Axar.az
یوخاری


دومانلی تبریز ۹۷اینجی بؤلوم

آنا صحیفه کولت
12 Punto 14 Punto 16 Punto 18 Punto

کؤچورن: فرخ جرایدی

"سیاحت نامهء ابراهیم بیگ "

آخشام ساعت دوْققوزدا میس هاننا-نی دهلیزده گؤزله‌مه‌لی ایدیک، دهلیزه چیْخارکن، اوْنون بیزی گؤزله‌دیگینی گؤردوک.
- سیز دینجیزی آلمادینیز می؟- دئیه سوْروشدوم.

- چوْخ آز. سئویندیگیمدن یاتا بیلمه‌دیم .سیزینله بیرلیکده گئده‌جه‌گیمیز یوْلجولوغون ایلک گۆنونو گؤزله‌مک اوْلدوقجا هیجانلی دیر, - دئیه اوُتاندیغیندان باشینی آشاغی سالدی، گؤزلریمه باخا بیلمه‌دی. من اوْنو بیر داها بوُ قوْنو دا دانیْشدیرماق ایستمه‌یه‌رک دئدیم:

- یوْلجولوغوموزا بوُ قدر دَیر وئردیگینیزی بیلمیردیم. هر حالدا سیزین تبریز-ه قدر اوْلان یوْلجولوغونوزدا راحاتلیغینیزی اَلده ائتمک اۆچون چالیْشاجاغام. لاکین اوْنو دا دئمک ایستردیم کی منده بیر اؤزل‌لیک یوْخدور. سیزه قارشی اوْلان سایقیم آنجاق کیشیلیک گؤره‌وی ایچینده اوْلان ایشلردیر، سیزین تَک اوْلمانیز، اؤزل‌لیکله اوُزاق بیر اؤلکه‌دن انقلاب ائتمیش بیر اؤلکه‌یه دۆشمه‌گینیز ده هـَر بیر آدامین سیزه سایقی بسله‌مه‌سینی ایستر.

قیز منیم قوْلومدان توُتوب گئدیر و دانیْشیردی. اوْ یئنه دانیْشیغی منیم اوْنا گؤستردیگیم سایقی‌نین اۆزه‌رینه گتیریب و دئدی:

- من سیزین سایقیلی بیر یوْلداش اوْلدوغونوزا اینانیرام. لاکین اوْنا بللی بیر شکل وئرمکدن عاجزم. سایقینیز هر کَسین یانیندا یۆکسک دیر. لاکین بوُ سایقی بیر تاجره اوْلان سایقیدان اۆستوندور. دوْغروسو سیزین شخصیت‌ینیز منده اوْ قدر یۆکسک بیر ائتگی بوُراخمیشدیر کی، اوْنو اداره ائتمک، اوْنو بللی بیر قالیب-ه سالماق امکانینی الده ائده بیلمیرم. کیم بیلیر بلکه منیم قادیْنلیغیمین دا بوُ ائتگی‌نین یۆکسلمه‌سی ایشینده بیر روْلو وار.

میس هاننا سؤزونو بوُنونلا بیتیردی. من اوْنون اوُتاندیغینی، حتی تیتره‌دیگینی حس ائدیردیم. قوْلو، قوْلومدا ایدی، قیْزین بۆتون هیجانلارینی حس ائدیردیم. اوْ، حاجی یئو-ین قاپیْسیندان ایچه‌ری گیرینجه‌یه قدر نه دانیْشدی نه ده اۆزومه باخدی.

بیز ایچه‌ری گیردیکده اوْردا تانیْش یوْلداشلاردان باشقا بعضی تانیْش اوْلمایان قوْناقلارین دا اوْلدوقلارینی گؤردوک. بوُنلارین ایران‌دان گلیب مکه‌یه گئدن حاجی‌لار اوْلدوغونو سوْنرا دان اؤیرندیک. محمد حسین حاجی‌یئو یوْلداش بیزی اوْنلارا تانیْش ائتدی.

میس هاننا اسکندر خان-ین و محمد مجتهدزاده-نین اَلینی سیْخیب تانیْش اوْلدو. سیْرا نصرالله سلام مجتهد-ده گلدیکده قیْز ایکی هاوالی قالماغا باشلادی، اوُتاندی و یا اۆرک ائتمه‌دی.

- ایره‌لی گَلین، خانیْم قیْز, - دئیه شیخ نصرالله سلام اوْنا دؤنوب وَ:

- ایره‌لی تشریف گتیرین من عَوام و کؤهنه بئیین ماللالاردان دئییلم.

شیخ قیْزا اَلینی اوُزالتدی، قیْز اوْنون اَلینی سیْخیب، علی اکبر یوْلداشلا منیم آرامدا اوْتوردو. شیخ محمد حسین یوْلداشا یاخیْب:

- یقین کی آغا-نین خانیْمی‌دیر. دئیه میس هاننا و منی گؤستردی.

محمدحسین یوْلداش ایسه:

- خیر ، یوْلجو دورلار. یوْلدا تانیْش اوْلموشلار، هَر ایکیسی تبریز-ه گئده‌جکدیر. دئدیکده شیخ یئنه ده :

- خیلی خوب، مونس و محجوب خانیْم دیر. چوْخدا با ادب دیر, - دئدی.

شیخ بوُ سؤزو دئیه‌رک قلیانینی چکمه‌گه باشلادی. هئچ کس دانیْشمیردی، آنجاق من قیْزین قوُلاغینا:

- بوُنون " عوام و کؤهنه‌بئیین دئییلم " دئمه‌سینه اینانمایین، اوْ یئنه ده ماللادیر ، روحانی دیر، کؤهنه‌بئیین دیر. 》 دئیه پیْچیلدادیقدا ، قیْز گۆلومسه‌یه‌رک:

- اوْ مسأله‌ده شبهه یوْخدور, - دئیه جواب وئردی.

شیخ اوْنون یاخشی فارسجا دانیـْشدیغینی گؤردوکده، قلیانین قَمیشینی آغزیندان چیْخاریب شاشقینلیقلا باخدی و دئدی:

- بارک الله خانیْم قیْز، ماشاالله خانیْم قیْز !

دانیْشیق باشلادی. دانیْشمالارین هامیسی فارسجا گئدیردی. من میس هاننا-نین ماللا ایله دانیْشماق اۆچون ماجال آختاردیغینی حس ائدیردیم. بوُ امکانی اوْنا یئنه‌ده شیخ اؤزو وئردی.

- من ایلک ائله بیلدیم کی سیز بوُ جنابیْن حَرَمی‌سیز. لاکین سوْنرا دان یوْلجو اوْلدوغونوزو جناب سرکار آغا محمدحسین بوُیوردولار. دئدیکده مجلسده اوْتورانلارین هامیسی شیخ-ین بوُ سؤزلرینه قارشی قیْزین نه جواب وئره‌جه‌گیندن ماراقلاندیلار.
قیْز گۆلومسه‌یه‌رک ماللانین اۆزونه باخدی:

- سیز نه اۆچون منیم بوُ جنابیْن حَرَمی اوْلدوغومو دۆشوندونوز ؟

شیخ اوُدقوندو، نئجه جواب وئره‌جه‌گینی بیلمه‌یه‌رک دئدی:

- چۆنکو سیزین هَر ایکی‌نیز گنج سینیز. بیر-بیرینیزه لایق سینیز. اؤزل‌لیکله سیز گؤزل، ادبلی خانیْم‌سیْنیز.

- سیز منیم گؤزل و اَدبلی اوْلدوغومو نه‌ اؤلچو ایله بللی ائدیرسیز؟- دئیه قیز سوْروشدو.

شیخ قلیانینا بیر درین نفس ووُروب دئدی: سیز آچیْق‌سیز ، اَدب‌ینیز و گؤزل‌لیگینیزده گؤز قاباغیندادیر.

شیخ سؤزونو بیتیررکن ، میس هاننا شیخ-ه یۆگورمک اۆچون حاضرلادیغی سؤزلری بیر-بیر یاغدیرماغا باشلادی:

- مادام کی قادیْن آچیْق اوْلدوقدا اوْنون گؤزل‌لیگینی و اَدبینی داها تئز بللی ائتمک اوْلور ، نه اۆچون جناب مجتهد قادیْنلارین آچیْق گزمه‌سینه اجازه وئرمیر ؟

ماللا نصرالله سلام گؤزلرینی قیْرپیْردی ، چتینلیگه دۆشموشدو مجلسده چیْخیلماز بیر سس‌سیز حکم سۆروردو. من ماللادن اجازه ایسته‌دیم و:

- اگر جناب مجتهد اجازه وئرسه‌یدی من خانیْمین جوابیْنی وئرردیم.

مجتهدین دیلی آچیْلدی:

- بوُیورون اوْغلوم ، بارک الله.

- من جناب شیخ-ین قادیْن آچیْق‌لیغی قوْنوسوندا فکرینی بیلمیرم ؛ آنجاق بوُنو دئیه بیلرم کی، ایراندا قادیْن آچیْقلیغی مسأله‌سینی قوْیماقلا بیرگه، کیشی‌لری ده آچیْق قادیْنلارا لایق بیر کیشی حالینا گتیرمه‌گه چالیشمالی دیر لار.

منیم بوُ سؤزلریمدن سوْنرا سانکی شیخ-ین دیلی آچیْلدی وَ:

- اَحسن ، آفرین ، اوْغلوم ! فرماییشینیز دوْغرو فرماییش دیر. کیشی‌لریمیز، قادیْنلاریمیزدان دا جاهل‌دیر.

تاریخ
2019.05.13 / 09:58
مولف
محمد سعید اردوبادی
شرح لر
دیگر خبرلر

باکی‌دا واقیف صمد اوغلونون یوبیلی تدبیری کئچیریله‌جک

صمد وورغونون واریثی کونسئرت وئریر

باکی‌دا ایران‌لی رسامین فردی سرگیسی آچیلاجاق

تبریزین عظمت‌لی تاریخی- قدیم کهریزلر- بئشینجی یازی

دومانلی تبریز ۱۰۲-اینجی بؤلوم

آذربایجان یازیچی‌لار بیرلییی‌نین «قیزیل‌قلم» جایزه‌سی‌نین غالیب‌لری بللی اولدو

دونیادا یئرلی دیللرین سایی آچیقلان‌دی

سسیم‌ده پروبلم اولدو – چینگیزدن ایلک آچیقلاما

دومانلی تبریز ۱۰۱-اینجی بؤلوم

آذربایجان آشیق صنعتی تاریخین‌ده ایلک دفعه داستان تاماشایا قویول‌دو

خبر خطّی
 
Axar.az'da reklam Bağla
Reklam
Bize yazin Bağla