Axar.az
یوخاری
18 اییون 2019


دومانلی تبریز ۱۱۸ -اینجی بؤلوم

آنا صحیفه کولت
12 Punto 14 Punto 16 Punto 18 Punto

کؤچورن: فرخ جرایدی

" تبریز یوْللاریندا "

شئی‌لریمیز فایتوْن دا ایدی، نهایت علی اکبر یوْلداش دا بیر بؤیوک پاکت روُس سیگار-ی گتیریب فایتوْنا قوْیدو و:

- بوُنلار دا یوْللاردا دوُران تزار سالدات لارینا هدیه دیر , - دئدی.

گۆن چیْخار کن تبریز شوسه یوْلونا دۆشموشدوک. قاراووْل دوُراقلاری‌نین آراسی چوْخ یاخیْن ایدی. دوُراقلارین قاباغیندان کئچدیکده:

- اِی دای پاپیروْس ( هی منه سیگار وئر) .- سؤزلریندن باشقا بیر سؤز ائشیتمیردیک. کئچمیشده گؤردوگوموز چایچی دکانلاری‌نین هامیسی قاراووْل دوُراقلارینا چئوریلمیشدی، تزار سالداتلاری‌نین قوْرخوسوندان بیر دَنه ده اوْلسون چایچی دکانی قالمامیشدی.

بیز ' دره دیز ' دن کئچنده سالداتلار یاش میوه آپاران بیر کندلی‌نین یۆکۆن داغیْدیردی. کندلی یازیْق سبد لری آچیْب یئره سالدی و اوُزون قوُلاغینی بیزله‌ییب قاچدی.

گَزمه قزاق دسته‌لرینه توُش گلیردیک، بوُنلاردا کیچیک کاروانلارا سوْخولوب و « نا چای » دئیه « چای پوُلو » ایسته‌ییردیلر.

اوْن نفرلیک بیر قزاق دسته‌سی فایتوُنوموزا یاناشدی. بیزی دقتله گؤزدن کئچیردیلر. میس هاننا نین و منیم ایرانلی یا اوْخشامادیغیمیزی گؤروب علی اکبر یوْلداشا دؤنوب روُس جا :

- ایرانلی ! ستار خان-ی تانییرسان می؟- سوْروشدولار.

علی اکبر یوْلداش روُس جا چوْخ گؤزل دانیْشا بیلیردی ، لاکین اؤزونو بیلمه‌مز لیگه ووُروب:

- من ستارخان-متارخان بیلمز، من بوُنلاری بیلمه‌رم.

- یاشا سنی ، چای پوُلو واردی ؟

یئنه ده علی اکبر یوْلداش اؤزونو بیلمه‌مزلیگه ووُراراق:

- من چای ایچمز، شراب دا ایچمز، ایچگی ده ایچمز، من ناماز قیلارام، گؤرمورسن می ؟ مسلمانام.

قزاق لار اَل چکمه‌ییب « نا چای » سؤزونو علی اکبر یوْلداشا باشقا بیر یوْللا قاندیْرماغا باشلادیلار. بیریسی الینی دؤشونه قوْیوب سیْنیق-سالخاق تۆرکجه‌ده:

- سن پوُل وئر ، من چای ایچیم، من اؤتوروم، سن گئت تبریز. دئدی.

بوُندان سوْنرا علی اکبر یوْلداش قزاقلاری بئش قیران ایران پاراسی ایله یوْلا سالدی.

بۆتۆن یوْلو بئله اوْلای لارلا باشا وئردیک. آمریکالی قیْز اوُزاقدان تزار سالداتلاری‌نین باشیْنی گؤردوکده گیزلنمه‌گه یئر آختاریردی. گۆنش باتی‌یا دوْغرو ایره‌لیله‌دیکجه مرند شَهری‌نین اوُزاقدان گؤرونن قارالتی‌سی دا گئت-گئده بؤیومکده ایدی.

مرند شَهَری کئچمیشده گؤردوگوم شَهَر دئییلدی، شهرین چئوره‌سینده مصر اهراملاری کیمی بیری-بیری‌نین یانیْندا دۆزۆلمۆش عسگر چادیْرلاری‌نین اوُجو-بوُجاغی یوْخ ایدی. شهرین کۆچه‌لرینده سواری و پیاده قوْشون بؤلوملری قاریْشقا کیمی قایناشیْردی. بیر اوْلای باش وئررکن یوْلا دۆشمک اۆچۆن محله‌لرین بیر چوْخو سؤکولوردو.

چئوره‌ده سالدات قیْشلالاری ( پادگان ) تیکیلیردی. شَهَرین هر طرفینده تلفن خطی دۆزلمیش و مرند شهری‌نین یاشامی جبهه یاشامی شکلینی آلمیْشدی.

تاریخ
2019.06.11 / 09:58
مولف
محمد سعید اردوبادی
شرح لر
دیگر خبرلر

نسیمینین غزللر توپلوسو موسکوادا ایشیق اوزو گؤردو

دومانلی تبریز ۱۲۵-اینجی بؤلوم

خییوو اؤیکو یازارلاری بیر یئره توپلاندی

دومانلی تبریز ۱۲۴-اۆنجو بؤلوم

گونئی آذربایجان فولکلورو-«چؤمچه خاتون» مراسی‌می

آذربایجان ایلک و سون عنوانیم ، باش تاجیم‌دیر- آغابی آذربایجانی

دومانلی تبریز ۱۲۳-اونجو بؤلوم

عالیم قاسیموو کیلسه‌ده اذان وئردی - ویدئو

«کیم گؤردو_کیم گؤرمه‌دی‌» تیاتروسوندا نه‌لر یاشانیر

همدان دا ۴۳-جو ماغارا آشکار ادیلدی

خبر خطّی
 
Axar.az'da reklam Bağla
Reklam
Bize yazin Bağla