Axar.az
یوخاری
23 آپرئل 2019


دومانلی تبریز ۲۰-اینجی بؤلوم

آنا صحیفه کولت
12 Punto 14 Punto 16 Punto 18 Punto

کؤچورن فرخ جرایدی

حاج علی آدام گؤندریب ثقة الاسلام-ی ، اوْنون یانیْنا گئده‌جگیمیزی خبر وئردی.

مجتهد یاشادیْغی ائو سیْرخاب قاپیْسی دئییلن چای کناریندا دیر. قاپیْنی دؤیدوکده دؤرد-بئش نفر بیزی قارشیْلادی . مجتهد اؤزۆده دیْشاریدا دوُروب بیزی گؤزله‌ییردی . ذاتن بوُنون اؤزۆده بؤیوک آداملاردا تجربه‌دن کئچیریلمیش بیر دیپلماتلیْق دیر ، چۆنکۆ ائوه حرمتلی آدام ، قوْناق گلدیکده اوْنون آیاغیْنا قالخماماق بیر ادب سیزلیک حساب اوْلونور . فقط هر کسین آیاغیْنا دوُرماق دا بؤیوک آداملارین شأنینی آزالدیْرمیش . بوُنا گؤره ائوه قوْناق گلجه‌گینی بۆلن بؤیوک آداملار اؤنجه‌دن آیاق اۆستۆنده دوُروب قوْناق گلر کن اوْنون آیاغیْنا دوُرماغی لازم گؤرمزلر .

مجتهد بیزی گؤره‌ن کیمی ال وئردی و سؤزه باشلادی:

« آللاه بیلیر کی بیراز دا تأخیر ائتمیش اوْلسایدینیز کۆچه‌یه قدر گله‌جکدیم . دوْغروسو بوُ گۆن سیزینله گؤرۆشمک اۆچۆن اؤزۆمده فوْق العاده بیر میل حس ائدیرم».
حاج علی منی مجتهده تانیْش وئردی . مجتهد ایکینجی کَره الیمی سیْخیب دئدی:

« بوُنو دا اؤزۆم اۆچۆن نازل اوْلموش بیر نعمت حساب ائدیرم».

مجتهد بیزی اؤزۆنۆن اوْتوردوغو اوْتاغا آپارمادی . قوْناق اوْتاغیْنا کئچیردی . اوْتاق تمامیله آوروپا اصولوندا دؤشنمیشدی . اوْ بیزی اَیلَشدیردی ، سوْنرا دا اؤزۆ اوْتوروب سؤزونه دوام ائتدی .
« اوْتاق بیزیم اوُشاقلارین ذوْق ایله دۆزلمیشدیر . اوْنلاری اجنبی دیللرده اوْخوتموشام . اؤزۆمۆنده اؤیرنمه‌گه میلیم واردیر . بوُنو هر بیر تبریزلییه ده مصلحت گؤرمۆشم . »
مجتهد بوُنونلا اؤزۆنۆ یئنی آدام اوْلدوغونو بیلدیرمک ایسته‌ییردی . دوْغرو دان دا باشقا موللا لارا گؤره ثقة الاسلام دا یئنی‌لیک آز دگیلدی .
چای ، قلیان گتیردیلر . باشقا صحبتلرله واقتی کئچیرمک ایسته‌میردیم ، چۆنکۆ باشقا یئرلره ده گئده‌جکدیم . اؤزللیکله بوُ گۆن منیم ستارخان لا گؤروشمه‌مه‌ییمده یاخشی اوْلمازدی . اوْنون اۆچۆن ده لازم مساله‌لردن سؤزه باشلاماغا تله‌سیردیم . اجازه آلیْب و سؤزو باشلیْق سیْز اوْلاراق دانیْشماغا باشلادیْم.

« جناب ثقة الاسلام! ایراندا انقلابین رهبری قووه‌لری ایله اجرا ائدیجی قووه‌لری آراسیْندا کی علاقه حاققیندا فیکرینیز نه دیر ؟ »
« گلین بیز بیر دیپلمات کیمی یوْخ ، صمیمی بیر یوْلداش کیمی دانیْشاق . انقلابیْن رهبرلیک ائدیجی قووه‌لری ایله ، اجرا ائدیجی قووه‌لر آراسیْندا کی علاقه حاقیندا سؤز چوْخدور . چۆنکۆ آخیْرینجیلار بوُنا هئچ واقت دَیر وئرمیرلر».

« ایندیه قدر سیز ایسته‌سئیدینیز هم ستارخان لا ، همده باقرخان علاقه دۆزه‌لدر و انقلابیْن متشکل گئتمه‌سینه کؤمک ائده بیلردیز .
اؤزللیکله سیز قافقاز دان گلن جانلی قووه‌لره ده اؤنم وئرمه‌لی‌سینیز».

ثقة الاسلام سؤزلریمه دقت‌له قوُلاق آسیْر و یُسر تسبیحینین دانالارین یاغیْش دانالاری کیمی بیر-بیرینین اۆزه‌رینه تؤکۆردۆ. اوْنون راضیلاشدیریجی بیر جاواب سؤیله‌یه‌جگینی گؤزله‌ییردیم . تسبیحی یانیْندا کی چای ماساسینین اۆزه‌رینه بوُراخدی . اؤز گؤوده‌سینی اوْ کی لازم دیر دۆزه‌لدیب :

« سیز البته ایرانی چوْخ یاخشی تانییرسینیز » دئیه سؤزه باشلادی.

« آز-چوْخ تانییرام ».

« ایران حیاتینی آراز چای‌ نین اوْ بیری طرفینده کی حیات لا توُتوشدورماق عاغیْلی آدامین ایشی دگیل . اوْرادا حیات باشقا ، بوُرادا ایسه بام باشقا دیر . روُس ایشچی سی ایچه ریسینده آپاریلان ایشی ایران کندلی سی ایچه ریسینده آپارماق دوْغرو بیر ایش دئییل ، چونکو روُس ایشچی سینین معده هضم ائده بیله جک بیر خوْره گی ایران کندلی سینین معده سی هئچ واقت هضم ائده بیلمز . من اؤزوم قافقاز یا سوْسیال-دئموکرات لارینین بوُ اینقلابدا اشتراک ائتمه سینی تبریک ائدیرم . البته بوُ همرنگ لیگین اوْلدوقجا بؤیوک قیمتی وار.

تاسسوف لر اوْلسون کی اوْنلار یئرلی شرایط ین و یئرلی خالقین روحونو بیلمیرلر . بیر حالدا کی بوُنلارین آراسیندا کی فرق یئر دن - گؤیه قدر دیر . شرقین مولکه دارینی دا ، غربین مولکه دار ایله توُتوشدورماق اوْلماز . شرقین اسیری ده روسیه ده کی اسیره بنزه مز . بوُ ایکی یئرین مظلوملاری بئله بیر-بیرینه اوْخشاماز . رفیق ، هئچ بیر کس اینقلابی اؤز دوشونجه سی ایله اداره ائده بیلمز.

هر محیطین دوْغدوغو اینقلابی اوْ محیطین شرایطی ایله آچماق لازیمدیر. بیزیم سوْسیال-دئموکرات لاریمیز بوُ اینقلابی اؤز بیلدیکلری کیمی اداره ائدرک روسیه ده کی رهبر لیگی بوُرادا حیاتا کئچیرر سه ، بیزیم اینقلاب اوْ قدر ده ایره لی گئده بیلمز».

تاریخ
2019.02.12 / 09:58
مولف
محمد سعید اردوبادی
شرح لر
دیگر خبرلر

آذربایجانین مطبخین‌ده دادلی طعاملاردان بیری-دویو لوکوسو-رسئپت

دونیادا یئگانه اوز‌ن آداسی- آذربایجانین گؤزل مکانی باتاباتدا-ویدئو

آنا دیلین‌ده یازماسینا گؤره جزا آلان تبریزلی شاعر

ایفاچیلاریمیز اوشدا بیرینجی یئره چیخ‌دی - فوتو

ایران مشروطه‌سینی قازانماق اوچون یا ۴۰ میلیون تورکو گؤرمه‌لیدیر، یا دا...

اورمی خان‌لیغی: بوتون جنوبی آذربایجان خان‌لیقلارینا حاکمیتینی یایان خان

دومانلی تبریز ۸۰-اینجی بؤلوم

موسکوادا قاراباغ آتلاری ایله باغلی - سرگی

خالخال خانلیغی نئجه یاراندی؟ - فخری قوناقلیق

اؤیکوجوک... - ائرنئست هئمینگوئی

خبر خطّی
 
Axar.az'da reklam Bağla
Reklam
Bize yazin Bağla