْمبا ایله اؤزۆمۆزۆ قورتاردیْق.

استامبول داروازاسی طرفینده آغیْر ساواش گئدیردی. بوُرادان بیری اوْ بیری‌نین دالیْنجا سئوینجلی خبرلر گلیردی. انقلابچیْ دسته‌لرین ایر‌ه‌لی گئتدیگینی و اؤنملی یئرلرین اَلده ائدیلدیگینی ائشیدیردیک .قوْرخولو بیر نده‌ن وارسا، اوْ دا دسته‌لرین تالان ائتمه‌گه باشلارین قاتما قوْرخوسو دور . بوُرا دا حاج میر باقر صراف-ین ائوینی تالان ائتدیکده ضد انقلاب دسته‌لری یۆگۆرۆب انقلاب چیْلاری گئری چکیل مه گه مجبور ائتمیشدی.

ساباحی‌سی کۆچه‌لرده بئله بیر بیلدیری بوُراخیلمیشدی :

"" کیم تالان ائتمه‌گه باشیْن قاتسا ائله همان یئرده دار-ا آسیْلاجاقدیر. ""‌

تاریخ
2019.04.06 / 09:39
مولف
محمد سعید اردوبادی
شرح لر
دیگر خبرلر

غوربت اوره ک سیخیار جان اوزر اینان - شعیر

چالارلارین دؤیوشون‌دن کوسوب خیال ساراییم-شئیر

سازینین تلینده قیریق- قیریق باغیریرام - شعیر

گنجلیک بولاغی- ژاپون افسانه‌لریندن

بو سئودا یانغیسی قورتارماز حتی.. - شعیر

وصله یاددیر ایلک محبت، سئومه‌ییر قوی سئومه‌سین - شعیر

آیسَل حَیَط لرینده ماوی گوءیه باخیردی - شعر

قوجاغین امنیت گؤزون تروریست/ شعر

شاه عباس دوربونونده بیر چوبانجیق واریمیش - یدا حشمتی

او زامانلار خانیملار قوناقلارینی بو شربتلرله قارشیلایاردیلار

خبر خطّی
 
Axar.az'da reklam Bağla
Reklam
Bize yazin Bağla