Axar.az
یوخاری


دومانلی تبریز ۷۸-اینجی بؤلو

آنا صحیفه کولت
12 Punto 14 Punto 16 Punto 18 Punto

کؤچورن: فرخ جرایدی

بوُ گئجه ستارخان بیزیم گئتمه‌گیمیز اۆچون بیر قوْناقلیق دۆزنله‌میشدی. بوُردا قافقازلی لار و ایران سوْسیال-دموکرات قوُروپونون اۆیه‌لری وار ایدی.

ستارخان اوْلدوقجا دۆشونجه‌لی و کدرلی ایدی. قلیان-ی قلیاندان آییرماییردی. قهرمان آلنیندا کی درین قیْریشلار چیـْخیلماز بیر دوُروم قارشی سیندا قالان اۆره‌گینی ، قوْناقلارا اوْخودوردو.

اوْنون اَگمه و کامان قاشلاری تئز-تئز قالخیر، آلنینین بیری اوْبیری اۆزه‌رینده کی قیْریشلاری دا کامان شکلینی آلاراق ، قهرمانین اؤج ( انتقام) آلماق حس‌لری بسله‌دیگینی آنلادیردی ، بۆتون چتینلیک‌لری سوُ کیمی ایچن قهرمان ایندی هر بیر حرکت-یتنده بؤیوک چتینلیکلره توُش گلدیگینی آنلادیردی. توْپلومو سس‌سیزلیک بۆروموشدو. یالنیز قلیان تۆستولرینه قوْشولوب درین اۆرکلردن چیْخان آه لار ائشیدیلیردی. هئچ کس دانیْشمیردی. هامی ستارخان-ی دینله‌مک ایسته‌ییردی. قهرمان دانیْشدی لاکین چوْخ آز :

《 بیزیم روُس لارین قارشی‌سینا چیْخماغیمیز، تبریز-ی اوْنلاردان قوْروماغیمیز چوْخ دا چتین دئییل، اگر من بیلسه‌یدیم کی، بیزیم تزار اوْردوسو ایله ووُروشماغیمیز انقلاب-ی قوْرویاجاق، اگر کی " اسلامیه " ده اوْتوران نامجتهد، ناسیّد لر بیزیم روُس لار لا چیْخاراجاغیمیز اختلاف دان قازانمایاجاق ، یئنه‌ده ووُروشاردیم. رفیق لریم ! عزیز سلاح یوْلداشلاریم ! بیزیم ووُروشماغیمیز فایداسیز دیر. چۆنکو اختلاف دان ضد انقلاب باشچی لاری یارارلاناجاقدیر. بوُنا گؤره ده بیز انقلاب دا قالیب گَلَن تبریز-ی تزار اوْردوسونا تاپشیْرماغا مجبوروق. لاکین بوُنونلا بیزیم انقلاب دا قازاندیقلاریمیزین دَیه‌ری آزالمیر. بیز، قافقازلی یوْلداشلارین انقلاب-ا اوْلان خدمت‌لرینی، اؤزل‌لیکله باکی ایشچی لرینین یاردیملارینی هئچ وقت اوُنودا بیلمه‌یه‌جه‌ییک. قافقازلی یوْلداشلار، باکی و تفلیس ایشچی لرینه منیم سلاملاریمی آپارین. بیز بئشینجی ایل انقلابیْ‌نین (۱۹۰۵ انقلاب روسیه) اوْغلونو بؤیوده‌جه‌ییک. سیز منیم دیلیمدن اوْنلارا سؤیله‌یین، ستار-ین انقلابا خیانت ائتمه‌دیگینی، یئنه ده اؤز یوْلوندا دوُردوغونو اوْنلارا خبر وئرین. 》

ستارخان-ین بوُگۆنکو چیْخیشی و قیسسا دانیْشیغی اوْلدوقجا بؤیوک ائتگی باغیشلادی. اوُزون دانیْشیغا وقت اوْلمادیغیندان سردار-ین جوابینی قیسسا جمله‌لرله وئردیم :

《 بیز تبریزدن اوُنودولماز خاطره‌لرله آیریلیریق، بوُ خاطره‌نی اؤزل‌لیکله سردار-ین قهرمانلیغیندان آلدیغیمیز ائتگی لری بۆتون قافقاز ایشچی لری آراسیندا یایماغا سؤز وئریریک. بونسوز دا قافقاز ایشچی لری، اؤزل‌لیکله باکی ایشچی لری ایران انقلابیْنا، جناب سردار-ین اؤزوندن اوْلاراق تۆکنمز بیر سئوگی بسله‌مکده دیر. بیزیم و بیزی جناب سردار-ین ساواشلارینا گؤندرنلرین ایران کندلیسی و ایران یوْخسول لاری ایله اوْلان قارداشلیق باغلاریمیز همیشه لیک اوْلاراق دوام ائده جکدیر. انقلاب اوْردوسونون داهی‌سی و بۆتون ایران یوْخسوللارینین سئویملیسی ستارخان-ی انقلاب دنیاسی دوُردوقجا اوُنوتمایاجاقدیر. 》

منیم سؤزلریمدن سوْنرا سردار سۆفره باشیْندا اوْتورانلاری بیر داها گؤزدن کئچیره‌رک دئدی :

《 بوُرا دا اوْتوران رفیق لر انقلابین سیْنانمش اۆیه‌لری دیر. یالانچی لار گلمه‌میشدیر. ستار-ین قاپی سینین توْرپاغیندان اؤپمه‌گی اؤزلرینه شرف بیلن یالتاقلار، بوگۆن باشقا قاپیلاری دؤیمه‌گه گئتمیشلر. 》

قوْناقلیق گئجه ساعت بیرده بیتدی. گؤروشدوک، اؤپوشدوک، بیر-بیریمیزه اوْلان تاپشیْریق لاری وئردیک. یوْل اۆچون هر شئی وقتینده حاضرلنمیشدی. بیزی خوْی شهرینه قدر یوْلا سالماق ایشینه باخان دؤرد نفر ده گلیب چیْخدی.

ستارخان-ین ائویندن کیچیک روُس نوْغانلارینی و اَل بوْمبالارینی گؤتوردوک.

سردار بیزی کۆچه قاپی‌سینا قدر یوْلا سالدی و :

《 انقلابیْن گرچک قهرمانلاری مندن آیریلدی.》دئدی.

من سردار-ین قوْناقلیغیندان چیـْخیب ائوه گلدیم. تهمینه خانیْم و اوْغلو حسن آغا اوْتوروب منی گؤزله‌ییردیلر. اوْنلار هارادان‌سا منیم تبریزدن گئتمه‌گیمی ائشیدیب گلمیشدیلر. ائوده اوْلان بۆتون شئی لری اوْنلارا باغیشلادیم، گؤروشوب، تهمینه خانیْم-ا نینا نین یانیْنا کؤچمه‌سینی تاپشیْردیقدا آنا و بالا نینا نین حالینا آغلاماغا باشلادیلار. من حسن آغا-یا دؤنوب سیاسی درنک اۆیه‌لری ایله چالیشمالارینی، و اوْنو گئنیشلندیرمه‌گه باشلاماغینی، سیْرلارینی باشقالارینا وئرمه‌مه‌گی تاپشیْردیم .

قوْرخمایین ! سیز یئنه ده قازاناجاق سیز. سیزین فکرینیز بۆتون دنیا ایشچی‌لرینین فکری دیر. بیر گۆن اوْلاجاق کی تبریز-ین بیرینجی سیاسی درنه‌گینده ایشله ینلرین هیکلینی میدانچالاردا، باغلاردا قوْیاجاقلار. انقلاب جبهه سینده بیرینجی بوْمبانی آتان ایرانلی سنسن و بیرده توتونچو اوْغلو دور. بیر-بیرینیزدن آیریلمایین.》
..

تاریخ
2019.04.20 / 10:05
مولف
محمد سعید اردوبادی
شرح لر
دیگر خبرلر

تبریزین قدیم و مشهور استراحت یئری باغشیمال

آذربایجان قدیم تیکمه صنعتی- تکلدوز تیکمه

دومانلی تبریز ۱۰۴-اۆنجو بؤلوم

بستکار اعتراف ائتدی: "آوروویزییا" سیاسی اویوندور!

"دیوان مجذوب تبریزی"

تبریزین مراسیم یئمکلری

دومانلی تبریز ۱۰۳-اونجو بؤلوم

تبریزین عظمت‌لی تاریخی- قدیم کهریزلر- آلتینجی یازی

بوتؤو آذربایجان سئودالی‌سی دونیا شهرت‌لی ماراغالی عالیم

باکی‌دا واقیف صمد اوغلونون یوبیلی تدبیری کئچیریله‌جک

خبر خطّی
 
Axar.az'da reklam Bağla
Reklam
Bize yazin Bağla