Axar.az
یوخاری
16 فئورال 2019


میللی-معنوی دَیَرلریمیز، کیملیک وثیقه‌میزدیر

آنا صحیفه کولت
12 Punto 14 Punto 16 Punto 18 Punto

کولت آذ ووقار نعمت-ین یازیسینی تقدیم ائدیر:

میللی-معنوی دَيَر آنلاییشی اؤزونده بؤیوک بیر معنانی داشی‌ییر. معنوی ديَر دئدیکده عصیرلر بویو خالقیمیزین یاراتدیغی اخلاقی و مادی ده‌یرلر سیستئمی نظرده توتولور. طبیعی کی، هر بیر خالقین وارلیغی، او خالقین میللی کیم‌لییی، ایلک نؤوبه‌ده اونون میللی-معنوی ديَرلرینده عکس اولونور. هر هانسی بیر ائتنوسون میللی-معنوی دَيَرلر سیستئمینی اونون الیندن تامامی‌یله آلمیش اولساق، او زامان همین ائتنوسون آدیندان ساوایی هئچ نه‌یی قالماز.

بیزیم میللی دَيَرلریمیز عصیرلر بویو خالقیمیزین حیاتیندا، یاشاییشیندا فورمالاشمیشدیر. میللی دَيَرلری اولمایان میللت حقیقی میللت، حقیقی خالق اولا بیلمز... بیز هئچ واخت اؤز میللی دَيَرلریمیزی اونوتمامالی‌ییق. اونو یاشاتماق، اوندان فایدالانماق، روحلانماق، حیاتیمیزین اساس ایستیقامتی، گله‌جک اوغورلاریمیزین قارانتی‌سیدیر.

قدیم دؤولتچی‌لیک تاریخینه و عنعنه‌سینه مالیک اولان آذربایجان تورک خالقی هر زامان میللی دَيَرلرینه صادیق قالاراق بو دَيَرلری عصیرلرله یاشاتمیش و اینکیشاف ائتدیرمیشدیر. میللی دَيَرلریمیزین قورونماسی و گله‌جک نسیل‌لره چاتدیریلماسی بو گون ده اؤز آکتواللیغینی قورویوب ساخلاییر. چون کی میللی دَيَرلریمیزین آذربایجان خالقی‌نین فورمالاشماسینا تأثیری بؤیوک اولدوغو کیمی، میللی دؤولتچی‌لیییمیزین قورولماسیندا و مؤحکم‌لندیریلمه‌سینده ده خوصوصی رولو اولاجاقدیر.

میللی دَيَرلریمیزه عادت-عنعنه‌لریمیزه بیگانه موناسیبت، گله‌جه‌ییمیز اوچون یاخشی هئچ نه وعد ائتمه‌ییر. تاریخ‌دن معلومدور کی، اؤز سوی‌کؤکونه، تاریخینه، میللی دَيَرلرینه اینانج‌لارینا دؤنوک چیخان شخص‌لر، میللت‌لر و دؤولت‌لر بللی بیر زامان کسیمینده اریییب، یوخ اولموش و تاریخ صحنه‌‌سیندن بیر دفعه‌لیک سیلینمیشدیرلر. هر هانسی بیر خالقی، دؤولتی محو ائتمک اوچون اونو میللی دَيَرلریندن آییرماق کیفایت‌دیر.

میللی ديَرلر دئینده، میللی ایدئولوژی، میللی تاریخ، میللی دیل، میللی مدنییت، و اینجه‌صعنت، میللی قهرمانلار، میللی ادبیات، میللی اؤزونودرک، عائله‌‌، داهی‌ شخصیت‌لریمیز، میللی موسیقیمیز، موغاملاریمیز، گله‌نکسل تؤره‌نلریمیز، فولکلوروموز: هانسی کی بورا بیزیم یادداشیمیز، ائتنوس-یادداشی، میللت، خالق-یادداشی داخیل‌دیر. بیر سؤزله، میللی اولان بوتون نائلییت و کئیفيت‌لریمیز میللی دَيَرلر سیستئمینه عایددیر.

بیر توپلومون وارلیغی‌نین قورونوب ساخلانماسی اوچون هر شئی‌دن اؤنجه اونون وارلیغینی اؤزونده یانسیدان میللی-معنوی دَيَرلرینین قورونوب ساخلانیلماسی لازیمدیر. آما تأسف‌لر اولسون کی، ۲۱-جی عصیرده قلوباللاشما دئدیییمیز سوره‌ج (پروسئس) آرخاسیندا گیزله‌نن سؤمورگه (استثمار) ماشینی موختلیف خالق‌لارین میللی-معنوی دَيَرلرینه موختلیف فورمالاردا ، گیزلین و آشکار شکیلده تجاووز ائدیر و اونو محو ائتمه‌یه، سیرادان چیخارماغا چالیشیر. اویسا آنلامامیز گره‌کن بو کی، قلوباللاشما، چاغداشلاشما، موعاصیرلشمه اورقانیزاسییا دَيَرلرین یوخ اولماسی دئمک دئییلدیر.
قلوباللاشما ایله مانقورتلاشمانین سینیر جیزگی‌لری آییرد ائدیلمه‌لی و بیلینمه‌لیدیر. بونلاری قاریشدیرانلارین دا معاریفلندیریلمه‌سی گره‌کیر. بیر شخصی و یا فردی منفعته و ائگویا قوربان وئریلن میللی-معنوی دَيَرلریمیزین قورونماسی‌نین پروقرام و مئکانیزمی اوزه‌رینده داها جیددی دوشونمه‌لی‌ییک آرتیق.

بو گون بعضی‌لرینین اینکیشاف آنلاییشی داها چوخ بیزیم توپلومون تاریخی یادداشی‌نین، اونون دوشونجه‌سی و بئینی‌ندن سیلینمه‌سینه یؤنه‌لیب: خیریستیان آوروپا آنلاییشی محض قلوباللاشما دئدیییمیز سوره‌ج (پروسئس) آرخاسیندا، یاخود بئین‌الخالق استانداردلار آدی آلتیندا بیزه سیرینان بیر چوخ ديَرلر بیلاواسیطه‌‌ بیزیم تاریخی یادداشیمیزین سیلینمه‌سینه خیدمت ائدیر. بو گؤز قاباغیندادیر. یعنی تاریخی یادداشی سیلینمیش بیر اینسان، «چینگیز آیتماتوو»ون ایفاده‌سی ایله دئسک، بیر مانقورتدور. بئینیندن تاریخی یادداشی سیلینمیش بیر میللت آرتیق اونو سیلن خالقین کؤله‌سی‌دیر. بو توپلوم چوخ راحات ایداره اولونان کوتله‌یه چئوریلیر. بوگون بو استراتئژینی باتی چوخ گؤزل منیمسه‌دییینه و آراشدیردیغینا گؤره یاخشی بیلیر کی، آرتیق میللت‌لری، تورپاقلاری، جوغرافیالاری، اینسانلاری فیزیکی جهتدن ایشغال ائتمه‌یه هئچ بیر احتیاج یوخدور. بونون اوچون اینسانلارین بئینینی ایشغال ائتمک لازیمدیر.

اوز کولتورو ایله ایلیشکیسی اولمایان بیر اینسان اؤلکه‌سینه یابانجی‌دیر دئمیش‌دیر، ایندی آدینی خاطیرلامادیغیم بیر دوشونور. بو گون بئینی، دوشونجه‌سی استثمارچی دوشونجه‌لر طرفیندن ایشغال اولونموش بیر سیرا گنج‌لیییمیزین همین حیصه‌‌‌سی بیزیم دئییل.

تاریخ
2019.01.01 / 13:27
مولف
ووقار نعمت
شرح لر
دیگر خبرلر

«باریش» موسیقی قروپونون کنسرتی لغو اولوندو-مرندده

بؤیوک تورک متفکری-حسین نیهال آتسیز

۲۰-جی عصرین ایلک آنا دیلی درسلیگی...اونیکال نشر - فوتو

شرقین ناپلونو - مشهور افشار تورکو -ویدئو

عمادالدین نسیمینین «دیوان»ینین نادیر الیازماسی

«نسیمی ایلی» ایله باغلی اؤزبکیستان‌دا تدبیرلر کئچیریله‌جک

عصرلر سونرا آچیقلاندی: خرمین مکتوبلاری

اورمییه‌یه کؤچ ائد‌ن تورک طایفاسی-قاراپاپاقلار

ایستیقلال مارشینا گؤره تعقیب اولونان-بؤیوک تورک متفکری

"دیرنیش اپوسو» کیتابینین تقدیماتی یئنی‌دن لغو ائدیلدی

خبر خطّی
 
Axar.az'da reklam Bağla
Reklam
Bize yazin Bağla