Axar.az
یوخاری
27 اییون 2019


اصغرین گوزوندن تیکه دن شیمیش تورپاقلی اوزونه یاش آخدی - حکایه

آنا صحیفه ادبیات
12 Punto 14 Punto 16 Punto 18 Punto

کولت. آذ علی اشرف درویشیانین "آلچا تورشوسو "آدلی حکایه‌سینی تقدیم ائدیر:

چئویرن: سحر خیاوی

کوچه یه یئتیشرکن ، ننه کی حیطده حوض قیراغیندا قاب یویوردو بیزی هایلادی:"هله هوله آلمایین ها! قارنیز آغرییار.پولونوزا خورما آلین یوخسا بیر شئی کی دویورا".

یوخولو و یورغون یولا دوشدوک.گونش تزه اوجا داملارین قیراغینا و چینارلارین باشینا دوشموشدو.سئرچه لر های هارای سالمیشدیلار.اوزاق دا کی داملارین اوستوندن میلچتکَن لر(پشه بندلر) گونش آلتیندا ایشیلداییب گوزلریمیزی قاماشدیریردیلار.اوچوموزده اسنه ییردیک.یای ایدی امما هله ده سازاق تزه سو سپیلمیش کوچه لردن بدنیمی اوشودوردی.اوره ییم چیرپینیردی.تنبل ایدیم.ایستیردیم قاییدام ائوده یاتام.اللریمی زنبه یارالامیشدی.

بیزیم صاحیب خانامیز شهرین یوخاری باشیندا اوزونه باشقا بیر ائو تیکیردی.من ، اکبر و اصغر اونا ایشله ییردیک.تورپاق غربیلله ییردیک.کرپیج و پالچیق بنا الینه یئتیریردیک.داش داشییردیق. و زنبه یله اتاقلارین کفین دولدوروردیق.ائو صاحیبی قول وئرمیشدی ائوین ایشی قورتاراندا هره میزه بیر دست کت شالوار آلسین.

هر گون ننه ناهاریمیزین پولون وئریردی و بیزی یولا سالیردی.بازارچادان کئچنده بامیه سینی لرین گوءررکن آیاقلاریمیز سوستالیردی.سینی نین بوءیرونده اوتوروب پوللاریمیزین هامیسین بامیه یئییردیک و آخشاماجا آج و پولسوز قالیردیق.

ننه درزی لیکله ائوین خرجین چیخاردیردی.بالاجا باجیم عذرادا اونا کوءمک ائدیردی.بابا باغ اجاره ائله میشدی.یایلار ایشی ائله بویودو.

عذرا آخشام اوشاقیانا و شیرین دیلیله بیزه دئییردی:"ناهار یئیه نده، ننه دئییر:آه...آی اللاه کئشگه ایکی قانادیم اولایدی الان اوچایدیم بو قاتیق-خیاری آپارایدیم بالالاریما.آخ الان او داش تورپاق ایچینده نه یئییرلر؟اللاه ائله میش ناخوش اولماسینلار".

ننه بیلمیردی کی بیز همن صوبح تئزدن مختصر پولوموزو خرجله ییریک و آخشاماجا پول چیخارتماغا هر قاپییا ویریریق.

بیردنه ده در آمد یوللاریمیزدان چورک خانایا خمیر تشتی آپارماق ایدی.بیر قادین واریدی اوءزو خمیر یاپیردی و آپاریردی چورکچی اونا مخصوص چورک پیشیرسین.اکبر خمیر تشتین باشینا آلیردی، آپاریردی چورکچی یه ایکی قیران آلیردی.اصغرده باطله کاغیذلاری کوچه دن توپلاییب باققال یوسف عمی یه وئریب اودا ایکی قیران آلیردی.

بیر گون یوسف عمی کاغیذلاری واراقلایاندا یئکه بیر تویوق پوخو کاغیذلارین آراسیندان تاپدی.داها بیزدن کاغیذ آلمادی.

ناهار یورغون و آج اوتوروردیق آزجا چورکله کی واریمیزیدی باشیمیزی قاتیردیق.یدالله عمی فهله یدی هر گون ناهارا طالبی آلیردی.بیر گون دوره سینده اوتورمیشدیق.طالبی نی سیندیردی .طالبی قورتلامیشدی.ایچی قارالمیشدی.گولدوک.یدالله عمی عصبله شیب دئدی:" گله ن دوءنه دن داها طالبی آلمارام.نه دن ایچی گوروکمه ین بیر شئی آلیم هن؟اوزوم آلارام.سیزده آز گولون.مگر ایندییه جن قورتلامیش طالبی گورمه میشدینیز؟"

سونرا طالبی نی چوله آتدی و بیز گیزلیجه اونو گوتوروب یئدیک.

بیرگونده چوخ آجیدیق.بیر اوغلانجیق بیر پاکات دولو خرمایلا کوچه دن کئچیردی.اوغلان گوزل کت شلوار گئیمیشدی.اوزون ساچی واریدی.خرما بیزیم آج قارنیمیزی تحریک ائله دی.اکبره دئدیم: " الیندن خورمانی قاپیب قاچیردا بیلرسن؟"

اکبر آغزینین سویون اوتدو دئدی:" هه.هه داداش جان.الان"

اکبر قاباغا گئدیب سوروشدو:"آغا اجاق زاده نین ائوی هارادی"؟

اوغلان اطرافا باخاندا، اکبر خورما پاکاتین قاپدی قاچیرتدی.اوغلان های هارایلا ائوه گئتدی.آناسی و نئچه نفر قوهوملاریندان گتیردی.قورخودان اسیردیم.اوغلان منه اوز چئویریب دئدی:"بیر قیرمیزی کوینک اوغلانیدی.ائله بو ائوده ایشله ییردی.هارا گئتدی؟"

دئدیم:" بیلمیرم.اصلن اونو تانیمیرام".

اکبر اوزاقلاردان دیوارین کناریندان باشین اوزادیب باخیردی.من اونو گوروردوم.

اوغلان آناسیلا گئتدی.امما اکبر گون باتینجا اوزاقلاردا دورموشدو.اوره ک ائله میردی بیزیم یانیمیزا گلسین.

اصغرین بیر چوبوق صاندیغی واریدی. اوستا بنا آدین قویموشدو:" بدبختلیک صاندیغی".چونکو نئچه تیکه قورو چورک صاندیغین ایچینده یدی.و همشه ده او صاندیغین اوستونده بیزیم آرامیزدا ساواش و چیرپیشما اولوردو.

صاندیغی ائودن بویات چورکله دولدوروب ایش یئریمیزه آپاریردیق.بعضن ده اصغر پیسپیستا یا چکیرتگه توتوب بدبختلیک صاندیغینا آتیردی.

آخشام توز تورپاقلی و یورغون ائوه یئتیشیردیک.ایشتاهلا هر نه سوفرادا وار یئییردیک.اصغر تیکه بوغازیندان گئتمه میش، خورولتوسی اوجالیردی.ننه اونو اللری اوسته یئرینه آپاریردی و غملی اوخویوردی:"آی بالاجا چوءرک گتیره نیم؛ آی تورپاقلی پیشیگیم.قابارلی و چاتلامیش اللرینین قوربانی اولوم.عزیزیم"

آخشام یاتاندا دئییردیم کئشگه هئچ واخت اویانمایام.صوبح یئنه گرک زورلا اویانیب ایشه گئده یدیک.

بیر گون ناهار چاغی یاریمچیق دیوارین کناریندا اوتورمیشدیق.

هاوا بورکویدی.آغزیم تورپاق دادی وئریردی.اکبرین گوزو قیزارمیشدی.آغریییردی.آهک قیریغی گوزونه چیرتلامیشدی.

آج و بئحالیدیق. بنا فهله لر تزه تاوانی دوزلمیش اوتاق دا اوتورمیشدیلار.ناهار یئییردیلر.

گونش گوءیون اورتاسیندایدی.بیر کیشی الینده بیر تیکه بوز روزنامه آراسینا قویموشدو سورعتله سووشدو.

بیردن قارا چرشابلی بیر قادین گوردوم.حیطه طرف گلیردی. اوزاق دان منه ایشاره ائله دی.یاخینا گئتدیم.ننه یدی.پورتومیشدی.اوز گوزوندن تر آخیردی.او قدر یولو پیادا گلمیشدی!! نیگران اولدوم.

ننه چرشابین قیراغا ووردو.اونون آلتیندان باغلی بیر مندیل منه وئردی.دئدی:" بوگون آلچا شورباسی پیشیرمیشدیم.سیزسیز یئیه بیلمه دیک .عذرانی ائوده قویدوم.سیزین پایینیزی گتیردیم.ایستیکن یئیین.یاخشی شوربا اولوب.نوش اولسون جانیزا بالالاریم".

ننه نین آشنا اییی ایسته ملی شوربا اییی له قاریشیب حالدان حالا چئویردی منی.دئدیم:" ننه جان اللرین آغریماسین".

اکبر و اصغرده خبر اولدولار گلدیلر.ننه تورپاقلی اوزلرین اوءپدو.اکبرین قیزارمیش گوزون گوءررکن اوزونه سیللی ووردی.یاش گوزلرینده دالغالاندی و...گئتدی.

باغلی دستمالی آچدیق.اوستونده کی دوءیولموش ات ایچینده اولان بوشقابی گوتوردوک کنارا قویدوق.چورگی ات سویوندا تیلتا ائله دیک.اصغر بیر تیکه دوءیولو ات دن یئدی.اکبر باشینا بیر قاپاز سالدی.دئدی:" اوءنجه گرک سویون یئیه ک.نه دن الی اوزونلوق ائله دین؟ مگر بیری اته ال وورموشدو سن ده ووردون؟"

اصغرین گوزوندن تیکه دن شیمیش تورپاقلی اوزونه یاش آخدی.ناراحات اولدوم.اکبرین سینه سینه یومروق ووردوم.اکبر تپیک له شوربا کاساسین حیطین اورتاسینا توللادی.قان گوزلریمی توتدو.داها بیلمه دیم نئینه دیم.الیمی دویولموش اته سالیب چنگه له ییب تورپاقلارا توللادیم.اوچوموزده آغلادیق.اوستا بنا یدالله عمی دن سوروشدو:"نه اولوب بو اوشاقلارا؟نه دن بو گون ایت پیشیک کیمی بوغوشورلار؟"

یدالله عمی جاواب وئردی:" نه بیلیم.بلکه دده لرینین مئراثی اوستونده ساواشیرلار.بلکه ده بدبختلیک صاندیغین آچیبلار".

گوزلریمی کوینه گیمین قولویلا سیلیب.غربیلی گوتوروب تورپاق جوماسینا طرف گئتدیم....

تاریخ
2019.06.05 / 18:03
مولف
آینورا مممدووا
شرح لر
دیگر خبرلر

خانیم سیچان اعصابین، آغا سیچان خان قاتیب - اوشاق ادبیاتی

سینیرلاراوزه رینه چکیلمیش تیکانلی مفتیل - شعیر

بیزی اوراقلاییب ایکی بؤلدولر آرادا گوناهی آراز آپاردی - شعیر

یا گره‌ک بیز جوانلاشاق، یاداکی...-حکایه‌

بو دولانباج کوچه‌لردن باخاسان، بايدا جوجرمير نييه بس؟ - شعر

مین سطیر باخیش یازیلیر گؤزلریمه - شعیر

سیخیلما، قونماغینا بیر اوره‌ک وطن گؤرونور- شعیر

من سنه نه یازیم ،صمد؟ - سهند

هر هارا باخیرام سنی گؤرورم - شعیر

من یاتاغین ایکینجی مرتبه‌سینده یاتانمارام. یئریمی ده‌ییشین

خبر خطّی
 
Axar.az'da reklam Bağla
Reklam
Bize yazin Bağla