Axar.az
یوخاری
22 آپرئل 2019


دومانلی تبریز ۲۲-اینجی بؤلوم

آنا صحیفه کولت
12 Punto 14 Punto 16 Punto 18 Punto

کؤچورن: فرخ جرایدی

« ایران مۆلکه‌داریْنین ائوینده »

بیزی حاج علی قلی خانیْن قبول اوْتاغینا آپاردیلار . قارداشی اوْغلو ، اسدالله خان ، عمی‌سینین خسته اوْلدوغونو و حاضردا بیزیمله گؤرۆشمه‌یه گله‌جگینی خبر وئردی .

خان اؤزل اوْتاغیندان چیْخدی . یاواش - یاواش یئریییردی. بیزیمله گؤرۆشدۆ. خسته اوْلدوغونو، ایندی جه حکیم اوْنا مورفین ووردوغونو، یالنیز بوُنونلادا حرکت ائده بیله‌جگینی سؤیله‌دی.

علی قلی خان ، یوْغون ، اوُجا بوْیلو ، چوْپور و عینی زاماندا چوْخ ملاییم بیر اۆزه مالک اوْلان آدام ایدی. اوْ کؤک و یوْغون اوْلماسینا باخمییاراق ، اۆزۆندن خسته بیر آداما بنزه‌ییردی.

ذاتن علی قلی خانیْن اؤزۆده ایرانین باشقا مۆلکه‌دارلارینا گؤره لیبرال بیر سیما ایدی . علی قلی خان بیرینجی سؤزۆنده بوُنو بیزه گؤسترمه‌گه چالیْشدی . صحبتیمیز توْرپاق مساله‌سیندن باشلامیْشدی . خان دئدیکلریمین هامیسینا « بلی ، دوْغرو دور ، تصدیق ائدیرم »- دئیه جاواب وئریردی . من سؤزۆمو بیتیردیکدن سوْنرا اوْ ، یانیْندا کی چایدان بیر نئچه قوُرتوم آلیب دانیْشدی :

من ایرانلییام . اؤزۆمده حقیقی ایرانلییام . ایران خالقینین دشمنی‌نی ده سئومیرم . اگر ایراندا توْرپاق مساله‌سی آرالیْغا گلرسه ، بیرینجی نؤوبه ده من اؤزۆم کندلریمی خالقا وئرنلرده‌نم».

من گۆلدۆم . خان دا گۆلۆمسه‌یرک دئدی:

« بیلیرم نییه گۆلۆرسونوز . سیز دئمک ایسته‌ییرسینیز کی ، ایندیکی بئله دیر نه اۆچۆن چاغیْریب کندلری خالقا باغیْشلامیرسان ، الینی-قوْلونو کی توُتان یوْخدور . بئله دیر می؟»

« منجه سیز بوُ ایشی گؤرمۆش اوْلسانیز ، باشقالاری دا سیزین آرخانیْزجا گلر».

« بوُنلار تمامیله دوْغرودور . لاکین بوُ گۆنکۆ انقلاب توْرپاق مساله‌سینی آرالیْغا چکمه‌ییب . بوُ انقلاب سلطنت-ین دئوریلمه‌سی مساله‌سینی ده دئمیر . بوُردا هر کس ووُروشور . فقط کیملرله ووُروشدوغونو اؤزۆده بۆلمۆر . هر کس سؤیور ، لاکین کیملری و نه اۆچۆن سؤیدۆگۆنۆ بیلمیر. حاضر کی انقلاب ، اؤز دوْستونو و دشمنینی تانییا بیلمه‌میشدیر . سیز انقلابیْن ماهییتینی و ترکیبینی هله‌لیک بوُ جماعته آنلاتماغی خیالینیزا بئله گتیرمه‌میش سینیز . کندلی سیزی تانیْمیر.

کندلیلر انقلابیْن خبرلرینی هله‌لیک بیر داستان کیمی ائشیدیر . اوْنون باشیْندا دوُران ستارخان و باقرخان دا دئولری اؤلدورن ، قاف داغیْنا گئدن افسانه‌وی بیر قهرمان کیمی تانییر».
« بوُنون سببی نه دیر ؟ »- دئیه علی قلی خان دان سوْروشدوم.

اوْ سیگارینی یاندیْریب سؤزۆنه دوام ائتدی :

«سیز واقتیندا توْرپاق مساله‌سینی آرالیْغا آتا بیلمه‌دیز ، چۆنکۆ اؤز سیْرا نیزدا بؤیوک توْرپاق یییه‌لری ده وار دیر. سؤزسوز سوْیولموش و ایل زحمتیندن سوْنرا بۆتۆن خیْرمانینی ملک یییه‌سینه وئریب شانا ، قلبیرینی دالیْنا آتماقلا ائوینه بوْش گئدن کندلی، سیزه قوْشولمایاجاقدیر . چۆنکۆ اوْ اؤز دشمنینی سیزین سیْرانیزدا گؤرۆر . سیز بوُیورون باخیْن . انقلاب هارا ؟ روحانیت هارا ؟ شریعت هارا؟

مذهب هارا ؟ سیز بوُرژوازی ایله بؤیوک و کیچیک کاپیتالیست لرله ( سرمایه دارلارلا ) چوْخ یاخشی ایشله‌یه بیلر سینیز . اوّلا بوُدور کی کاپیتالیست لر هر مملکتده دین سیز دیرلر . اوْ دینه حرمت ائدیر. اؤزۆ اۆچۆن یوْخ . اوْنلار دینی آشاغا طبقه‌ده اوْلماق شرطیله حرمت بسله‌ییر. اوْ دور کی سیزین اۆچۆن کاپیتالیست لرله ایشله‌مک روحانیت لرله ایشله‌مکدن داها اَل وئریشلیدیر . ایکینجی بیر سبب ده واردیر کی اوْ سبب بوُرژوازی نی بوُ انقلابا داها سیْخ بیر صورتده باغلامیْشدیر . اوْ سبب ده بوُرژوازی‌نی سلطنتدن نفرتلندیریر ، جانینی سیْخیر.

بوُرژوازی پادشاهیْن و اوْنون رشوه یئیه‌ن حاکیملرینین قوْرخوسوندان اؤز سرمایه‌سینی اؤلکه‌نین ایچینده گئنیش استثمارا بوُراخا بیلمیر. بوُنون اۆچۆن اوْ پادشاهی ییخماغا و اؤز حکومتینی قوُرماغا تله‌سیر. من اؤزۆمده انقلابی سئویرم . اوْنون دوْستویام چۆنکۆ بوُ انقلاب منیم منفعتیمه کسگینلیکله توْخونمور . لاکین انقلاب چیْلار منیم بوُ انقلاب دا اوْینایا بیله‌جگیم روْلدان هئچ ده خبر دار دگیل دیر.

انقلاب چیْلار مندن استفاده ایتمک ایسته‌میر . اوْنلار منیم کندلریمین ، منیم طایفامین اهمییتینی و جغرافی دوُروموموزون قیمتینی بیلمیرلر . حاضردا تبریز-جولفا شۆسه یوْلو ، قارا داغ خانلارینین هجومو قوْرخوسو آلتیْندادیر. اوْنلار بوُ گۆنده اوْلماسا ، ساباح بوُ یوْلو انقلاب چیْلارین الیندن آلاجاقلار . بوُ یوْل ایسه انقلاب چیْلار اۆچۆن اؤلوم-دیریم مساله‌سی دیر. روسیه انقلابی-نین آلوْوی بوُ یوْل واسطه سیله ایرانا گیرمیشدیر . بوُ یوْل کسیلدیکدن سوْنرا انقلاب اؤز اساس یوُردوندان نفس آلا بیلمه‌یه‌جکدیر . جولفا یوْلونون انقلاب چیْلار الینده قالماسی و اوْردان نفس آلیْنماسی ایشی منیم طایفامین حرکت ایله علاقه دار دیر.

قارا داغ خانلاری ، باشدا علی اکبر خان صولت الدوله اوْلماق اۆزره جولفا اۆستۆنه حرکت ائتمک و انقلاب طرفینده دوُران "علمدار" ، " گرگر " قصبه‌لرینی داغیْتماق اۆچۆن حاضرلاشیرلار . بوُنلار منیم کندلریمین ایچه‌ریسیندن کئچمه‌لی دیرلر . منیم قارداش لاریم "حیدر قلی خان" لا "حسین قلی خان" ایسته‌دیگی واقت " سیه رود " بوُرنونو کسیب حرکتی لنگیده بیله‌جکلر.

« هله‌لیک آرالیْقدا بوُ تهلوکه یوْخدور».

« سن گئت لازم بیلدیگین آداملاری بوُنا ایناندیر . " رحیم خان " صوفیان ، مرند ، چیْرچیْر لری توُتونجا علی اکبر خان-ی جولفا دا گؤره‌جکسیز.

ناهاری وثوق نظامین ائوینده یئدیک . وثوق نظام قاراداغ آتلی لاریْنین هجومو ایله هم بیزی قوْرخوددو ، همده اؤزۆ قوْرخوردو . چۆنکۆ اوْ اؤز کندلرینین داغیْلماسیندان احتیاط ائدیر و انقلاب چیْلار دان استفاده ائتمه‌یه چالیْشیردی.

تاریخ
2019.02.14 / 13:27
مولف
محمد سعید اردوبادی
شرح لر
دیگر خبرلر

آذربایجانین مطبخین‌ده دادلی طعاملاردان بیری-دویو لوکوسو-رسئپت

دونیادا یئگانه اوز‌ن آداسی- آذربایجانین گؤزل مکانی باتاباتدا-ویدئو

آنا دیلین‌ده یازماسینا گؤره جزا آلان تبریزلی شاعر

ایفاچیلاریمیز اوشدا بیرینجی یئره چیخ‌دی - فوتو

ایران مشروطه‌سینی قازانماق اوچون یا ۴۰ میلیون تورکو گؤرمه‌لیدیر، یا دا...

اورمی خان‌لیغی: بوتون جنوبی آذربایجان خان‌لیقلارینا حاکمیتینی یایان خان

دومانلی تبریز ۸۰-اینجی بؤلوم

موسکوادا قاراباغ آتلاری ایله باغلی - سرگی

خالخال خانلیغی نئجه یاراندی؟ - فخری قوناقلیق

اؤیکوجوک... - ائرنئست هئمینگوئی

خبر خطّی
 
Axar.az'da reklam Bağla
Reklam
Bize yazin Bağla