Axar.az
یوخاری
21 آپرئل 2019


دومانلی تبریز ۷۱-اینجی بؤلوم

آنا صحیفه کولت
12 Punto 14 Punto 16 Punto 18 Punto

کؤچورن: فرخ جرایدی

ایش بئله دگیلدی. اوْ انقلابچی دیر. لاکین سئوگی‌سی ده آدیْ کیمی تانیْنمیش دگیل . اوْ سئویر ، لاکین منی یوْخ. بلکه‌ده ایلک چاغلار سئومیشدیر. آمما ایندی سئوگی یوْخدور. اوْ کیمین اۆچۆن قارا گئییر؟ . کیمین اۆچۆن آغلاییر؟ بوُ آغلاماق منیم اۆچۆن ایسه من کی اؤلمه‌میشم ! منیم باشیْما بیر ایش کی گلمه‌میشدیر.

بوُنو دۆشۆنۆب ائوه یاخیْنلاشیردیم، یئنه‌ده اؤزۆمدن سوْروشدوم:

" گؤره‌سن منده بوُ فیکیرلر هاردان دوْغور ؟ " اؤزۆم بوُ سوْرونو جاوابلادیم " بوُ قیْسقانماقدان باشقا بیر شئی دگیلدیر. من کی بوُنا قارشیْ ایدیم. من بوُ قوْنو دا گنج قیزلا نه قدر تارتیْشمیشام. دوْغرودان دا قیز حاقلی ایمیش. کیشی‌لرده قیْسقانماق ساغالماز بیر خسته‌لیک کیمی ایمیش. بیرده منیم قیْسقانماغا نه حاقیم وار؟ وقتیله اوْ، منی سئویردی. منه هر بیر امکان وئرمیشدی. اوْ زامانا کیمی کی من اوْنا کسگین بیر سؤز دئمه‌میشدیم، اوْ زامانا کیمی کی من گنج قیزی ایکی اۆرک‌لی بوُراخدیم، من اوْنون ایچریسینده کی اینجیکلری حس ائده-ائده اوْنو ائیلندیرمک ایسته‌مه‌دیم، اوْنو تک بوُراخدیْم، داها قیْسقانماغا نه اختیاریم واردیر ؟ بس قیز بیر نفر تاپیب اوْنونلا دردله‌شه بیلمزمی ایدی؟ گنج قیز-ا عایله قوُرماق، گله‌جگین بللی ائتمک لازم گلمیردی می ؟ ایندیکی من بوُنلارین هامیسینی دوْغرولاییرام داها گنج قیز دان اینجیمه‌گه حاقیم یوْخدور. داها نه اۆچۆن قیْسقانیرام ؟ "

ائوه گیررکن دۆشۆنۆردۆم .قاپیْ آچیْق ایدی. تهمینه خانیْم-ین ائوده اوْلدوغونو بئله اوُنوتموشدوم. اۆرگیمده گئنه گنج قیزین کیملرله تانیْش اوْلماسی حاقیندا دۆشۆنۆر ، گاه اینانیر ، گاه دا اینانمیردیم. هئچ بیر شئی حس ائتمه‌دن اؤز-اؤزۆمه اوُجادان دئدیم :
《 اوْلا بیلمز ! 》

بیر سس ائشیتدیم :

《 اوْغلوم ، نه‌لر اوْلا بیلمز؟! کیم له دانیْشیرسان ؟ 》

بوُ سس تهمینه خانیْم-ین سسی ایدی.

اوْتوروب اۆزۆنه باخدیْم . تهمینه خانیْم یئنه سوْروشدو:

《 اوْغلوم کیم له دانیْشیردین ؟ 》

《 انسان چوْخ دۆشۆندۆکده خیالاتچی اوْلور. ائو اۆچۆن ، قوْهوم لاریم اۆچۆن دۆشۆنۆردۆم. 》

《 سن دئییردین کی ، هئچ کس-ین یوْخدور. بوُنو نینا-یا دا دئمیشدین . بیلیرم کی سن اوْنا یالان دئمزسن، چۆنکۆ بیر-بیرینیزی سئویرسینیز.》
《 دوْغرو دئمیشم. انسان بیر-بیرینی سئور، لاکین بوُ سئوگی‌ده همیشه‌لیک دگیل. انسان بیر-بیرینی آتا دا بیلر. آنجاق بوُنو آیدیْن دئمک لازمدیر.》

《 نه دایْشدیغینی بیلمیرم. آللاها شکر نه سن، نه‌ ده نینا بیر-بیرینیزی آتان دگیل سینیز. 》

《 یوْخ ، تهمینه خانیْم. بیر هفته‌دن بَری دیر کی نینا-نین تمامیله دگیشیلدیگینی گؤرۆرم. اوْ آغلاییر، قارا گئییر، منی و اوُشاغی ائوده بوُراخیب گئدیر؛ بوُنلارین هامیسی اوْنون یئنی بیر اوْلگی ( اتفاق) ، یئنی بیر سئوگی اوْلایی ( اوْلای = حادثه) ایله باش قاتدیْغینی گؤستریر. 》
تهمینه خانیْم منه باخیْب باشینی ترپتدی:

《 کیشی‌لرده بۆجۆر شوبهه‌لر همیشه اوْلور. منیم رحمتلیک اریم ده چوْخ قیْسقانان آدام ایدی. حتی بیر دؤنه یوُخومدا دانیْشدیغیمی ائشیدیب منی یوُخودان اوْیاندیردی. کیم له دانیْشدیغیمی سوْروشدو. دانیْشدیغیم آدامین کیم اوْلدوغونو دئیه بیلمه‌دیم. " آنجاق کیشی طایفاسی اوْلدوغونو بیلیرم " دئدیم. بوُنون اۆستۆنده منی دؤیدۆ. اگر یئرلی ( بومی) اوْلسایدیم بوْشایاجاق ایدی. اؤلنه کیمی اوْ کیشی‌نین کیم اوْلدوغونو سوْروشوب منی اینجیدردی. " سن کیشی فکری ایله یاتماسایدین، یوُخودا کیشی ایله دانیْشمازدین." دئییب منه آجیْقلاناردی. اوْندان سوْنرا من اوْندا ایلک اوْلان سئوگینی گؤرمه‌دیم . اوْغلوم اوْ زاماندان چوْخ کئچیر. زامان دگیشیبدیر. ایندی‌نین کیش‌ لری ده دگیشیلمه‌لی دیلر. هئچ سنه یاراشار کی نینا کیمی بیر قیز-ین حاقیندا بئله شوبهه‌لره یوْل وئره‌سن ؟ 》

من تهمینه خانیْم-ین سؤزلریندن سوْنرا اؤزۆمدن آجیْغیم گلدی. نه‌قدر یانیْلدیغیمی بوْینوما آلدیْم.

《 نینا بیر هفته‌دن بَری دیر کی دگیشیلمیشدیر.》دئیه جواب وئردیم.

《 من سنه دئمک ایسته‌میردیم نینا-یا و گئنل‌لیک‌له اوْنون دۆزه‌لتدیگی فرقه اۆیه‌لرینه اوُنودولماز و بؤیۆک بیر اوْلای اۆز وئریب دیر. 》

《 نه اوْلایی ؟ نه اۆز وئرمیشدیر؟》

《 بیر هفته بوُندان قاباق مارالان سنگرلرینه باشلامیش هجوم‌دا قاراداغلی لار نینا-نین فرقه یوْلداشلاریْندان حاجی آغا عوض اوْغلو و داداش قلی اوْغلو-نو اؤلدۆرمۆشلر. بوُ ایش نینا-نی و حسن آغا-نی چوْخ ائتگیلندیرمیش. اوْ چوْخ آغلادی. بوُ گۆن اوْنلارین هفته‌سی تمام دیر. اوْنلارین قبری اۆسته گئتمیشدیلر. نینا دا گئتمیشدی. یئنه آغلادی. ایندی مسأله‌نی بیلدین‌می؟ گئت؛ هئچ وقت شوبهه-فیلان ائله‌مه. 》

من سهویمی آنلادیْم. هله یئنی انسان تربییه‌سینی تمامیله منیمسه‌یه بیلمه‌دیگیمدن اؤز-اؤزۆمه اوُتاندیم. گنج قیز لا دانیْشدیغیم اوُزون-اوُزادی سؤزلری بیر آن‌دا فکریمدن کئچیردیم. نینا-نین کتابی آراسیْندا گؤردۆگۆم فرقه کیملیک‌لری گلیب گؤزۆمۆن قارشیْ‌سیندا دوُردو. حاجی آغا و داداش-ین فرقه کیملیک‌لری اۆستۆنه چکیلمیش قارا خط لری بیر داها گؤزۆمۆن قاباغیْنا گتیردیم. " تبریزده بیرینجی فرقه اۆزه‌گی‌نین بیرینجی و قهرمان قوُربانلارینا عشق اوْلسون. " دئدیم . آنلادیْم کی گنج قیز منه اۆرگینی وئرمیش لاکین اۆرگینده کی عقیده‌سینی اؤز اختیاریندا ساخلامیْشدیر. چۆنکۆ اوْ بوُ گۆنه قدر منیم فرقه اۆیه اوْلدوغومو بیلمیردی.

تاریخ
2019.04.13 / 09:39
مولف
محمد سعید اردوبادی
شرح لر
دیگر خبرلر

دومانلی تبریز ۷۹-اونجو بؤلوم

موسکوادا قاراباغ آتلارینا حصر اولونان سرگینین آچیلدی- فوتو

«علی و نینو» فیلمی ایندونزییانین اوچ شهرین‌ده نوماییش اولوناجاق

صحنه‌میزین قایناناسی نسیبه خانیم ارمنیلردن نئجه خلاص اولوب؟

دومانلی تبریز ۷۸-اینجی بؤلو

۱۷ یاش‌لی آذربایجان‌لی یاسین ۵۶ مین دلار تقاعد آلاجاق

قنیره پاشایئوا تورک میللت وکیلی ایله ماهنی اوخودو - ویدئو

سی و دومین نمایشگاه کتاب تهران

دومانلی تبریز ۷۷-اینجی بؤلوم

مشگینشهرده ۳ مین ایللیک آنتیک اثرلر تاپیلدی

خبر خطّی
 
Axar.az'da reklam Bağla
Reklam
Bize yazin Bağla