Axar.az
یوخاری


خبر گلر داها عمرۆن قیْشیندان... - شعر

آنا صحیفه ادبیات
12 Punto 14 Punto 16 Punto 18 Punto

Kult.az آذربایجانین بؤیوک شاعری رامیز رؤوشه‌نین شعرینی تقدیم ائدیر:

خبر گلر داها عمرۆن قیْشیندان ،
سوْیوُیارسان –
ساچلارینا قار دۆشر
آنجاق کهنه کتابلارین ایچیندن
هردن - هردن
کهنه مکتوبلار دۆشر .

اییلرسن گؤتۆره سن گیزلیجه
بوْیلانارسان-
آرواد اوُشاق گؤرمه سین
چکیلرسن اوْتاغیْن بیر کۆنجونه
گیزلی-گیزلی اوْخوُیارسان هر سؤزو.

بو نه سئوگی مکتوبودو الاهی
ایندییه جن آغریْییْر هر سؤزۆ ده.
یازان قیْزین نه ایدی آدی الاهی؟
یاددان چیخیب صفتی ده ، اۆزوده.

اوخودوقجا لال سطرلر سسله نیر ،
یاواش- یاواش دۆشر یادینا.
بیر حرفدن - قاشیْ دۆشر یادینا
بیر حرفدن – گؤزۆ دۆشر یادینا

او گؤزلردن یادگار تک واراقدا
گؤز یاشیْنین لکه سینی گؤررسن.
بیردن دوْنوُ خیشیلدایار اوْتاقدا
پنجره دن کؤلگه سینی گؤررسن.

دیکسینرسن بوْیلانارسان قاپیْیا؛
"او کؤلگه نی آرواد - اوُشاق گؤردۆمۆ ؟!"
تئز مکتوبی آتارسان کول قابی یا
یاندیرارسان هر سؤزۆنو سطرینی.

سؤزلر یانار کاغیذی دا یاندیرار
سؤزلر یانار ، او قیْزی دا یاندیرار
سؤزلر قاچار ، او آلوْووُن ایچیندن

سن باخدیقجا
باسار سنی سوْیوُق تر.
سیرا - سیرا قارا قاریْشقالار تک
قاچیْب گئدر قارا – قارا حرفلر.

تکجه او قیز قاچا بیلمز بو اوْددان
بیر قوُش اوْلوُب اوُچا بیلمز بو اوْددان
او قیز یانار بو آلوْووُن ایچینده
گؤیه قالخار او آلوْووُن دیللری

او آلوْووُن دیللرینه سارماشیْب
یانار- یانار اوُزون - اوُزون تئللری
یانار بیر واخت ساچلارینی اوْخشایان
اوُزون - اوُزون بارماقلاری اللری.

او قیز یانار-
ارشه چیخار تۆستوسو
کاغیذ یانار
کۆل قابیدا کۆلـله نر.

قَفیل بیردن
کۆل قابینین ایچیندن
یئره دۆشوب یئره اۆزوک دیییرله نر.

لاپ اؤزۆنو ایتیررسن - باخارسان
اوْ اۆزویو گؤتوررسن باخارسان
بوُ اۆزویو آخی هاردا گؤرمۆسن؟
بوُ اۆزویو گؤرمه میسن بلکه هئچ

سن او قیزا هاچان اۆزوک وئرمیسن؟
اونا اۆزوک وئرمه میسن بلکه هئچ

آروادیندا قَفیل گیررقاپیدان:
-الینده کی نه دی - ؟ - دئیر.
-اۆزوک دو.
- او اۆزویو نه یاخشی کی تاپمیْسان
نئچه واخت دی ایتیرمیشدیم گزیردیم.

سونرا گلر سندن آلار اۆزویو:
-بونون رنگی نییه بئله قارالیب؟
بارماغینا گۆجله سالار اۆزویو :
-ائله بیل کی بیر بالاجا دارالیب .

کۆل قابیندان تۆستو قالخار هله ده.
او مکتوبون کۆلو هله ایشارار
ماددیم- ماددیم دوُروب باخار آروادین
او تۆستودن بیر جۆت گؤزۆ یاشارار.

-هئچ اوْلماسا پنجره نی آچ – دئیر
بوردا نئجه اوْتوُرموسان سن نئجه ؟!
بو نه یانیْق قوْخوُسودو ، الاهی
ائله بیل کی آدام یانیْب ایندیجه...

تاریخ
2019.04.30 / 18:12
مولف
آیتاج آراز
شرح لر
دیگر خبرلر

بو اوندان دا بَرک قاچاردی!

سسیم سکوتا بوروندو،غزل‌لریم اوشودو - نادر الهی

«توران»-دئییب بوز قورد کیمی دورانا.- شعیر

سنين گؤزلريندن باشلاندي زامان... - سعید موغانلی

ائله اینسانلار تانیدیم کی، تبریز دئینده گؤزلری دولوردو...-حکایه‌

معشوقون آیاغی هارایا دَئیسه، اوراسی عاشیقه وطن کیمی دیر...

آچ وئر یئله هؤروکلرینین زنجیرین گولوم - شعیر

ساچلاری، اوره‌ک اوسته سردیم- شعیر

سنسیزلیگه دؤزمک نه سایاق ممکن اولارمیش - شئیر

قورتولوشا محتاج گلدیم قاپینا - شعیر

خبر خطّی
 
Axar.az'da reklam Bağla
Reklam
Bize yazin Bağla