Axar.az
یوخاری
21 آپرئل 2019


دومانلی تبریز ۷۲-اینجی بؤلوم

آنا صحیفه کولت
12 Punto 14 Punto 16 Punto 18 Punto

کؤچورن: فرخ جرایدی

" سوْن اوْتوروم "

من ایچری گیردیکده بالاجا مجید-ی چیمدیریب ( چیممک = حمام کردن، استحمام) قوُرتارمیشدیلار. اوْ یاتماق ایسته‌میردی، چۆنکۆ نئچه گۆندن بَری منی گؤرمه‌میشدی.

نینا منی گؤررکن سئویندی. عینی زاماندا منیم اۆزۆمه قوْرخا-قوْرخا باخیْردی. اوْ منیم اوْندان اینجیدیگیمی حس ائدیر و نه ائده‌جگینی بیلمیردی. شوبهه‌سیز تهمینه خانیْم مسأله‌نی اوْنا خبر وئرمه‌میشدیر.

چۆنکۆ من اوْنا تاپشیْرمیشدیم. من یئنه ده کاناپه اۆستۆنده اوْتورموشدوم. یالنیز نینا عادت-ینین تَرسینه اوْلاراق بوُ گئجه کاناپه اۆستۆنده اوْتورمادی. بالاجا مجید بوُنو حس ائتدی. اوْ دوُروب نینا-نین دوْنوندان چکه-چکه گتیردی. کاناپه‌نین اۆستۆنده اوْتوروتدو، اؤزۆده آرادا اوْتوردو. نینا قارا کؤینه‌گینی چیْخارمیشدی. من گۆلۆمسۆندۆم؛《 قارا کؤینه‌گی نه اۆچۆن چیْخارتدین؟ 》 دئیه سوْروشدوم.

نینا اۆزۆمه قوْرخا-قوْرخا باخیب دئدی:

- دوْغرودان دا اوْ نه سؤز ایدی دئدین؟

- نه سؤز ؟

- "یالنیز قارا کؤینک دگیل، لکه‌لری گیزله‌دن هر بیر شئی ده مثبت حال یوْخدور" بوُ نه دئمک دیر؟ من بئله بیلیرم کی بیزیم حیاتیمیز بوُ کیمی فلسفه‌لرین دؤورونو چوْخدان کئچیرمیشدیر. ایندی بیز هر سؤزۆ بیر-بیریمیزه آیدیْنجا سینا دئیه بیله‌ریک. اۆرک بیرلیگین یاشاتماق اۆچۆن، بیر-بیریمیزه اینانماق لازمدیر. مادام کی اینانماق واردیر خیْردا-خیْردا آیریْمتیلاری آختارماق اۆرک بیرلیگیندن اوُزاق دیر. بیزیم دانیْشاجاغیمیز اؤنملی مسأله‌لر واردیر. اؤزل سوْرونلارین وقتینی اوُزادا بیله‌ریک. بوُ سوْنرایا قالسین. سنه بیر تَزه خبر وئره‌جه‌یم.

- نه کیمی خبر؟

-محمد علی شاه سوْنوندا روُس اوْردوسونون تبریز-ی اَله کئچیرمه‌سینه راضی اوْلموشدور.

- دوْغرومو؟

- انگلیس و روُسیه سفیرلری شاه-ا یازی گؤندریبلر، یازی دا آوروپالی لارین تهلوکه آلتیندا اوْلدوقلارینی گؤستریب تبریز-ه روُس قوْشونون گیرمه‌سینی ایسته‌میشلر. عینی زاماندا تبریزده ساکت‌لیک قوُرولان کیمی قوْشونلارین چیْخاریلماسینی دا وُورغولامیشلار.

- من بوُنو بیلمیردیم. سنه نه سؤیله‌میشدیم.

-بس روُس لار ایندی‌یه کیمی نه اۆچۆن تبریز-ی اَلده ساخلامیشلار؟

- اوْنلار اؤنجه انقلابین قازانجینی اینانمیردیلار. ایندی آزاد ائدیلمیش شهری اله کئچیرمک تبریز انقلابینین بؤیۆک‌لیگینی و تزار-ین بوُ انقلابا نه قدر اؤنم وئردیگنی آیدیْنجاسینا گؤستریر. اسلامیه قوُرولوشو داغیْلاندان ضد انقلاب یوُواسی اوْلان دوه‌چی محله‌سی تسلیم اوْلاندان و بۆتۆن تاخیْل یوْللاری آچیْلاندان سوْنرا تزار قوْشونونون تبریزه گیرمه‌سی انقلابین اوُغورلارینی گؤسترمیر می؟

- شوبهه‌سیز کی روُسیه اؤز مستملکه‌سی اوْلان تبریزده انقلابین قازانماسینا راضی اوْلمایاجاقدیر. سن بیلیرسن کی کوْنسول داییما بوُ انقلابی داغیْتماغا چالیْشیردی. اوْ ایلک دیپلماتیک یوْللاری ایله بیزی داغیْتماق ایسته‌ییردی. قافقاز سوْسیال-دموکرات لاری بوُنا یوْل وئرمه‌دیلر. آیا سن ارمنی روحانی‌لری‌نین حیله‌لرینی ائشیتمه‌دین می ؟ بۆتۆن بوُ اوْلایین آپاریجی‌سی روُس کوْنسول لوغو دگیلدی می ؟

- بۆتۆن بوُ ایشلر بلکه‌ده من تبریزه گلمزدن قاباق اوْلان ایشلر دیر. بوُ باره ده هئچ بیر شئی بیلمیرم.

-روُس کوْنسولونون اؤیرتدیگینه اۆزره ارمنی روحانی‌لری، ارمنی بورژوا لاری ایله بیرلیکده " ایکینجی نیکوْلا "-یا باغلیْلیق ( وفاداری و وابستگی) تلگرامی گؤندریب انقلابدا اشتراک ائتمه‌یه‌جکلرینی بیلدیرمه‌لی ایدیلر. باشقا طرفدن کوْنسول انجمنده کی لردن بیر چوْخونو اَلَه آلیْب شاه لا ستارخان آراسیْندا باریْشیق یاراتماغا چالیْشیردی. بوُ باره ده انجمن اۆیه‌لریندن بعضی لری ستارخان و باقرخان-ی بوُ باریْشیغا راضی ائتمک اۆچۆن ایشله‌ییردیلر. لاکین سوْسیال-دموکرات قوُروپو وقتینده ایشه قاتیْلیب کوْنسولون بۆتۆن فیْریلداقلارینی سوْنوج‌سوُز بوُراخدی. بوُرا دا تزار سیاستی ایله تانیْش اوْلان باکی ایشچی‌لری داها دا چالیْشقان حرکت ائتدیلر.

- باکی ایشچی‌لرینین بوُرادا کئچرلیگی وار دیر می؟

- ایران سوْسیال-دموکرات لاری بوُنو لازمین‌جا دستکله‌ییرلر. چۆنکۆ ایران سوْسیال-دموکرات فرقه‌سینین تمل-ینی قوُران باکی ایشچی‌لری باشچیْلاریندان اوْلان " نریمان نریمان اوْو " دور. ایران انقلابی اوُغروندا یۆزلرجه قافقاز ایشچی‌سی قوُربان وئرمیشدیر.

- تاسوف اوْلسون کی بۆتۆن بوُ زحمت لر روُس قازاق لارینین آیاغیْ آلتیْندا تاپدانیب گئده‌جکدیر. -دئیه نینا بیر آه چکدی.

- هئچ بیر شئی آرادان گئتمه‌یه‌جکدیر. بیر آرا بیر سس‌سیزلیک‌دن سوْنرا ایران انقلابی داها گئنیش و داها یۆکسک، داها باغیْمسیز بیر حالدا آلوْولاناجاقدیر.

- اوْنو من گؤرمه‌یه‌جه‌یم.

- نه اۆچۆن ؟

- چۆنکۆ من ایران‌دا قالمایاجاغام.

- نه اۆچۆن قالمایاجاقسان ؟

- نه اۆچۆن و کیمین اۆچۆن قالیْم ؟ انقلابین بوْغولدوغونو گؤرمه‌یه می؟ آسیْلانلارین یاسیْنی باغلاماغا می؟ انقلاب باشچی‌لارینین اسیر حالینی گؤرمک‌دن اؤتۆرمۆ؟ انقلاب یوْخدور من ده یوْخام. بیر حالدا کی سنده بوُرادا قالمایاجاقسان.

- گنج قیز ! سن یئنه‌ده اسکی دنیا-نا قاییدا بیلمز می سن؟

- چوْخ چتین ! اوْرا چوْخ اوُزاقدیر. من یئنی دنیا-یا یئنی دوُیغولارلا گلمیشم. اوْ دوُیغونون ایچریسینده سن ده وارسان. بیرده من ساواش دوْلو یاشاما آلیْشمیشام.

- دؤیۆشمک داییم ممکن دۆر.

- ساواش حس لریمی اوْیادان منی بوُ شأن حیاتا چاغیْران ائله سنسن. من بوُ یوْللاری تانیْییردیم. یالنیز اؤیرنمه‌میشدیم. بوُ آغیْر ساواش-ا، حتی اؤلۆم قوْخویان دؤیۆشلره گۆله-گۆله گیردیم. فلاکتین اۆزریندن سئوینج له آتیْلدیم. بوُنا نه‌دن سن ایدین.

- اومود ائدیرم کی یئنه‌ده گؤرۆشه‌جه‌ییک. حیات امکان وئررسه یئنه‌ده بیر یئرده اوْتوروب تبریزین توُتغون دوُمانلاری آلتیْندا شأنلیک لریمیزی خاطیرلایاجاغیق.

نینا بوُ سؤزدن سوْنرا اؤزۆنۆ ساخلایا بیلمه‌دی. یاتاق اوْتاغینا قاچدیْ. من‌ده انقلاب شوُراسینا گئده‌جکدیم.

تاریخ
2019.04.14 / 12:18
مولف
محمد سعید اردوبادی
شرح لر
دیگر خبرلر

دومانلی تبریز ۷۹-اونجو بؤلوم

موسکوادا قاراباغ آتلارینا حصر اولونان سرگینین آچیلدی- فوتو

«علی و نینو» فیلمی ایندونزییانین اوچ شهرین‌ده نوماییش اولوناجاق

صحنه‌میزین قایناناسی نسیبه خانیم ارمنیلردن نئجه خلاص اولوب؟

دومانلی تبریز ۷۸-اینجی بؤلو

۱۷ یاش‌لی آذربایجان‌لی یاسین ۵۶ مین دلار تقاعد آلاجاق

قنیره پاشایئوا تورک میللت وکیلی ایله ماهنی اوخودو - ویدئو

سی و دومین نمایشگاه کتاب تهران

دومانلی تبریز ۷۷-اینجی بؤلوم

مشگینشهرده ۳ مین ایللیک آنتیک اثرلر تاپیلدی

خبر خطّی
 
Axar.az'da reklam Bağla
Reklam
Bize yazin Bağla