Axar.az
یوخاری


ملا و مارک... - قان تورالی

آنا صحیفه کولت
12 Punto 14 Punto 16 Punto 18 Punto

کؤچورن: ائلیار پولاد

ملا نصر‌الدیندن سوروشورلار: «تابوتو قبرستانلیغا آپاراندا تابوتون ساغ طرفینده اولماق ياخشیدیر، يوخسا سول؟» ملانین جوابی عبرت‌آمیزدیر: «چالیش، تابوتون ایچینده اولما. ساغین، يا دا سولون ائله بیر فرقی يوخدور».

اکثر ملا نصر‌الدین لطیفه‌‌لری بئله‌دیر، قورو زارافاتدان عبارت دئيیل، هم ده درین اجتماعی مضمونو وار.

يئری گلیب، بیرین ده يازاق. ملا نصر‌الدیندن «دنیانین مرکزی هارادادیر» دئيه سوروشورلار، او دا دئيیر ائله من دايانان يئردیر. دئيیرلر، بیزی آلدادیرسان، دئيیر، اینانمیرسان اؤلچ. دوغرودان دا، انسان هر شئي‌ین معياریدیر، انسان دنیانین مرکزیدیر.

قايیداق تابوتا. يوخ، تابوتا يوخ. تابوت لطیفه‌‌سینه...

«اونلاردا ائله‌دیر، بیزده بئله» صحبتلری همیشه منده اکراه دوغوروب. دوزدور، صابر ده يازیردی کی، اجنبی‌لر سئيره بالونلارلا چیخیر. صابر يازاندان يوز ایل کئچیب، بیز هله ده مقايسه ائدیریک. هر جور مقایسه اوغورسوزدور. امّا دایم بیزیم قارشیمیزدا دوران ابدی بیر حقیقت وار. تابوتون ایچینده اولماماق... دیری قالماق... دنیا ایله آياقلاشماق و حتی اونو اؤتوب-کئچمک!

انفورماسيا عصرینده ياشايیریق. «گیم اوف تهرونس»-ا آمریکانلارلا بیر باخیریق. يئنی «ایفون»-و اونلاردان قاباق بیز ایشله‌دیریک. امّا ساده‌جه استهلاکچی اولمالی دئيیلیک. هم ده بو يئنی تکنولوگیالاری بیز ياراتمالییق. قیساجاسی، تابوتون ایچینده اولمامالیيق.

بس تابوتون ایچینده اولماماق اوچون نه لازیمدیر؟ اصلینده، هر شئي چوخ ساده‌دیر: داها چوخ معارف، داها چوخ علم، داها چوخ اینجه‌صنعت و داها چوخ عدالت...

دنیا نهنگ ديَیشیکلیکلرین آستاناسیندادیر. روبوتلار آرتیق انسان اوزرینده بئيین عملیاتلاری آپاریر. روبوت عسگرلر آرتیق اوردو سیرالاریندا دؤيوشمه‌يه باشلايیر. بشریت مارس‌دا مسکن سالماق حاقیندا دوشونور. عالیملر اؤلومسوزلويون سیررینی آراشدیریر. ياخین گله‌جکده طبیعی اؤلوملر تاریخه قووشاجاق. بیر انسان بئله چالیشمايان فابریکلر ایشه باشلايیر. آمریکادا دؤرد نهنگ شرکت سوروجوسوز ماشینلاری استحصالاتا بوراخماغا حاضرلاشیر. و بشریتین بو انقلابی ديَیشیکلیکلره حامیله اولدوغو بیر زاماندا بیز نَه‌يی مذاکره ائدیریک؟ بیزیم موضوع‌موز نه دیر؟ بیز نه‌دن دانیشیریق؟ و ان اساسی، بیزیم ویزیونوموز، ایدئالیمیز نه دیر؟ بیز نَيه جان آتیریق؟

میشل دئه مونتئن دئيیردی کی، منزیلی مجهول اولان گمی‌يه هئچ بیر روزگار کمک ائده بیلمز. اونون اوچون ده بیز منزیلیمیزی دوزگون سئچمه‌لی‌يیک. و هر بیر انسان اؤز ساحه‌‌سینده، اؤز يئرینده و يوردوندا بو منزیله چاتماق، بو ایدئالی گئرچکلشدیرمک اوچون چالیشمالیدیر.

ساده بیر فاکت... «فیس بوک» او قدر نهنگ بیر گوجه چئوریلیب کی، اونون آمریکا پرزیدنت سئچکی‌لرینه مداخله‌سی مذاکره اولونور. عمومیتله، ترانس‌ملّی کورپوراسیيالارین دولتلردن داها گوجلو اولماسی قلوباللاشمانین گؤرونوشودور. «فیس بوک» هارا گئتدییمیزی، نه يئدییمیزی، نه پايلاشدیغیمیزی، کیملرله نه يازیشدیغیمیزی بیلیر.

بو ساحه‌‌نین متخصصلری دئيیرلر کی، کیمینسه يوز «لایک»-ینی نَيه قويدوغونو بیلیرسینیزسه، او آدامی آناسیندان داها ياخشی تانییرسینیز. ایکی يوز «لایک» اونو دوستوندان داها ياخشی تانیدیغینیزی گؤستریر. و اوچ يوز «لایک»لا او انسانی اؤزوندن داها ياخشی تانیيا بیلیرسینیز. «فیس بوک»ون الینده بو گون يوز میليونلارلا آدامین معلوماتلاری وار. و او، بو معلوماتلاردان نگاتیو مقصدلر نامینه استفاده ائتدیینی دفعه‌‌لرله «ثبوت» ائدیب.

بوتون دنیا «فیس بوک»-ون بو گوجونو مذاکره ائتدیی بیر زاماندا «ياخشی قیز فیس بوکا گیرمز» دئيه دوشونمکله تابوتون ایچینده‌کی يئریمیزی حاضرلايیریق.

ملا نصر‌الدین بیر شئيی دوز دئمیردی: تابوتون اؤنونده گئتمک گرک!

تاریخ
2019.04.18 / 19:47
مولف
قان تورالی
شرح لر
دیگر خبرلر

تبریزین قدیم و مشهور استراحت یئری باغشیمال

آذربایجان قدیم تیکمه صنعتی- تکلدوز تیکمه

دومانلی تبریز ۱۰۴-اۆنجو بؤلوم

بستکار اعتراف ائتدی: "آوروویزییا" سیاسی اویوندور!

"دیوان مجذوب تبریزی"

تبریزین مراسیم یئمکلری

دومانلی تبریز ۱۰۳-اونجو بؤلوم

تبریزین عظمت‌لی تاریخی- قدیم کهریزلر- آلتینجی یازی

بوتؤو آذربایجان سئودالی‌سی دونیا شهرت‌لی ماراغالی عالیم

باکی‌دا واقیف صمد اوغلونون یوبیلی تدبیری کئچیریله‌جک

خبر خطّی
 
Axar.az'da reklam Bağla
Reklam
Bize yazin Bağla