Axar.az
یوخاری
25 اییون 2019


دومانلی تبریز ۱۱۲-اینجی بؤلوم

آنا صحیفه ادبیات
12 Punto 14 Punto 16 Punto 18 Punto

کؤچورن: فرخ جرایدی

من حاجی خان-دان :

« حکومت-ه گئتمه‌دینیزمی ؟ » دئیه سوْروشدوم.

« حکومت کیم دیر کی؟ بیزیم اؤزوموز حکومتیک. منیم آنام عباس میرزا، نایب السلطنه نین قیْزیدیر. اوْ آتاسیندان سوْنرا دوْغولدوغوندان بۆتۆن قاجار خاندانی اوْنو سئویردی. حاجی خانیْم بۆتۆن ایران دا آدلیْم دیْر. ناصرالدین شاه اوْنا ' بی بی ' دئیه‌رک الیندن اؤپردی، مظفرالدین شاه دا تبریزده ولیعهد اوْلدوغو زمان آنام گلمه‌دن سۆفره‌یه اوْتورمازدی. من گنجه‌لی لرین ظلموندن شکایته گئتدیم اؤزوم ده تبریزه گئدنده مظفرالدین-ین ائوینده قالاردیم. اوْ دا منیم دردیمه چاره تاپا بیلمه‌دی : « سات یاخانی قوُرتار تزار تبعه‌سی دیرلر . » دئیه منی یوْلا سالدی. ایکینجی دفه ده اوْنا قاییداندا یئنه : « مۆلکونو سات اوْنلارا، باشقا یئرده سنه کند وئریم. » دئدی. نه ایسه کندلریمی ساتماق اۆچۆن تبریزه گئتدیم، هر کسه دئدیمسه : « قوْنشون تزار تبعه‌سی دیر، باشارا بیلمه‌ریک. » دئیه کندلریمه دَیر وئرمه‌دیلر. آلماق ایسته‌ینلری ده آدام گؤندریب قوْرخوتدولار. آخرده اوْنلارا قوْنشو اوْلان اۆچ کندیمی یۆزمین تۆمنه ساتدیم، بیر حالدا کی اۆچ کندین بیر ایللیک گلیری یۆز اَللی مین تۆمن ایدی. »

« بوُنونلا یاخانیز قوُرتاردی می ؟ »

« خیر ، اوْنلار ایکی ایل یاخشیدان-پیسدن کئچیندیلرسه‌ده، سوْنرا باشقا کندلریمده ده همان اوْیونلارین باشلادیلار. آخرده کندلی لری اۆزه‌ریمه قالدیردیلار. من کندلی لری سوُچلو گؤرمورم، اوْنلارین دا حقی وار، چۆنکو منیم الیمده قالدیقجا، ازیله‌جکلر ایدی، آخرده ساتدیم، قوُرتاردیم، اوْنلارا قوْنشو اوْلان بۆتۆن کندلریمی دَیر-دَیمزینه اللرینه کئچیردیلر. »
« بس ایندی نئجه یوْلا گئدیرسینیز؟ »

« بلی اَل چکمیشلر، چۆنکو قوْنشولوغوموز یوْخدور. بیرده اوْنلار بؤیوک ایشلره باشلاییب لار. گرگر کیمی شَهَری اوُدوب ایندی ده علمدار-ی یئمک ایسته‌ییرلر. علمدار آلیْنارسا اوْندان سوْنرا نوبه منیم الیمده اوْلان لیوارجان-ین دیر. ایندی لیوارجان دا گنجه‌لی لرین اللی دن آرتیْق جاسوس-و واردیر. » دئیه خان بیر آه چکدی.

« آغا لاپ قیسساسین دئییم کی بوُ ساعت ایراندا کندلی ده مظلوم دور، مۆلکه‌دار دا مظلوم دور. چۆنکو حکومت گۆجسوز دور. قوْرویوجوموز یوْخدور. »

« نه ائتمه‌لی. اوُشاقلار بؤیوموشدور، قیْزلار دا نشانلانمیش دیر، اَرلری تهراندا بؤیوک ایش ییه‌سی دیر. بوُرادا یاشاماق امکانی اوْلمازسا ییغیْشیب تهرانا گئده بیلره‌م، لاکن بوُ باغلار، بوُ گؤزل کنده حیف-یم گلیر، اؤزللیکله آنام-ین یادگاری اوْلان بوُ دام-داشی بوُراخیب گئده بیلمیرم. »

بیز باغچادان قاییدیب بالکن-ا چیْخدیقدا خانیْملار دا حمامدان گلمیشدی، اوْتوروب چای ایچدیک. چای دان سوْنرا خاجی خان :

« ایندی ده بوُیورون آنام-ا آتاسی عباس میرزا دان یئتیشن سوْوخانی

( میراث، ماترک) گؤرونوز. » دئدی.

اوْن ایکی اوْتاق گؤردوک، هامیسی دؤشنمیشدی. حاجی خان یئره دؤشنمیش خالچالارین تاریخینی اوْخویوردو .

حاجی خان باشقا بیر اوْتاغی دا آچاراق:

« بوُدا رحمتلیک آنامیْن اوْتاغی دیر، بوُ اوْتاقدا اوْلان شئی لرین هامیسی بابامدان قالان شئی‌لردیر. » دئدی.

تاریخ
2019.06.01 / 11:33
مولف
محمد سعید اردوبادی
شرح لر
دیگر خبرلر

مین سطیر باخیش یازیلیر گؤزلریمه - شعیر

سیخیلما، قونماغینا بیر اوره‌ک وطن گؤرونور- شعیر

من سنه نه یازیم ،صمد؟ - سهند

هر هارا باخیرام سنی گؤرورم - شعیر

من یاتاغین ایکینجی مرتبه‌سینده یاتانمارام. یئریمی ده‌ییشین

سؤندورولموش اوجاغین دا یادداشی وار- شئیر

گاندی هندوستانین اؤزگۆرلۆک باشچیسی نئجه‌ده گؤزل یازمیش حیات یولداشینا

سالمادی سئوگی منه سایه بو عالمده - شئیر

گؤزلریندن داملایان یازیلمامیش شعرلریمدی- شئیر

دادستان‌ین مجوز ایله، سیزین ائوی آختارمالییق..-حکایه‌

خبر خطّی
 
Axar.az'da reklam Bağla
Reklam
Bize yazin Bağla