Axar.az
یوخاری
18 اییون 2019


دومانلی تبریز ۱۲۰-اینجی بؤلوم

آنا صحیفه کولت
12 Punto 14 Punto 16 Punto 18 Punto

کؤچورن: فرخ جرایدی

خانین انقلابچی اوْلدوغونو و نسلی‌نین ده ایران انقلابی و ایرانین یئنی‌لشمیش تاریخینده تانیْنمیش بیر نسل اوْلدوغونو منه جوُلفا پست باشچیسی سؤیله‌میشدی .

آخشام یئمه‌گینده اؤزوموزدن باشقا هئچ کس یوْخ ایدی. خان یئمکدن سوْنرا عذر ایسته‌یه‌رک :

« سیزین اۆچۆن بؤیوک قوْناقلیق وئرمک لازم ایدی ، بیر نه‌ده‌نه گؤره من بوُندان واز کئچدیم، چۆنکۆ باشقا آداملار اوْلسا ایدی آچیْق دانیْشمالاریمیزین یوْلو باغلاناردی. بیرده بوُدور کی آداملارا گۆونمک اوْلمور. شَهَرین چوْخو تزار-ین گیزلی گؤرَولی‌سیدیر. عمامه‌لی دن باشلاییب بؤرک گئیه‌نه قدر جاسوسلوقدان لذّت آپاریرلار، بوُ دا مرند خالقیْندا بیر اؤزللیکدیر. بوُنو انقلاب چاغیْندا دا گؤردوک. اوْ چاغ هر یئر مشروطه طرفینده دوُردوسا دا، مرند ضد انقلاب قوُیروغوندان قوْپماق ایسته‌مه‌دی. اینانیز کی، بوُ ناموس‌سوُز شَهَرده یالقیز یاشاماقدایام، اۆره‌گیم قیْزاجاق بیر کیمسه یوْخدور. حکومت باشیْندا اوْتوراندان، منبر باشیْندا اوْتورانا قدر انقلابیْن دشمنی دیر. بوُرادا بیر کلوب آچیْلمیشدیر. شَهَرین تاجرلری، اعیانلاری، حکومت قوُللوقچولاری و تزار طرفدارلاری‌نین هامیسی بوُ کلوب-ا گئتمه‌گه مجبوردور. اوْرادا تزار دَلّال‌لاری ایله تانیْش اوْلماق و ساتیْلماق اۆچۆن اَل وئریشلی اَللر واردیر. کلوب-ون و دَلّال‌لارین یئمک خرجی مرندلی لردن آلیْنیر، شَهَرین والی‌سی بئله ایسته‌ییر. »

« والی کیمدیر ؟ » دئیه سوْروشدوم.

« مشروطه‌چیلرین بوْمباسی ایله پارتلامیش شجاع نظام-ین اوْغلو، موسی الرضا خان، دیر. »

« اوْنو کیم والی ائدیب ؟ »

« تزار حکومتی. چۆنکۆ تزار حکومتی آراز چایی‌نی کئچدیکده ، اوْ قوُربانلار و هدیه‌لرله قارشیْلادی، ژنرال سنارسکی‌نین آتی‌نین جیلوْولاییب اؤنونه دۆشه‌رک ائوینه گتیردی، اوْنون اۆچۆن ده مرند والی‌سی ائدیلدی. روُسلار هر ایشه اَل اوُزاتدی. بین الملل یاسالاری پوْزدولار. ایکینجی " انترناسیونال "-ا شکایت وئردیک، بیر شئی چیْخمادی. »
احمد خان سؤزونو بیتیردی. من اوْنونلا دانیْشماغا ماراقلانیْردیم، چۆنکۆ اوْنون گنج‌لیکدن بَری انقلابی حرکاتا قوْشولدوغونو ائشیتمیشدیم. بوُنا گؤره ده بیر نئچه جمله سؤیله‌مه‌گه اجازه ایسته‌دیم و یاواشجا دئدیم :

« سایین یوْلداش احمد خان ! روُسلارین بین الملل یاسالاری پوْزماسیْندان شکایت ائتمه‌گه لزوم یوْخدور. چۆنکۆ بین الملل یاسالاریْنا باخان بیر حکومت اؤزگه‌نین اؤلکه‌سینه سوْخولماز. ایکینجی انترناسیونال-یْن دا سیزه بیر کؤمه‌گی اوْلا بیلمزدی چۆنکۆ اوْدا کاپیتالیست‌لرین بیر جۆر استثمار ارگانی دیر. وقتی ایله چین‌لی لرده روُسلارین الیندن آوروپا دولت‌لرینه شکایت ده بوُلونوب اوْنلارین بین الملل یاسالاری پوْزماسینی گؤستردیلر. لاکن اوْنلار چین حکومتی‌نین یازدیقلارینی اوْخومادان زیبیل یئشیگینه بوُراخیْردیلار. چۆنکۆ بیر دولت طرفیندن یاپیلان حیاسیزلیقدا اوْ بیری دولت ده اوْرتاق اوْلوردو. ایستر اوُزاق دوْغو، ایستر یاخیْن دوْغو سوْرونلاریندا اوْلسون ، بۆتۆن امپریالیست دولت‌لرین فکری بیردیر، یالنیز بیر فرق وارسا، اوْ دا بؤلوشدورمک مساله‌سینده دیر، بیری آرتیْق گؤتورمه‌گه، باشقاسی ایسه آز بؤلوم آلماغا تله‌سیر. بوُ کیمی خیانت‌لری و حیاسیز استیلالاری بوْغماق اۆچۆن بۆتۆن اؤلکه‌نین کۆتله‌وی عصیانی لازمدیر. هله‌لیک بؤیوک دنیا اوْلایی دا اوُزاق دیر. انگلیس-ژاپن بیرلیگی دۆزلمیش دیر، رقابت کئچه‌جی ده اوْلسا، آرادان قالخمیشدیر. ایران ایشلرینده ده انگلیس-روُسیه ایش بیرلیگی وار. آلمانیانین، انگلیس-فرانسه-روُسیه قارشی سینا دۆزلتدیگی جهانگیرلیک تشکیلاتی دا هله اوُشاق دیر، کالدیر، یئتیشمه‌میشدیر. اوْ دور کی دئییرم بؤیوک دنیا اوْلایی هله اوُزاقدیر. بیر سؤزله دئمک اوْلار کی، روسلار دا ایراندا قالاجاقدیر. باشقا بیر سوْرون داها واردیر کی، اوْ دا ایران انقلابی‌نین دنیا انقلابی تشکیلاتلاری ایله علاقه باغلانماسینا قارشی اوْلموشدور. »

تاریخ
2019.06.13 / 09:58
مولف
محمد سعید اردوبادی
شرح لر
دیگر خبرلر

نسیمینین غزللر توپلوسو موسکوادا ایشیق اوزو گؤردو

دومانلی تبریز ۱۲۵-اینجی بؤلوم

خییوو اؤیکو یازارلاری بیر یئره توپلاندی

دومانلی تبریز ۱۲۴-اۆنجو بؤلوم

گونئی آذربایجان فولکلورو-«چؤمچه خاتون» مراسی‌می

آذربایجان ایلک و سون عنوانیم ، باش تاجیم‌دیر- آغابی آذربایجانی

دومانلی تبریز ۱۲۳-اونجو بؤلوم

عالیم قاسیموو کیلسه‌ده اذان وئردی - ویدئو

«کیم گؤردو_کیم گؤرمه‌دی‌» تیاتروسوندا نه‌لر یاشانیر

همدان دا ۴۳-جو ماغارا آشکار ادیلدی

خبر خطّی
 
Axar.az'da reklam Bağla
Reklam
Bize yazin Bağla