Axar.az
یوخاری
20 یانوار 2019


آغلاییب، آغلاییب، یاتاجاق...-اوشاقلارا آغلاماغا ایجازه وئرملیییک‌می؟

آنا صحیفه یازارلار
12 Punto 14 Punto 16 Punto 18 Punto

یاتانا قدر اوشاغین آغلاماسینا گؤز یومماق چوخ پیس فیکیردیر. بو جور ایدئیا، بو جور مصلحت اوشاغا و اونون اینکیشافینا قطعی لازیم دئییل.

اوشاقلار میوس اولدوق‌دا، هیه‌جان کئچیردیک‌ده و یا بیهوده یئره (ایستدیکلری شئی اولمادیق‌دا) آغلادیق‌دا، اونلار اؤزلرینه گؤره مسئولیت داشییان بؤیوکلرین قوجاغین‌دا آغلامالیدیرلار. دوزدور، اوشاقلار آغلایا-آغلایا یوخویا گئده بیلرلر، مثلاً، تزه دوغولموش کؤرپه‌لری آنالاریندان آیری اوتاغا یئرلشدیردیکده بو باش وئریر. اما بو حقیقی یوخو یوخ، پسیخولوژی مدافعه‌دیر. اوشاق اوچون ان چتینی – آیریلیق‌دیر. «یاخشی، بسدی، صحبتی قورتاراق، من قاپینی باغلاییرام» دئدیکده، بیز اوشاغی آیریلیق و هیجانلا اوزلشدیریریک. بو اوشاقدا پسیخولوژی مدافعه عمله گتیریر و اوشاق بو سبب‌دن یوخویا گئدیر. لاکین، بو دوغرو یاتیزدیرما اصولو دئییل.

اوشاقلار ساکیت شکیلده، راحت بیر یئرده یاتمالیدیرلار. عینیله بیزیم کیمی. اگر سیز بیر والیدین کیمی اونون یوخوسونو دوزگون تشکیل ائتسه‌نیز، بو قالان بوتون موناسیبتلر اوچون اساس رولونو اوینایاجاق. ایکی شئی چوخ موهوم‌دور، بیرینجی‌سی: بیز اوشاقلارلا آراسی کسیلمز موناسیبتلر قورمالیییق. سیز اوشاقلارین ایستدیی واخت سیزینله اولا بیلمه طلبینی اؤدملیسینیز. اودور کی، اگر اونلار سیزی گؤرمورسه، هئچ اولماسا مثلاً سیزی ائشیتمه‌لرینه ایمکان یارادین. اگر ائشیتمیرلرسه، هئچ اولماسا سیزین قوخونوزو دویسونلار. بونون اوچون اؤز گئجه کؤینیینیزی اوشاغین یانینا قویا بیلرسینیز. اونونلا یاخین‌لیق هیس‌سینی باشقا اصوللارلا تعمین ائدین. نتیجه‌ده اونلارین سیزه باغلی‌لیغی او قدر درینلشیر کی، اوشاقلار فیزیکی جهت‌دن یانیمیزدا اولمادان دا بیزیمله یاخین‌لیق دویا بیلرلر. اونلار بیزه اؤز قلبلری ایله باغلیدیرلار. اونلار بیزه بنزه‌مه، تقلید یولو ایله باغلیدیرلار. بو بیزیم اساس مقصدیمیزدیر و بیز صبرلی اولمالیییق. اوشاقلار بو مرحله‌نی اؤتوب کئچه‌جک.

دیگر بیر مقام ایسه اودور کی، بیز اونلارین دقتینی آیریلیق باره‌ده فیکیرلره یؤنلتمملیییک. اونلار خیاله‌ن بیزیمله نؤوبتی گؤروشو فیکیرلرین‌ده جانلاندیرمالیدیرلار. یوخو ایله باغلی پروبلملرده بو، اساس مقام‌دیر. اودور کی، دایم دقتی نؤوبتی گؤروشونوز اوزرین‌ده جملیین. مثلاً، «یوخودا گؤروشریک». اگر بیر نئچه دقیقه‌لیک آیریلماق مجبوریتیندسینیزسه و اوشاغینیز ان کیچیک آیریلیغا بئله دؤزه بیلمیرسه، او زامان تایمئرده ۲-۳ دقیقه واخت قویون و دئیین: «واخت بیته‌نه قدر آنا قاییداجاق، آتا قایی‌داجاق. سنی بیر دفعه ده قوجاقلاماق ایستییرم». داها سونرا دقتی گؤروشجیینیزه یؤنلتمک چوخ موهوم‌دور. تدریجه‌ن اوشاق سیزینله گؤروشمک اوچون سحرین آچیلاجاغینی گؤزله‌یه‌جک قدر بؤیویه‌جک. اگر اونا «یوخودا گؤروشریک» دئسه‌نیز، او سحر سوروشدوق‌دا اونا اونونلا علاقه‌لی گؤردویونوز یوخونو ماراق‌لی شکیل‌ده دانیشین. تئزلیکله، اوشاق یوخونون سیزینله یئنی گؤروش اولدوغو فیکرینه آلیشاجاق و یوخویا گئتمیی صبرسیزلیکله گؤزله‌یه‌جک. یوخویا گئتمه پروسئ‌سی گئتدیکجه آسانلاشاجاق.

اگر سیز بو پروبلئ‌می حل ائده بیلسه‌نیز، اوشاقلیق‌دا میدانا گلن بیر چوخ پروبلئملری حل ائده بیلرسینیز، چونکی ان اساس مسئله، اوشاقلارین دقتینی نؤوبتی گؤروشونوزده جمعله‌مک‌دیر. بئله‌لیکله، سیز اونون دقتینی آیریلیقدان یایین‌دیراجاق، آیریلیغین قارشی‌سینی آلمیش اولاجاقسینیز.

تاریخ
2019.01.13 / 12:18
مولف
آیتاج آراز
شرح لر
دیگر خبرلر

ایییرمی یانوار، سووئت تابوتونا سون میخ - ایواز طاها

شیخ داشناک ستیز

نئجه یازاق: “کی” باره‌ده - ایواز طاها

پورجوادی ناسیونالیسم فارسی گرا و زبان ترکی

نصرالله پورجوادی ناسیونالیسم فارسی گرا و زبان ترکی

آنا دیلینی نئجه اؤیره ندیم

در 20 ژانویه باکو توهم خود خدانگاری مسکو را در هم کوبید

کرسی سفارت ایران در جمهوری آذربایجان

آنا دیلینی نئجه اؤیره ندیم/ بیرینجی بؤلوم

نصرالله پورجوادی ناسیونالیسم فارسی گرا و زبان ترکی

خبر خطّی
 
Axar.az'da reklam Bağla
Reklam
Bize yazin Bağla