Axar.az
یوخاری
21 آپرئل 2019


دومانلی تبریز ۷۳-اونجو بؤلوم

آنا صحیفه کولت
12 Punto 14 Punto 16 Punto 18 Punto

کؤچورن: فرخ جرایدی

من انقلاب شوُراسینا گئتمزدن اؤنجه ائوه گلدیم. انگلیس سیمی واسطه‌سیله جوُلفادان ووُرولموش بیر تلگرام وئردیلر. تلگرام ایران انقلاب کمیته‌سی‌نین جوُلفا شعبه‌سی اۆیه‌لریندن بخشعلی آغا شاه تختی طرفیندن ووُرولموشدو:

بوُ گۆن سرحد دن ( مرز) بئش مین جوُوال کئچیریب تبریزه یوْلا سالدیق. ماللاری جوُوال لارا دوْلدوروب اؤزۆنده گلرسن. بوُ تلگرامدان، بئش مین نفر روُس یوُرد اَر-ینین ( سرباز) سرحد دن کئچدیگینی آنلاماق اوْلوردو. تلگرامی گؤتۆرۆب تله‌سیک انقلاب شوُراسینا گلدیم. بوُرادا بؤیۆک بیر سئوینج گؤردۆم ، چۆنکۆ حکومت قوْشونو چکیلیب سردری ، قاراداغ یوْللاری آچیْلمیشدی. تبریزه یئمک شئی‌لری باریْشیق وقتیندن آرتیْق گلیردی. من روُس لارین سرحد دی کئچدیگینی خبر وئریب شوُرا دا شادلیغی پوْزماغا اۆرک ائله‌میردیم. لاکین بوُنو ممکن اوْلدوقجا تئز دئمک لازم ایدی. دانیْشماق اۆچۆن سؤز آلدیم. اوْرا دا اوْتوران آداملار دئیه‌جه‌گیم سؤزله چوْخ ماراقلانیردیلار. دانیْشماغا باشلادیم:

- گؤزله‌دیگیمیز قوْرخو یاخیْنلاشیر. آزاد اوْلموش شهرین کۆچه‌لرینده تزار قازاق لارینین سسی ائشیتمه‌گیمیزه چوْخ آز قالمیشدیر.

محمدعلی شاه روُس قوْشونونون تبریز-ی اَله کئچیرمه‌سینه راضی‌لیق وئرمیشدیر.

توْپلومو سس‌سیزلیک بۆرۆمۆشدۆ. هامی بیر-بیرینین اۆزۆنه باخیْردی.

دانیْشماغا باشلایان یوْخ ایدی. حتی چوْخ آدام بیر سؤز دئمه‌دن دوُروب گئدیردی. اوْرادا کی لارین بیر چوْخو انقلابین قئیدینه دگیل، یالنیز اؤز قئیدینه قالیردی. بیر چوْخونون اۆزۆندن عاجزلیک، قوْرخاقلیق، ایکی اۆزلۆلۆک گؤرۆنۆردۆ. بعضی‌لری اؤز یانیندا کی ایله خیْسین-خیْسین دانیْشیردی.

- آغا بوُنون آخیری نئجه اوْلاجاقدیر؟ -دئیه بیر-بیریندن سوْروشوردولار.

قلیانلارین قمیشلرینی آغیْزلاریندا توُتموش، بیر چوْخو اَل-قوْل قوُرویوب قالمیْش سوْیوموش و اوْدو چوْخدان سؤنمۆش قلیانی سوْموروردو.
اؤزۆنۆ ایتیرمه‌ینلر ده وار ایدی. بوُنلار ایسه ستارخان، بیرده قافقاز سوْسیال-دموکرات لاری، اؤزل‌لیکله باکی ایشچی‌لری ایدی. دانیْشیق باشلانمیشدی. بیر چوْخلاری " دولت لر بوُنا راضی اوْلمازلار " دئیه اؤزۆ بئله اینانمادیغی حالدا بوُنونلا اؤزۆنه توْختاقلیق وئریردی. بعضی‌لری " بۆتۆن دونیایه جار سالاریق " .حاجی مهدی آغا بوُ سؤزۆ نئچه دفعه تکرار ائتدی. من یئنه‌ده سؤزه باشلادیم:

- یابانجی ( خارجی) دولت‌لره و ایکینجی اینترناسیوْنال-ا خبر وئرمه‌گین هئچ بیر ضرری یوْخدور. بوُنلارین هامیسی روُسیه تزار-ینین تاریخی خیانت-ینی دونیالارا بیلدیرمک اۆچۆن بیر سند دیر. لاکین بوُنلارین هئچ بیری روُس لارین تبریز اۆزه‌رینه باشلادیغی هجومون قارشی‌سینی آلا بیلمز. یازیلی سندلره گؤره روُس حکومتی‌نین ایران ایشله‌رینه قاریْشماق حاقی واردیر. ' گولوستان ' عهدنامه سی هله گۆج‌ده قالیْر. بوُنلاردان باشقا، روُسیه-انگلیس آراسیندا باغلانمیش ۷-اینجی ایل ( ۱۹۰۷) سؤزلشمه‌ده بوُنا یوْل وئریلیبدیر. کئچرلی بؤلگه‌سینه ( منطقه نفوذ) بؤلۆنمۆش ایران اؤزل لیکله آزربایجان، روُسیه اختیارینا بوُراخیلمیشدیر. روُسیه‌نین ساواش گۆجلر باشچی‌سی مِدمِدیئو -ین یازدیْغی اثرینده روُسیه‌نین آماجی تمامیله آیدیْن دیر. اثرده دئییلیر کی:

"" ایران باریْت آنبارینا اوْخشاییر. ایندی اوْ بیر قوْرخولو قوْنشو شکلینی آلمیشدیر. بوُ یئر روُسیه‌نین یاخیْن قوْنشوسو دور. گولوستان عهد نامه‌سی هله گۆج‌ده دیر. بیز دینجلیک قوُرماق اۆچۆن ایران-ی اَله کئچیرمه‌گه بوُندان دا اَل وئریشلی وقت بیلمه‌دیک "" .
بۆتۆن بوُ سندلر روُسیه تزار-ینین ایران-ی اَله کئچیرتمه‌سینه حاضرلاندیغینی چوْخدان بَری گؤستریردی.
توْپلومدا سس لر اوُجالدی :

- ایندی نه ائتمه‌لییک ؟

من یئنه‌ده سؤزه باشلادیم :

- روُس لار گلیر، اوْنلار انقلاب-ا باشچی‌لیق ائدنلری آختاراجاقلار. روُس لار اؤزلری ده اوْلماسا، اوْنلارین طرفیندن تبریزده قوْندارما حکومت، سیلاح لاری دا ایسته‌یه بیلر. روُس لار قافقاز دان گَلن انقلاب چی لاری دا ایسته‌یه جکلر. کؤنۆللۆ گلن لر و باشقا لاری دا ایسته‌نیلمه‌سی ممکن دور. تبریز انقلاب چیلاری چوْخ احتیاط لی داورانیلمالی دیرلار. روُس لار اَن کیچیک بیر اوْلای دان بئله یارارلاناجاقلار.

اؤزل لیکله انقلابین باشچی لاری حاقیندا دا دۆزگۆن دۆشۆنمه‌لی دیر. او‌نلارین قوْرونماسی یوْلوندا کۆتله‌وی تدبیرلر گؤرۆنمه‌لی دیر.

منجه بوُ گۆن بیزیم سوْن و تاریخی اوْتوروموموز دور . بوُنا گؤره ده ایندی‌یه کیمی آچیْق دانیْشمادیغیمیز بیر پارا سؤزلری دانیْشمالییق.

تاریخ
2019.04.15 / 09:58
مولف
محمد سعید اردوبادی
شرح لر
دیگر خبرلر

دومانلی تبریز ۷۹-اونجو بؤلوم

موسکوادا قاراباغ آتلارینا حصر اولونان سرگینین آچیلدی- فوتو

«علی و نینو» فیلمی ایندونزییانین اوچ شهرین‌ده نوماییش اولوناجاق

صحنه‌میزین قایناناسی نسیبه خانیم ارمنیلردن نئجه خلاص اولوب؟

دومانلی تبریز ۷۸-اینجی بؤلو

۱۷ یاش‌لی آذربایجان‌لی یاسین ۵۶ مین دلار تقاعد آلاجاق

قنیره پاشایئوا تورک میللت وکیلی ایله ماهنی اوخودو - ویدئو

سی و دومین نمایشگاه کتاب تهران

دومانلی تبریز ۷۷-اینجی بؤلوم

مشگینشهرده ۳ مین ایللیک آنتیک اثرلر تاپیلدی

خبر خطّی
 
Axar.az'da reklam Bağla
Reklam
Bize yazin Bağla