Axar.az
یوخاری


آنا دیل‌لی تاریخیمیزه عایید یازی نمونه‌سی -«صفوییه پادشاهلاری»

آنا صحیفه کولت
12 Punto 14 Punto 16 Punto 18 Punto

آذربایجان میللی علملر آکادئ‌مییاسینین محمد فضولی آدینا الیازمالار اینستیتوتون‌دا ساخلانیلان «صفوییه پادشاهلاری» آدلی الیازما «دربندنامه»دن سونرا آذربایجان تورکجه‌سین‌ده تاریخیمیزه عایید ایکینجی یازیلی نمونه‌دیر. مؤلفی هله‌لیک بللی اولمایان اثر صفوی دؤولتینین سقوطو عرفه‌سین‌ده باش وئرن اجتماعی-سیاسی حادثه‌لردن، افغانلارین قالدیردیقلاری عصیاندان، صفویلرین اونلارلا آپاردیغی مباریزه‌دن بحث ائدیر.

الیازمانین گیریش حیصه‌سین‌ده ۱-جی شاه ایسماییل‌دان ۳-جو شاه عباسا قدر صفوی شاهلارینین حاکمیتده اولدوقلاری دؤور حاقین‌دا معلومات وئریلیب و بو مدت عرضین‌ده دؤولتده یوکسک مؤقع توتان شخصلرین آدلاری چکیلیب، وظیفه‌لری گؤستریلیب.

اثرین مؤوضوعسو صفوی دؤولتینین تاریخی ایله علاقدار ۱۸-جی عصرین بیرینجی یاریسیندا بؤیوک آکتواللیق کسب ائدیب. مشهور مؤلفلر ژوزف تیفلیسی، تابئوش کروشینسکی، موسیؤ د قاردان صفوی-افغان مناسیبتلرینه دایر آیریجا اثرلر یازیبلار. دورری احمد افندی ده «سفارتنامه» اثرینین بیر حیصه‌سینی بو مؤوضویا حصر ائتمیشدیر. ۱۷۰۳-۱۷۲۱-جی ایللرده صفوی دؤولتین‌ده اولموش عثمانلی جاسوسو بدر الدین‌زاده بو باره‌ده یازیلی شکیل‌ده گیزلی معلومات وئرمیش‌دیر. صفوی دؤولتینین اجتماعی-سیاسی وضعیتین‌دن اؤز ماراقلاری اوچون ایستیفاده ائد‌ن دؤولتلرین نماینده‌لرینین مؤوقعینین بو دؤولتین علیهینه اولدوغونو اونلارین اثرلرین‌دن ده آیدینجا گؤرمک مومکون‌دور.

لاکین بو مؤوضوعیا حصر اولونموش اثرلر آراسین‌دا یالنیز «صفوییه پادشاهلاری»نین مؤلفی، آچیق شکیل‌ده بیلدیرمه‌سه ده، بوتون مسئله‌لری صفویلرین مؤوقعین‌دن ایضاح ائتمه‌یه چالیشمیش، صفوی خاندانینین طرفداری اولدوغونو گؤسترمیشدیر. طبیعی کی، بئله بیر مؤقع آذربایجان‌لی مؤلفه خاص اولا بیلردی. مؤلف بورادا صفوی دؤولتینین برپا اولوناجاغینا اینانیر و بونو اؤلکه‌نی افغانلاردان و عثمانلیلاردان آزاد ائتمیش طهماسیب قولو خانین (نادیر شاهین) حربی اوغورلاری حاقین‌دا معلومات وئرمکله نماییش ائتدیریر.

بو اثر تاریخی فاکتلارلا زنگینلیینه گؤره دئییل، ایلک نؤوبه‌ده دیلینه گؤره دقتی جلب ائدیر. آذربایجان تورکجه‌سین‌ده بیر چوخ علم ساحه‌لری ایله باغلی یازیلی عابده‌لرین اولماسینا باخمایاراق، حساب ائدیریک کی، «صفوییه پادشاهلاری» دا یازیلی دیلیمیزین تاریخینی اؤیره‌نمک باخیمین‌دان بیزه یئنی ماتئریاللار وئره بیلر. بو جهت‌دن اثرده‌کی باش‌لیقلار بیر سیرا یازیلی ادبی عابده‌لریمیزین، خصوصیله ده «کیتابی-دده قورقود»اون باشلیقلارینی خاطیرلادیر.
اثرین بعضی حیصه‌لرین‌ده حادثه‌لر دؤورون جان‌لی خالق دانیشیق دیلین‌ده تقدیم اولونور: «داروسسلتنیی-قزوین‌ده شاه طهماسب جلوس ائیله‌دی. اوندان قوشون جمع ائیله‌مک اوچون قزوین‌دن تبریزه گئتدی. محمود ائشیتدی کی، شاه تهماسب قزوین‌ده جولوس ائدیب‌دیر. قوشون قزوینه گؤندردی کی، شاه تهماسی توتالار. افغان قزوینه گلیب قزوینی محاصره ائیله‌دی. آلتی آی قزوین محاصره اولدی…»

«صفوییه پادشاهلاری» اثرینین الیازماسی ۱۷۳۳-جو ایلین ۲۹ سنتیابرین‌دا کاتیب میرزا سولئیمان دیلماچ طرفین‌دن کؤچورولموشدور.

تاریخ
2019.05.14 / 13:46
مولف
آینورا مممدووا
شرح لر
دیگر خبرلر

"دیوان مجذوب تبریزی"

تبریزین مراسیم یئمکلری

دومانلی تبریز ۱۰۳-اونجو بؤلوم

تبریزین عظمت‌لی تاریخی- قدیم کهریزلر- آلتینجی یازی

بوتؤو آذربایجان سئودالی‌سی دونیا شهرت‌لی ماراغالی عالیم

باکی‌دا واقیف صمد اوغلونون یوبیلی تدبیری کئچیریله‌جک

صمد وورغونون واریثی کونسئرت وئریر

باکی‌دا ایران‌لی رسامین فردی سرگیسی آچیلاجاق

تبریزین عظمت‌لی تاریخی- قدیم کهریزلر- بئشینجی یازی

دومانلی تبریز ۱۰۲-اینجی بؤلوم

خبر خطّی
 
Axar.az'da reklam Bağla
Reklam
Bize yazin Bağla