Axar.az
یوخاری


سانکی تبریز خیابانیندان کئچن دوه قطاریدیر... - شعر

آنا صحیفه ادبیات
12 Punto 14 Punto 16 Punto 18 Punto

Kult.az آذربایجان‌لی شاعر بالاش آذراوغلونین شعرینی تقدیم ائدیر:

سئوگیلیم،
دوداغیندا حزین بیر بایاتی
یاتیریرسان کؤرپه‌میزی،
گئجه یاریدیر...
میصراعلار
سانکی تبریز خیابانیندان کئچن
دوه قاتاریدیر،
غملی بیر آهنگله آخیر.
کؤرپه دجل اولسا دا،
نغمه‌نین آهنگینه اویوب
خیالا دالمیش کیمی اۆزونه باخیر.
بسدیر، بو غملی نغمه‌نی اوخوما،
اوخوما، سئوگیلیم.
اونسوزدا یامان سؽخیلیر قلبیم
بو تک اوتاقدا.
اؤزوم ۵۶-جی ایلده‌یم،
خالقیم اون ایل قاباقدا.
گلیر خاطیریمه،
سنگرده یاتدیغیم،
توزا ، تورپاغا باتدیغیم
گۆنلر.
دۆشور یادیما فدایی دوستلاریم،
ساققال ولی،
شمسووارلی ابی،
قوجا شاهمار.
تۆفنگین قونداغینا کندیر باغلاییب،
گۆلله‌لری داغارجیغا یؽغان،
تانکی سینه‌سی‌یله ساخلاییب
قوشون قاباغینا چؽخان
آدسیز قهرمانلار.
دۆشور یادیما،
ساکیت گئجه‌لرده
دۆشمن سسی‌نی ائشیتمه‌سین دئیه
آستادان بایاتی دئین جاوانلار.
اوخوما، سئوگیلیم،
بو بایاتیلاری اوخوما،
یئتر.
گلیر خاطیریمه
آیلی آخشاملاردا
تۆفنگین قونداغی اۆسته شئعر یازیب
سحر آتیشماسیندان قاباق
بیر داشین اۆستونه قالخیب
اونو دوستلاریما اوخودوغوم گۆنلر.
دۆشور یادیما
ایکی جبهه دوستوم –
تۆفنگیم،
آتیم.
بیری نغمه‌م کیمی آلوولو ایدی،
بیری جیلووسوز خیالیم،
اوچان قانادیم.
گلیر خاطیریمه
تبریزه دؤنرکن جبهه‌دن
اۆچ گۆنلوک یولو
بیر گئجه-گۆندوزده کئچدیگیم،
گئجه بایاتی دئییب،
گۆندوز بارداقلاردان آیران ایچدیگیم
گۆنلر...
گلیر خاطیرینه یقین کی، سنین ده
اونوتماییبسان سا اگر،
یئنیجه دؤنموشدوم جبهه‌دن،
سردار خیابانیندا
بیر سحر اۆز-اۆزه گلدیک.
سن گۆلومسه‌یه‌رک
بیر منه باخدین،
بیر ده پالتاریما.
سونرا جدی حال آلیب
قاش-قاباغینی تؤکدون،
توققانی دۆزلدیب
نیظامی کؤینگی‌نین اتگی‌نی چکدین،
بیر عسگر کیمی سلاملادین منی.
من سؽخارکن الینی،
دئدین:
«بوینونا ساریلاردیم
خیابان اولماسایدی اگر»
یادیندامی سئوگیلیم.
بیر عسگر افسرله یاناشی گئتدی
حربی قرارگاها قدر...
سئوگیلیم،
اؽندی سن بئشیک باشیندا
لایلا چالیرسان،
کؤرپه خومارلانیر یاتاقدا.
منده تک بیر اوتاقدا
یامان داریخیرام،
یامان
گلیر خاطیریمه،
او زامان
تبریز خیابانلاری‌نی کئچیب
«شاعیرلر مجلیسی»نه قوشا گئتدیگیمیز
گۆنلر.
گلیر خاطیریمه،
هر سحر
گئجه یازدیغیم شئعری
میکروفون قاباغیندا اوخویارکن من،

«آذربایجان»دا چؽخاردی سنین نغمه‌ن،
سئوگیلیم،
بیز اوزون ایللرین سؽناغیندان
کئچیب گلن،
حیاتین آغلی-قارالی گۆنلری‌نی گؤرن،
بیر مسلک اوغروندا ووروشوب،
بیر حیاتا نغمه قوشوب،
یاشامیشیق.
اۆزوموز آغ،
آلنیمیز آچیق.
سئوگیلیم،
سن دۆنن جبهه دوستوم،
قلم یولداشیم ایدین،
بو گۆن حیات یولداشیم اولموسان آرتیق،
سن،
تۆفنگی آتیب بیر یانا
کئشیک باشیندان
کئچیب
لایلای چالیرسان اوغلونا.
بیلیرم،
سن اونوتمامیسان ایلک عهدینی،
اؽلک ایلقارینی
جبهه‌ده اؤلن ایگیدلرین یئرینه
بؤیودورسن آرازینی،
اعتیبارینی.
سئوگیلیم،
اوخو!
شن ماهنیلار اوخو!
قوی داها مؤحکم گورلاسین نغمه‌ن!
اوخو، سئوگیلیم،
ائله اوخو، قوی بیلسینلر کی،
فدایی اولدوغونو
اونوتمامیسان سن.

تاریخ
2019.05.07 / 21:03
مولف
آیتاج آراز
شرح لر
دیگر خبرلر

اولدوزلار قیقاجی پاریلتیلارینی... - شعر

بو اوندان دا بَرک قاچاردی!

سسیم سکوتا بوروندو،غزل‌لریم اوشودو - نادر الهی

«توران»-دئییب بوز قورد کیمی دورانا.- شعیر

سنين گؤزلريندن باشلاندي زامان... - سعید موغانلی

ائله اینسانلار تانیدیم کی، تبریز دئینده گؤزلری دولوردو...-حکایه‌

معشوقون آیاغی هارایا دَئیسه، اوراسی عاشیقه وطن کیمی دیر...

آچ وئر یئله هؤروکلرینین زنجیرین گولوم - شعیر

ساچلاری، اوره‌ک اوسته سردیم- شعیر

سنسیزلیگه دؤزمک نه سایاق ممکن اولارمیش - شئیر

خبر خطّی
 
Axar.az'da reklam Bağla
Reklam
Bize yazin Bağla