Axar.az
یوخاری


خداآفرین بؤلگه سینده نوروز بایرامی

آنا صحیفه یازارلار
12 Punto 14 Punto 16 Punto 18 Punto

آراز چايينين اوستونده خدا آفرين بؤلگه‌سينده خداآفرين سدّينين دوزلمه‌سيله آرازين ساغ قيراغيندا دؤرد كندين دئمك؛ سوجايلي (شجاعلو)، ساريجالي (علي آباد)، ماهريزلي (مفروضلو)، جعفرآباد، سو آلتينا گئتمه‌سيله بو دؤرد كنده ياشايانلاري اولدوقلاري يئردن بير آز آرالي جانانلي شهرجيگينده بير يئره ييغماغا باشلاييب‌لار.

Axar.az خدا آفرين بؤلگه‌سينين بايرام لا چرشنبه ده اولان گله‌نكلريني اوخوجولارا چاتديريريق .

كنديلرين ديديينه بؤيوك چرشنبه چيخاندان سونرا كيچيك چرشنبه باشلار كي ۲۱ گوندو ۳ چرشنبه‌سي وار :

خبرچي (يالانچي) چرشنبه، كوله چرشنبه ، آخير چرشنبه

آخير چرشنبه‌ده آغاج‌لار آييلار، سولارتزه‌له‌نر، يئر آييلار، سويود آغاجلاري اييليب يئره باغير باسارلار ( تعظيم ائدرلر )، نوروز گولو چيخار.

آخير چرشنبه آخشامي هر كس اؤز قاپيسيندا تونقال قالايار، ( كند اهلينين دئديينه قديملر بيري ائوده اولماسايدي كنديلر ييغيشيب قاباقجا اونون قاپيسيندا تونقال قالارديلار.) تونقال قالاناندان سونرا " آغيرليغيم _ اوغورلوغوم تؤكول قال بوردا " دئيه اوْدون اوستوندن آتيلارلار. بوگونده، نئچه دب وار كي هره اؤزونه گؤره اونو ائدر بونلار بئله دير:

پيلاو پيشيرمك:

بو گئجه خانواده بير يئره ييغيلار، خئييرلي سؤز دانيشارلار. بوتون ائولرده پيلاو پيشر. قديم كي يوخسوللوغا گؤره بير پارا ائولرده تكجه بو آخشام اوشاقلار پيلاو يئيه بيلردي.

باجادان سو تؤكمك : قوْهوم قوْنشو زارافات اوچون پيلاو پيشن اوجاغا دامين باجاسيندان سو تؤكرلر كي سؤنسون.

شال ساللاماق:

جاوانلار ساللاماق اوچون قورشاق ، شال ، يايليق يادا چاديرا گؤتوروب ائولرين بيرينين باجاسيندان ساللارلار. ائو ييه‌سي شالا بويالي يومورتادان، پولدان، يئميشدن باغلار. بعضاٌده بيري ائوين قيزينا مشتري دورار ائوين باجاسيندان شالي ساللار، ائوين آناسي گلركي شالا بير پاي باغلاسين:

- بالا يومورتا باغلاديم

- ايسته‌ميرم

- پول باغلاديم

- ايسته‌ميرم

- ياخشي قيزي باغلاديم چك آپار.

انجير آغاجين بورماق:

هر كس بير نيّت ائديب انجير آغاجينين بوداغين بورار. اؤرنك؛ بيري نيت ائدر كي من زيارته گئده‌جم، سحر تئزدن گئديب باخار اير بوروق بوداغ دوزه‌لسه سئوينركي نيّتي قبول اولوب گئدر سفره حاضيرلاشار يوخسا بوداغين بوروغو دوزلمه‌ييبسه اونداديركي نيّت قبول اولماييب.

ائوين بار - باجاسينا داش ييغما:

مال داوارين چؤلدن گلن واختي ائوين بار_ باجاسينين قيراغينا هره بير داش قويار سحر تئزدن گئديب باخارلار هر كسين داشينين آلتينا قورد _ قوش ييغيشسا اوندا سئوينر كي وارلي دئولتلي اولاجاق . بيرينين ده داشينين آلتي بوش اولسا او بئكئفلركي من كاسيب اولاجاغام.

سؤيود آغاجيندان ايستك:

سؤيود آغاجين قوجاقلاييب آللاهدان بير شئي استرلر.

قولاق بيسماق ( قولاق آسما):

بير كس اوره‌يينده بيرسؤز توتوب، اؤرنك؛ نيّت ائدركي گؤره‌ن فيلان خانيمين اوشاغي اولاجاق يوخسا يوخ. گئديب ائوين بيرينده دانيشيقلارينا قولاق وئرر اير ايلك ائشيتدييي سؤز اوشاغا گؤره اولسا سئوينركي نيتّي قبول اولوب.

سو قيراغينا يومورتا دوزمك:

گئجه هره بير چيي يومورتا گؤتوروب آخار سويون قيراغينا گئدرلر. يومورتالاري ديك _ ديكينه سويون قراغيلا باسديرارلار يانلارينا دا زي، كؤمور، قيرميزي جوهر قويارلار. اوباشدان گئديب باخارلار بيرينين يومورتاسينا گؤررسنكي قيرميزي لكه، بيرينينكينه آغ لكه، بيرينينكينه ده قارا لكه دوشوب. آغ لكه كيمينكينه دوشسه بختي آغ اولار، قيرميزي اولاسا قيرميزي گونه چيخار هر كسين ده يومورتاسينا قارا لكه دوشسه او بئكئفلر كي باختي قارا اولاجاق.

آخير چرشنبه تونقال قالانيب چئورسينده شنليك ائدندن سونرا ائولره چكيلرلر ائولرده يار_ يولداش، تاي_ توش بير يئر‌ده دئييب، گولوب، اوينايارلار. قاباقجالار آشيق گتيررميش‌لر. اوباشدان كند اهلي دوروب، يومورتا قويان يومورتاسينا باش چكر، انجير بوران انجيرينه. جار_ جاوانلار دا آخار سويا ساري يؤنه‌لرلر؛ آخي بوگون سو تزه‌له‌نيب چايلاردا آخان سو دنيزلرده دالغالانان سو تزه سودو. قيزلار سويون اوستوندن آتيلب، " آغيرليغيم اوغورلوغوم تؤكول قال بوردا" آتيل باتيل چرشينبه باخيم آچيل چرشبنه" دئيه سويون اوستوندن آتيلارلار. ( قاباقجالار آراز چايينين يانيندا اولدوقلارينا چوخلاري گئديب آرازدان كئچرديلر ). اوغلانلار سويون اوستوندن آتيلاندان سونرا دوشوب سودا چيمرلر. قادينلار گؤي گؤره‌نتي دريب سويا وئررلر. بولاقلارين تزه سويوندا يويونارلار. گلنده ده اؤزلريله تزه سو، بولاغين دا خيردا داشيندان گتيررلر. داشلاردان نهره‌يه سالارلار كي بركتلي اولسون سويو دا ائوين دؤرد بوجاغينا سپرلر كي تزه سودان ائوه خئير بركت دوْلسون. سونرا ائوين قاباغيندا تونقال قالايارلار. ائوي قوروملايارلار :

ائو قوروملاماق:

ايل باشينا كيمي اوجاق يانان ائوده اودون هيسيندن ائوين ديره‌كلرينده، بور _ بوجاغيندا قوروم باغلانار خانيملار سوپورگه‌نين دسته‌سينه آغاج باغلاييب، ائوين قوروملارين تميزلرلر. ائوي تميزله‌يندن سونرا بوغدا قاويريب، ائوين دؤرد بوجاغينا سپرلر كي ائو بركتلي اولسون.

كيشي‌لر چرشنبه گونو داغدا، باييردا گزيشرلر. قيزلاردا آغاجلارا كوف باغلاييب اوينايارلار. بئله‌ليكله بايرام اؤزو چاتار، ايل دييشيلر يئني ايل باشلانار. هامي تزه پالتار گئيينيب، ائوينده بؤيوك بير سفره آچيب اوسونه مئيوه، شيرني ييغار. كندين كيشيلري كندين مئيدانينا ييغيشيب اير او ايلي كندده قارا بايراملي اولسا ياني ياسلي عايله اولسا اونلارا گئديب بير فاتحه وئررلر. اولماسا كندين آغ‌ساققالارينين ائويندن باشلاييب بير _ بير ائولره گئديب، قاپيدان گيريب "بايرام – چرشنبه‌ز موبارك اولسون، نئچه _ نئچه بئله بايراملار گؤره‌سيز " دئيه اوتوروب مئيوه‌دن، شيرنيدن يئييب دورارلار. بير _ بير ائولري گزيب قورتارارلار. كيشيلردن سونرا خانيملار دسته_ دسته گئديب ائولرده بايرامي تبريكلرلر. خانيملار هره‌سي اللرينده بير لعنبه‌‌كينين ايچينه ايكي شيرني قويوب ائولره گئدرلر هانسي ائوه گئتسه‌لر شيرنيلري او ائوده قويوب يئرينه آيري شيرني او ائودن گؤتوررلر بئله‌ليكله ائودن ، ائوه شيرني آپارارلار. بايرام گلر ايونلاريلا :

بَي - گيزير اوْيونو:

جار- جاوان بير يئره ييغيشيب اؤز آرالاريندان بير بي سئچرلر بَيين قاباغينا بير آت كلله‌سي سومويون بير قاميش قويارلار ، بَي ده اؤزونه بير گيزير سئچر نئچه نفرده مامور وئررلر ، بَي بويروق وئرمه‌‌يه باشلار. بيرين توتوب گتيررلر بَيين يانينا. بَي، گؤيلوندن كئچه‌ني اوندان ايستر؛ يا دئير بير تويوق يا جوجه وئر! يا دا گيزيره دئير آپار اونا بير ايكي يوموروق يا تپيك وير، بوراخ.

يومورتا دؤيوشدورمك:

هر كس بير نئچه بويالي يومورتا گؤتوروب بير يئره ييغيشارلار.

- هه، كيم منن يومورتا دؤيوشدورور؟

بيري آلار يومورتاني ديشينه وورار سسيندن بيلر هانكيسينين يومورتاسي بركدي، هانكيسينين كي بوشدو. گؤرسه اؤزونونكو اونونكوندان بركدي دئيير:

من - گتير ووراخ

- سن توتورسان من ووروم يوخسا من توتوم سن وور

- توت ووروم

يومورتاني بيري توتار او بيرسي اوج طرفدن بير_ بيرينه وورار هانكيسينين يومورتاسي سينسا او بيريسي اوندان يومورتاني آلار.

بايرام گونلري، باشدان اوپپولما،كلله قورداشي، يومورتا باسديرماق، المنده كيمي اويونلارلا سووولار سيزدك گلر. يئمك گؤتوروب اوگونو چؤلده كئچيررلر. بئله‌ليكله هامي آرزيلارين ساخلار گلن بايراما.

تاریخ
2019.03.16 / 10:55
مولف
محمد علیپور مقدم
شرح لر
دیگر خبرلر

فدرالیسم و مخالفانش

مجتبی مینوی ناسیونالیسم فارسی گرا و زبان ترکی

مفت پول در آوردن بهترین شیوه حلال خوری است

مجتبی مینوی ناسیونالیسم فارسی گرا و زبان ترکی

تجارت در آذربایجان

جنایات تروریست های ارمنی داشناک در مغان

سورقو: گونئی آذربایجان ملی حرکتی نه ائتمه لیدیر؟

مجتبی مینوی ناسیونالیسم فارسی گرا و زبان ترکی

روز بزرگداشت فردوسی

زبان ترکی در فهرست ده زبانی که بریتانیایی‌ها باید یاد بگیرند

خبر خطّی
 
Axar.az'da reklam Bağla
Reklam
Bize yazin Bağla