Axar.az
یوخاری
18 اییون 2019


دومانلی تبریز ۱۱۹-اۆنجو بؤلوم

آنا صحیفه کولت
12 Punto 14 Punto 16 Punto 18 Punto

کؤچورن: فرخ جرایدی

بیز پست باشچی‌سی ' احمد خان مقیم الدوله 'نین ائوینده دۆشه‌جکدیک، جوُلفادان اوْنا تلگراف لا خبر وئریلمیشدی.

احمد خانین ائوینه یئتیشدیکده قارانلیْق دۆشموشدو. بیزی گؤزله‌ییرمیش کیمی فایتوْن قاپیْدا دایانان کیمی خان دیْشاری چیْخدی. تانیْش اوْلدوق. قوُللوقچولاری شئی‌لریمیزی فایتوْندان گؤتوردولر. میس هاننا نین دوُرومو یاخشی دئییلدی، یوْل ایستی ایدی، اؤزل‌لیکله آخشام مرنده یئتیشمک اۆچۆن فایتوْنچو چوْخ سرعتله سۆرمۆشدو. احمد خان حکیم چاغیرماق ایسته‌دیسه‌ده، قیْز راضی اوْلمایاراق قوُلاغیْما یاواشجا:

- وان اوْلسایدی، چیمسه‌یدیم، راحت اوْلاردیم,- دئدی.

احمد خان مساله‌نی آنلادی:

- ائو حمامی‌نی حاضرلاتمیشام. گؤزل وان-ی دا واردیر. یوْلدان گلیب یوْرولدوغونوزو بیلیردیم. » دئدی. سوْنرا اوْتاغا گئتدی چوْخ کئچمه‌دن قوُللوقچو قادین الینده آغ بیر بوْخچا اوْلاراق چیْخیب باغچانین اوْبیری باشیْندا کی حماما طرف گئتدی. بیز هله بالکن‌دا اوْتورموشدوق. خانین آروادی دا باشیْندا آغ چادرا اوْلدوغو حالدا دیْشاری چیْخاراق بیزیمله تانیْش اوْلدو و میس هاننا نین تئللرینه الینی گزدیره‌رک:

- گَل قیْزیم، گَل قوْرخما، راحت اوْلارسان.- دئیه حماما آپاردی.

بیزیم هامیمیزین یوُونماسی ایکی ساعته قدر چکدی. حمامدان راضی قالدیق. بیز ایران ائولرینده بئله بیر دۆزگون حمام اوْلدوغونا اینانمازدیق.

چای ماساسی بالکن‌دا قوْیولموشدو. خانین ائوی‌نین قاباغی چیچک‌لیک و بؤیوک باغچالیق ایدی. اوْنون دئدیگینه گؤره مرند شهری‌نین ائولری تمامیله باغلیق و باغچالیق ایچینده دیر.

آمریکالی قیْز یالنیز بیر استکان چای ایچه بیلدی. چوْخ یوْرغون ایدی.

من:

- بلکه سیز راحت اوْلماق ایسته‌ییرسینیز ؟ - دئدیکده اوْ:

- اجازه وئرسه‌نیز- دئدی.

احمد خان آیاغا قالخدی. منی اؤزو ایله بیرگه گؤتوردو، اۆچ دؤشنمیش اوْتاق گؤستردی.

- خانیْم اۆچۆن هانسی‌نی یاخشی گؤرورسونوز بوُیوروب راحت اوْلسون- دئدی.

من میس هاننانین اؤزونو چاغیْریب اوْندان سوْروشدوم.

- هانسی بیریسی اوْلورسا اوْلسون. دئیه میس هاننا ایکینجی اوْتاغا کئچدی.

خانین قوُللوقچوسو اوْلان گنج قیْز دا اوْنون قوُللوغونا وئریلدی. خانین آروادی دا تئز-تئز اوْنون اوْتاغینا گیریر و دوُرومون نئجه اوْلدوغونو احمد خانا خبر وئریردی.

خانین ائولادی یوْخ ایدی. اللی یاشیندا گؤزل، قارا ساققال، قارا بنیز کیشی ایدی. آروادی دا اؤزو یاشدا ایدی. هر ایکیسی کرمان‌لی ایدی. فارسجا دانیْشیردیلار.

تاریخ
2019.06.12 / 09:58
مولف
محمد سعید اردوبادی
شرح لر
دیگر خبرلر

نسیمینین غزللر توپلوسو موسکوادا ایشیق اوزو گؤردو

دومانلی تبریز ۱۲۵-اینجی بؤلوم

خییوو اؤیکو یازارلاری بیر یئره توپلاندی

دومانلی تبریز ۱۲۴-اۆنجو بؤلوم

گونئی آذربایجان فولکلورو-«چؤمچه خاتون» مراسی‌می

آذربایجان ایلک و سون عنوانیم ، باش تاجیم‌دیر- آغابی آذربایجانی

دومانلی تبریز ۱۲۳-اونجو بؤلوم

عالیم قاسیموو کیلسه‌ده اذان وئردی - ویدئو

«کیم گؤردو_کیم گؤرمه‌دی‌» تیاتروسوندا نه‌لر یاشانیر

همدان دا ۴۳-جو ماغارا آشکار ادیلدی

خبر خطّی
 
Axar.az'da reklam Bağla
Reklam
Bize yazin Bağla