Axar.az
یوخاری


دومانلی تبریز ۷۷-اینجی بؤلوم

آنا صحیفه کولت
12 Punto 14 Punto 16 Punto 18 Punto

کؤچورن: فرخ جرایدی

کۆچه‌میزی دگیشدیک. من گئدیرم، یالنیز توُتونچو اوْغلونون انقلاب گۆنلرینده کی قهرمانلیقلارینی فکریمده جانلاندیراراق گئدیرم.
گئجه دیر. سس سیز کۆچه‌لرله گئدیرم. سس یوْخ ، سمیر یوْخ ، انقلاب گۆنلرینده قاریشقا یوُواسی کیمی قایناشان کۆچه‌لر ایندی زلزله دن باتمیش کیمی سوُسوب دوُرموشدو. توْپلارین ، بوْمبالارین یایلیم آتش‌لرینین نَنلی سینه اؤیرنمیش بو شهر ایندی اوُیوماقدا دیر. سس یوْخدور، لاکین دؤنگه‌دن -دؤنگه‌یه کئچدیکجه سیزغین خیْشیلتی لار ائشیدیردیم. اوُجان ( بستان آباد) یایلاسیندان اَسـَن سرین کۆلک سؤیود آغاجلارینین بوْینونو قوُجاقلاییب یئنی گؤیرمیش اینجه یارپاقلارین دوْداقلاریندان اؤپور ، اوْنو نازلاندیریر طبیعتین ایپک کؤینه‌گینین روح اوْخشاییجی خیْشیلتی‌سینی کۆچه‌لره داغیْدیردی.

بوُ گئجه تبریز اوْلدوقجا سیْرریلی و قوْرخولو ایدی. سیاسی دوُمانلارین کیرلی ( چِرکین ) کۆرکونه گیریب بیر تیریاکی کیمی نشعه‌لر دنیاسیندا اۆزَن بوُ شَهَر، مینلرجه تزار جاسوس‌لارینین، یئرلی گیزلی مأمورلارینین الینده ایدی. تاجر جاسوس ، مولکه دار جاسوس، موْللا جاسوس، سیّدلر جاسوس.

جاسوس اوْلمایان یوْخسول قات-ا گلدیکده، اوْ دا مدنیتسیز، دشونجه‌سیز دینچیلردن توْپلانیردی.

بوُ دۆشونجه‌لر ایچه‌ریسینده گلیب نینا-نین ائوینه گیردیم. ائو یییه‌سی میناسیان منی قارشیلادی. اوْ، نینا-نین خسته‌لندیگینی سؤیله‌دی. منی آغیْر بیر هیجان بۆرودو، چۆنکو من یوْل اۆستونده ایدیم، اوْنون خسته‌لنمه‌سی و منیم اوْنو خسته ایکن بوُراخیب گئتمه‌گیم اوْلدوقجا اوُیغون‌سوز بیر دوُروم تؤر‌ده‌جکدیر. میناسیان قوْرخوسوندان دیْشاری چیْخا بیلمه‌دیگینی، داشناک لارین خوْی و اوُرمو شهرلرینه چکیلدیکلرینی، اوْرا دا اوْلان ائرمنی کندلرینده یاشاماق ایسته‌دیکلرینی سؤیله‌دی.

اوْ، ائرمنی روحانی لرینین ائرمنی لره چاغیریلیش کاغاذی گؤندردیگینی و اوْنلاری ژنرال سنارسکی‌نین قارشی‌لاماسینا گئتمه‌گه مجبور ائتمک ایسته‌دیکلرینی ده خبر وئردی.

اوْتاغا گیررکن نینا‌نین یاتدیغینی گؤردوم. بالاجا مجید دسمال ایسلادیب نینا‌نین باشیْنا قوْیماق ایسته‌ییردی.

《 ایندی منیم بۆتون اومودوم بوُ اوُشاقدیر》 دئیه، نینا قالخیب اوْتوردو.

وقت کئچیردی، من هئچ بیر سؤزو اوُزالتمادان تبریز-ی بوُراخدیغیمیزی نینا-یا خبر وئرمه‌لی ایدیم.

《 نینا ، انقلابیْن بیرینجی دور-و بیتدی》 دئیه الیمی اوْنون آلنینا قوْیوب ایستی‌لیگینی یوْخلادیم.《 هله‌لیک دایانمیش انقلابین چالیشما بؤلگه‌سی مرکز-ه کؤچور، انقلابین ساواش شوُراسی بوُراخیلدی. گیزلین حرکت اصولونا کئچیلمه‌سی قرارا آلینیب. 》
نینا درین بیر سکوت-ا دالدی؛ اوْ یئنه هر زامان تکرار ائتدیگی کیمی :

《بیلمیرم سوْنوموز نئجه اوْلاجاقدیر》 دئییب آغلادی و باشیْنی چیگنیمه قوْیدو.

《 دؤز ؛ اۆره‌گین انقلابچی اۆره‌گی اوْلسون. سن بیر چوْخ تهلوکه‌لی ایشلر گؤرن، هئچ بیر تهلوکه‌دن چکینمه‌ین انسان ، بوُ دوُرومدان دا قوْرخمامالی، اؤز اؤزگۆوه‌نیوی ( اؤزگۆون = اعتماد به نفس) پوْزمامالی سان. بوُ ساعت سوْن گؤروش ساعتیمیز اوْلسا دا، منجه انقلاب بیزی یئنه‌ده گؤروشدوره‌جکدیر.

《 بیز ساباح بیر داها گؤروشمه‌یه‌جه ییزمی؟ 》نینا دئیه دلی‌جه‌سینه سوْروشدو.

《 سوْن گؤروش اۆچون گلدیم. نینا.》

《 سن تبریزده اوْلمایاجاقسان می؟》

《 خیر، بوُ گۆن گئتمه‌لیییک. یوْلداشلارین هامیسی گئدیر. 》

《 هارا ؟ 》

《 انقلابیْن ایسته‌دیگی یئره . گله‌جه‌یم. گلمه‌دن اؤنجه سنه مکتوب گؤندره‌جه‌یم. رشت-ه گئتمه‌لی ، اوْردان دا تهران اۆزه‌رینه یۆگورن دسته‌لره قوْشولمالیییق. 》

《 سن فرقه‌چی‌می سن؟ 》

《 فرقه‌چی یم. 》

بوُ سؤزلردن سوْنرا نینا بوْینوما ساریلدی، دوْداقلاریم اوُنودولماز بیر ایستیلیک حس ائتدی.

نینا-نین ائویندن نئجه چیْخدیغیمی بیلمه‌دیم. آنجاق قوْینومدا اوْلان بیر دسته روُس پاراسینی مجید-ه وئریب قاپییا دوْغرو دؤندوگومو خاطرلاییرام.

تاریخ
2019.04.19 / 10:05
مولف
محمد سعید اردوبادی
شرح لر
دیگر خبرلر

تبریزین مراسیم یئمکلری

دومانلی تبریز ۱۰۳-اونجو بؤلوم

تبریزین عظمت‌لی تاریخی- قدیم کهریزلر- آلتینجی یازی

بوتؤو آذربایجان سئودالی‌سی دونیا شهرت‌لی ماراغالی عالیم

باکی‌دا واقیف صمد اوغلونون یوبیلی تدبیری کئچیریله‌جک

صمد وورغونون واریثی کونسئرت وئریر

باکی‌دا ایران‌لی رسامین فردی سرگیسی آچیلاجاق

تبریزین عظمت‌لی تاریخی- قدیم کهریزلر- بئشینجی یازی

دومانلی تبریز ۱۰۲-اینجی بؤلوم

آذربایجان یازیچی‌لار بیرلییی‌نین «قیزیل‌قلم» جایزه‌سی‌نین غالیب‌لری بللی اولدو

خبر خطّی
 
Axar.az'da reklam Bağla
Reklam
Bize yazin Bağla