Axar.az
یوخاری


قاراباغ خالچالارین‌دا تبریز روحونو یاشادان گونئی‌لی خالچاچی

آنا صحیفه کولت
12 Punto 14 Punto 16 Punto 18 Punto

اؤلکه‌میزده خالچاچی‌لیق صنعتین اینکیشافینا تؤهفه وئره‌نلردن بیری ده علی فرخی تبریزلی اولوب. او، وطن حسرتینی، یورد نیسگیلینی ایلمه‌لره، ناخیشلارا کؤچوره‌رک صنعت‌ده ایز قویوب.

علی فرخی ۱۹۲۸-جی ایلده تبریز شهرین‌ده دونیایا گؤز آچیب. ائرکه‌ن چاغلاردان خالچاچیلیغا ماراق گؤستریب. ۱۹۴۵-جی ایلده تبریزده میللی آزادلیق حرکاتینا قوشولوب، میللی حکومت سوقوط ائد‌ندن (۱۹۴۶) سونرا باکییا گلیب. بورادا دا خالچاچیلیقلا ماراقلانیب، اعجازکار صنعتین سیرلرینه ییه‌له‌نمه‌یه چالیشیب. بو آرزو-ایستک اونو گؤرکملی خالچاچی رسام لطیف کریمووون یانینا گتیریر. خالق رسامی اونون ایستعدادینی بینیر و اونو «آذرخالچا» بیرلیین‌ده ایشه گؤتورور.

قاراباغ‌دا خالچاچیلیغین اینکیشافینا دایر حکومت طرفین‌دن وئریله‌ن سرانجامین ایجراسی علی فرخییه تاپشیریلیر. او، قیسا واخت عرضین‌ده ایشین عهده‌سین‌دن گلیر و آغدام‌دا خالچاچی‌لیق اینکیشاف ائتمه‌یه باشلاییر. عینی زامان‌دا بورادا تبریز خالچاچی‌لیق مکتبینین بیر سیرا یئنی عنعنه‌لرینین تطبیقینه باشلانیلیر. ۱۹۵۴-جو ایلده‌ن باشلایاراق خئیلی سایدا آغداملی گنج خانیم اونون کمکی سایه‌سین‌ده خالچاچیلیق صنعتینین سیرلرینه ییه‌لنیر.

تدریجا علی فرروخی خالچاچی متخصص کیمی بوتون رسپوبلیکادا تانینیر. اونون وطن سئورلیک دویغولاری صنعت‌ده ده اؤزونو گؤستریر. دایم تبریز حسرتی ایله یاشایان خالچاچینین توخودوغو خالچادا بؤیوک شاعر محمدحسین شهریارین و آذربایجانی ایکییه آییران آراز چایینین تصویری عکسینی تاپیر.

علی فرخی هم ده خییرخواه اینسان اولوب. بئله دئییرلر کی، بیر گون او، آغدام شهرین‌ده اؤز خالچا دوکانینین قارشی‌سین‌دا دایانیبمیش. بو زامان «آی کیلیم آلان، آی کیلیم آلان» دئیه-دئیه آغ ساققال بیر کیشینین دوکانا طرف گلدیینی گؤرور. بازاری باشدان-باشا دولاشان و کیلیمینی ساتا بیلمه‌یه‌ن آغساققال چوخ یورغون حال‌دا دوکانین قاباغیندان کئچیر. علی فرخی اونون حالینا آجیییر، یانینا چاغیریب کیلیمین پولونو آرتیقلاماسی ایله اؤدییر. اما بو مقام‌دا او، قوجا ساتیجینی داها بیر حرکتی ایله تعجوبلندیریر. پولونو آلیب گئتمک ایسته‌یه‌ن‌ده اونو ساخلاییب دئییر: «آغ ساققال، ایندی بیر اوغلون کیمی من بو کیلیمی سنه هدییه ائدیره‌م...»

پوبلیسیست ائلدار حسنلی آراشدیرماسین‌دا یازیر کی، علی فرخی تبریزلی چوخ قوناقپرور شخص اولوب. تانینمیش شاعرلردن سهراب طاهیر، محمد آراز، خلیل رضا اولوتورک، بختیار واهاب‌زاده، فامیل مهدی، حسین عاریف اونون ان چوخ علاقه ساخلادیغی دوستلاری اولوب. خالق یازیچی‌سی میرزا ایبراهیموو، خالق شاعری نریمان حسن‌زاده، یازیچی جمیل علیبیوو، ائل‌جه ده مشهور صنعت آداملارین‌دان لطفعلی عبدوللایئو، روبابه مورادووا، سارا قدیمووا تئز-تئز اونون قوناغی اولارمیشلار.

ادبیات و مدنیت خادیملری ایله اولان اونسیتی تبریز حسرتینی بیر آن دا اولسون اونوتدورمور. او، قدیم صنعت بئشیی ایله نفس آلیر. علی فرخی بیر گون «ناخچیوان» قزئتی رئداکسییاسینا مکتوب یازاراق خواهیش ائدیر کی، تبریزدن اونون اوچون بیر اوووج تورپاق گتیرسینلر، بو دونیادان کؤچه‌ن‌ده اؤولادلاری گؤزلرینه تؤکسون... طبیعی کی، اونون بو خواهیشینی او دؤورده یئرینه یئتیرمک مومکون دئییلدی.

عمرونون سون چاغلارین‌دا ان بؤیوک آرزوسو تبریزده قالان قارداشی حسینی، باجی‌سی زهرانی و دیگر یاخین قوهوملارینی گؤرمک ایدی. تبریز حسرتی گوج گلنده سهراب طاهیری آغداما دعوت ائدر و اونونلا دردلی-کدرلی فیکیرلرینی بؤلوشرمیش.

آراشدیرمالاردا بیلدیریلیر کی، او هم ده گؤزل عائله باشچی‌سی اولوب، ۱۲ اؤولاد بؤیودوب تربییه ائدیب، اوغلانلاریندان بیرینه ده تبریز آدی وئرمیشدی.
علی فرخی تبریزلی ۱۹۸۱-جی ایلده، ۵۳ یاشین‌دا آغدام‌دا دونیاسینی دییشیر، بیر چوخ صنعت آرزولاری یاریمچیق قالیر.

تاریخ
2019.05.14 / 13:08
مولف
آینورا مممدووا
شرح لر
دیگر خبرلر

باکی‌دا واقیف صمد اوغلونون یوبیلی تدبیری کئچیریله‌جک

صمد وورغونون واریثی کونسئرت وئریر

باکی‌دا ایران‌لی رسامین فردی سرگیسی آچیلاجاق

تبریزین عظمت‌لی تاریخی- قدیم کهریزلر- بئشینجی یازی

دومانلی تبریز ۱۰۲-اینجی بؤلوم

آذربایجان یازیچی‌لار بیرلییی‌نین «قیزیل‌قلم» جایزه‌سی‌نین غالیب‌لری بللی اولدو

دونیادا یئرلی دیللرین سایی آچیقلان‌دی

سسیم‌ده پروبلم اولدو – چینگیزدن ایلک آچیقلاما

دومانلی تبریز ۱۰۱-اینجی بؤلوم

آذربایجان آشیق صنعتی تاریخین‌ده ایلک دفعه داستان تاماشایا قویول‌دو

خبر خطّی
 
Axar.az'da reklam Bağla
Reklam
Bize yazin Bağla