Axar.az
یوخاری
26 اییون 2019


قارانلیق محبس دَه یاتان بیر اَری...

آنا صحیفه ادبیات
12 Punto 14 Punto 16 Punto 18 Punto

دار آغاجی

رحمتلیک فریدون ابراهیمی نین یۆكسك دۆشۆنجە و يئنيلمز اينامينا ايتحاف اوْلونور.

چاغيردی دوستاغين گؤزَتچیلری،
قارانلیق محبس دَه یاتان بیر اَری.

: بو گۆن آزادلیغین گۆنۆدۆر سنە،
اَل گؤتۆر بو ايشدن، گيريشمە يئنە.

عاییله-ن قاپیدا سنی گؤزلَه ییر،
گَل قانون قارشیندا سوْن دؤنه اَییل.

بوراخ بو بوْشونا موباریزه نی،
یوْخسا یوْخ ائده ریک بیر آن دا، سنی.

ایکی یوْل اؤنۆندە، سئچيم سنينلە
سوْنون بو يوْللارين بيز دييە-ك، دينلە

هَن دئسن بو آن دا آزاد اوْلورسان،
یوْخ دئسن سارالیب بو گۆن سوْلورسان.

ائشيكدە عاییله-ن اینتیظاردادی
یوْخسا بو آخشاما باشین داردادی.

اوْ سینماز ایگیدین دوْداغی قاچدی،
بیر آز دویغولانیب، سوْنرا سؤز آچدی.

دئدی: بو قانون یوْخ، بۆتۆن ظۆلۆمدۆ
بو ظۆلمە باش اَی مك، منە اؤلۆمدۆ

ایکی شرطیم واردی هَن دئیه-م سیزه
اینامیم اوغروندا چؤکه رَم دیزه.

بیرینجی تَر-تمیز گئیینَم گرک،
سیزدن قورتارماغا چیرپینیر اۆرك

سوْن دؤنه ائلیمین شانلی بایراغین
بیر آن، دار آیغیندا کؤکسۆمە تاخين

گئديم دار آیغینا اۆرك دؤیۆنسۆن
من تؤوبه ائیلَه ییم، جللاد سؤیۆنسۆن!

٭٭

بيردە بير قيزيل گۆل سانجيم ياخاما
او‌نو ايتحاف ائدیم عزیز آناما.

بو سؤزۆ حاکیمه تئز یئتیردیلر
اوْنون ایسته یینه بوْیون اَیدیلر

گئییندی داماد تک پئنجک شالوارین
تاخدی سینه- سینه، شانلی بایراغین

ویقارلا یوْللاندی دارین دیبینه
اَللرین اوزاتدی دارین ایپینه

اؤپه-رَک دار ایپین بوْینونا سالدی
جللاد دا، حاکیم دَه بۆتۆن مات قالدی

دئدی "من اؤله-رک دیری قالیرام
ائلیمین شرفین ساتین آلیرام

کؤکسۆمدە بايراغيم داردا اَسَرم
وارليغين دانانين كؤکۆن كَسَرم

بايراغيم اوْلاراق اَسَرم بو آن
سن ائی ظالیم جللاد، من اَسدیکجه یان".

بایراقلا ویقارلی او‌ْ دالغالاندی
گۆلۆشۆ سمايە بير آن جالاندی

گۆلۆش دوْداغيندا، يومدو گؤزلرین
قوْووشدو تاریخه، دئدی سؤزلرین

"سن ائی گؤزل یوردوم، ائی آزربایجان
یئنیلمز بایراغین، جان سنه قوربان"

«یاکاموْز» یازدیقجا، اۆرك داغلادی
اؤلۆمدن( فيريدون*) بئلە باج آلدی.

٭٭

سؤیۆندۆ = سئویندی

*آزربایجانین باش ساووجیسی ( دادستان کل حکومت ملی ) فریدون ابراهیمی متولد۲۹ آبان ۱۲۹۷ هجری شمسی آستارا، شهادت اوّل خرداد ۱۳۲۶ هجری شمسی تبریز.

حبیب ساسانیان (یاکاموز)

تبریز دوستاغی: 2017

تاریخ
2019.05.23 / 12:11
مولف
Axar.az
شرح لر
دیگر خبرلر

بیزی اوراقلاییب ایکی بؤلدولر آرادا گوناهی آراز آپاردی - شعیر

یا گره‌ک بیز جوانلاشاق، یاداکی...-حکایه‌

بو دولانباج کوچه‌لردن باخاسان، بايدا جوجرمير نييه بس؟ - شعر

مین سطیر باخیش یازیلیر گؤزلریمه - شعیر

سیخیلما، قونماغینا بیر اوره‌ک وطن گؤرونور- شعیر

من سنه نه یازیم ،صمد؟ - سهند

هر هارا باخیرام سنی گؤرورم - شعیر

من یاتاغین ایکینجی مرتبه‌سینده یاتانمارام. یئریمی ده‌ییشین

سؤندورولموش اوجاغین دا یادداشی وار- شئیر

گاندی هندوستانین اؤزگۆرلۆک باشچیسی نئجه‌ده گؤزل یازمیش حیات یولداشینا

خبر خطّی
 
Axar.az'da reklam Bağla
Reklam
Bize yazin Bağla