Axar.az
یوخاری


دومانلی تبریز ۹۸-اینجی بؤلوم

آنا صحیفه کولت
12 Punto 14 Punto 16 Punto 18 Punto

کؤچورن: فرخ جرایدی

شام سۆفراسی ایران ائولرینه اؤزل بیر سۆفرا ایدی، نصرالله سلام و آرخاداشلاری سۆفره‌یه باخیْب گۆلوردولر. آغا محمدحسین حاجی‌یئو بوُ گۆلوشون آنلامینی تئز آنلایاراق دئدی:

- آغالارین مکّه زیارتینه گئتدیگینه سایقی گؤسته‌ره‌رک سۆفره‌یه شراب گتیریلمه‌میشدیر.

نصرالله سلام سؤزه باشلایاراق دئدی:

- بنده ایلک اؤنجه عرض ائتدیم کی، کؤهنه‌ بئیین و عوام ماللالاردان دئییلم. اوْ کی جناب محمدخان مجتهدزاده دیر، اوْ جنابیْن اؤزو ده شراب ساخلایانلاردان دیر. منجه جناب اسکندر خان دا تقلیددن بوْیون قاچیْرمازلار. اوْ کی مکّه‌یه گئتمکدیر، مکّه صاحبی اوْ قدر بؤیوک و باغیشلایان بیر کیشی دیر کی بوجور خیْردا ایشلره باشیْن قاتماز و خیْردا گناهلاری دا حسابیمیزا یازماز.

مجلسده‌کیلرین هامیسی گۆلدو. آغا محمدحسین-ین اشاره‌سیله سۆفره‌یه هر جۆر شراب وئریلدی.

نصرالله سلام یالنیز کوْنیاک ایچیردی. عمامه‌سینی گؤتوروب یئره قوْیموشدو. باشیْندا آغ و نازیک بیر عرقچین قالمیشدی.

- سۆفره باشیْندا باش گئییمینی چیْخارماق لازمدیر، من اوروپالی‌لارین بوُ ایشلرین سئویرم، بوُ هَر بیر آیدیْن دۆشونجه‌لی آدامیْن گؤره‌وی دیر.- دئدی.
من اوْنون بوُ سؤزلرینه تمامیله باشقا معنا وئریردیم. ماللا ایچگی مجلسینده عمامه ایله اوْتورماغی، عمامه‌یه قارشی بیر کیچیلتمه حساب ائدیر و بوُنو دا بیزه بیلدیرمه‌مک اۆچون باشقا بیر دوْنا سالماغا چالیْشیردی. ماللانین یوْلداشلاری دا باشلارینی آچدیْلار. باشلاریْنین اوْرتاسی آلیْنلاریندان بوْیونلارینا قدر ایرانلی لارین" چاتما بیرچک " دئدیکلری اصولدا قیْرخیلمیشدی.

شام بیتینجه‌یه قدر نصرالله سلام آمریکالی قیْزی باشیْن قاتماغا چالیْشیر و جۆر به جۆر سؤزلری اوْرتایا چکیردی.

اوْ، گؤزل و گنج قیْزلا بیر شهوتلی دوْغولو کیمی دئییل، مدنی، آیدیْن دۆشونجه‌لی آغیللی بیر آدام کیمی دانیْشیردی. اسکندرخان لا محمدخان مجتهدزاده‌یه گلدیکده قیْزی گؤزدن کئچیریر، حتی اوْنون ساچیْنی-تئللرینی سایاجاق قدر دقت یئتیریردیلر.

نصرالله سلام قلیان ایسته‌میشدی. من، مجتهدزاده محمدخان لا گَزیشیر و دانیْشیْردیق.

من نصرالله سلام-ا اشارتله دئدیم:

- دوْغرودان دا فکری آچیْق ماللا دیر، قیْزلا اَن مدنی بیر آدام کیمی دانیْشیر.

- رفیق محترم ! بیزیم ناخوْشلوغوموز اؤلوم ناخوْشلوغودور، بیزیم باشیْمیز خسته‌دیر، به عبارت آخر پیشوالاریمیز ناخوْشدور. آغام، اوْ ناخوْشلوق کی من سیزه عرض ائدیرم، اوْنلارین کافاسی همان یئمک سۆفره‌سینین اۆستونه قوْیولان عمامه‌لردن دوْغور. بۆتون بدبخت‌چیلیگیمیز همان قیْرخ-اللی آرشیْن تنظیف‌دن چیْخیر. دوْغروسو بوُ آدام قیْزلا چوْخ اَدبلی دانیْشیر، لاکن بوُنونلا اوْنا مدنی آدام دئمک اوْلماز، چۆنکو اوْنون قادینلاری گؤره‌جک گؤزو یوْخدور. سانکی قادیْنلار اوْنا طبیعت‌جه بیگانه‌دیر. اوْنون قادیْنی وار دیر، لاکن اۆزونه باخماز، چۆنکو اوْ دوْغا دیْشی شَهوت‌ین اسیری دیر. بوُنون اۆچون ده اوْنون گنج عوره‌تی ( همسرش) بیردنه ده اوْلسا اوُشاق دوْغمامیش.

- نه اۆچون ؟ دئیه سوْروشدوم.

- اوْنون یانیْندا دؤرد-بئش گنج اوْغلان قوُللوقچو وار، ایندی بیر نفر گنج-ی ده اؤزو ایله بیرگه مکّه زیارتینه آپاریر، اؤز چیرکین ایشلرینی زیارت‌ده ده تکرار ائتمک ایسته‌ییر. آغا بوُنو سیزه بیر نفر ایرانلی اوْلدوغونوز اوچون عرض ائدیرم. بوُ حرامزاده همان اوُشاغی کربلا و خراسان زیارتینه ده آپارمیشدی، ایندی‌ده مکّه زیارتینه آپاریر. بیزیده بوُ یوْلجولوغا مجبور ائدن اوْ دور. " گرک گئدیب توْبه ائده‌سینیز " دئییب بیزیده اؤز دالیْنجا عربستان چؤللرینه سۆرویوب آپاریر.

بیز بوُ دانیْشیقدا ایکن، ۱۸ یاشلاریندا گؤزل بیر گنج الینده قلیان ایچه‌ری گیردی و قلیانی نصرالله سلام-ین اؤنونه قوْیدو. شیخ ایسه:

- بارک الله حاجی ! دئیه آلقیشلادی.

مجتهدزاده سؤزونون آردیْن توُتوب:

- بوُدور، همان اوُشاق بوُدور، ایندی‌یه قدر مجتهد بیر نئچه بئله‌سینی ساخلاییب، بؤیودوب، بوُراخمیشدیر.

گنج هله ده نصرالله سلام-یْن قارشیْ‌سیندا دورموشدو. گؤزلری قاندان دوْلموش بیر پیاله کیمی قیْزاران نصرالله سلام ایکی گؤزونو اوُشاغا تیکه‌رک باخیْردی. بیر چوْخ باخدیقدان سوْنرا نصرالله سلام اوْنا گئتمه‌گه اجازه وئردی. مجتهدزاده ایسه یئنه سؤزونه باشلایاراق دئدی :
- رفیق ، سیز بیزیم رهبرلریمیزی تانیماییرسینیز. اوْنلارین هامیسی بوُ خسته‌لیگه توُتوشوبلار.

- بوُ بدبخت اوُشاقلارین سوْنو نئجه اوْلورمو؟ دئیه سوْروشدوم.

- اوْنلار اؤز گنج‌لیگینی بوُ اخلاق‌سیزلارین قوُجاغیندا کئچیردیکدن سوْنرا ، مجتهد-ین واسطه‌سیله حکومت ایشلرینه قوْیولورلار . اؤرنک اوْلاراق نصرالله سلام-یْن بوُیوروغونا گؤره ماراغا حاکمی " حاج صمد خان " کیمی اخلاق‌سیزلار بوُ اوُشاقلارا حکومت ایشیلرین اؤیره‌دیب و ایش اۆستونه آپاریر، چۆنکو صمد خانین اؤزوده نصرالله سلام-یْن آتاسینین یانیْندا بؤیوموش، سوْنرادا حکومت ایشلرینه کئچمیشدیر. ایندی‌لیکده اوْ، ' شجاع الدوله ' دیر. دولتین ایگیدی دیر.

ایندی ایسه بیزیم دولتی، اوْنون مجتهدینی و بیزیم حکومت آداملاریمیزین، کیم اوْلدوغونو، نئجه بؤیودوگونو گؤره بیلرسینیز . بوُ کیمی اخلاق‌سیزلیغا اؤیرنمیش و بوُ آلچاقلیغین ایچه‌ریسینده بؤیوموش گنج‌لر حکومت ایشلرینه کئچندن سوْنرا، اؤز باشیْنا گلنلری باشقا گنج‌لرین باشیْنا گتیریرلر، اوْدور کی اؤلکه‌میزی اخلاق‌سیزلیق بۆروموشدور.

تاریخ
2019.05.14 / 09:58
مولف
محمد سعید اردوبادی
شرح لر
دیگر خبرلر

باکی‌دا واقیف صمد اوغلونون یوبیلی تدبیری کئچیریله‌جک

صمد وورغونون واریثی کونسئرت وئریر

باکی‌دا ایران‌لی رسامین فردی سرگیسی آچیلاجاق

تبریزین عظمت‌لی تاریخی- قدیم کهریزلر- بئشینجی یازی

دومانلی تبریز ۱۰۲-اینجی بؤلوم

آذربایجان یازیچی‌لار بیرلییی‌نین «قیزیل‌قلم» جایزه‌سی‌نین غالیب‌لری بللی اولدو

دونیادا یئرلی دیللرین سایی آچیقلان‌دی

سسیم‌ده پروبلم اولدو – چینگیزدن ایلک آچیقلاما

دومانلی تبریز ۱۰۱-اینجی بؤلوم

آذربایجان آشیق صنعتی تاریخین‌ده ایلک دفعه داستان تاماشایا قویول‌دو

خبر خطّی
 
Axar.az'da reklam Bağla
Reklam
Bize yazin Bağla